ជំនួបកំពូលអូតង់៖អាមេរិក និងហ្សកហ្ស៊ីពង្រឹងកិច្ចសហប្រតិបត្តិការយោធា ក្រោមការសម្លក់ពីរុស្ស៊ី
ចុះផ្សាយនៅថ្ងៃ៖
ស្តាប់ - ០៥:៤៤
អង្គការអូតង់ត្រៀមបើកជំនួបកំពូលរបស់ខ្លួនរយៈពេល ២ថ្ងៃ គឺថ្ងៃសុក្រ ទី៨ និងថ្ងៃសៅរ៍ ទី៩ កក្កដានៅក្នុងទីក្រុងវ៉ាសូវី ប្រទេសប៉ូឡូញ។ ជំនួបកំពូលដែលនឹងចូលរួមដោយប្រមុខរដ្ឋ និងប្រមុខរដ្ឋាភិបាលទាំង ២៨ប្រទេសសមាជិកអូតង់។ នៅថ្ងៃព្រហស្បតិ៍ ទី៧ កក្កដានេះ ពោលមួយថ្ងៃមុនបើកជំនួបកំពូល មានថ្នាក់ដឹកនាំអូតង់ខ្លះបានឆ្លៀតទៅបំពេញទស្សនកិច្ចនៅក្នុងអតីតប្រទេសក្នុងប្លុកសហភាពសូវៀត។ ជាក់ស្តែង ដំណើរទស្សនកិច្ចរបស់ប្រមុខការទូតអាមេរិកចន ឃែរីនៅក្នុងប្រទេសហ្សកហ្ស៊ី និងប្រទេសអ៊ុយក្រែន។
ការដែលលោកប្រមុខការទូតអាមេរិកចន ឃែរីឆ្លៀតឆៀងចូលប្រទេសហ្សកហ្ស៊ី និងអ៊ុយក្រែន មុននឹងទៅចូលរួមជំនួបកំពូលអូតង់ក្នុងប្រទេសប៉ូឡូញមិនមែនជារឿងចៃដន្យទេ។ មិនចៃដន្យ ព្រោះហ្សកហ្ស៊ី និងអ៊ុយក្រែនជាអតីតរដ្ឋក្នុងជំនាន់សហភាពសូវៀតដូចគ្នា និងបើទោះបីបច្ចុប្បន្នជាប្រទេសឯករាជ្យក៏ដោយ ក៏ប្រទេសជិតខាងរុស្ស៊ីទាំងពីរបាន និងកំពុងបន្តទទួលរងការលេបត្របាក់ពីរុស្ស៊ីជំនាន់ថ្មីរបស់លោកប្រធានាធិបតីពូទីនដូចគ្នា។
ប្រទេសហ្សកហ្ស៊ីដែលធ្លាប់ធ្វើសង្រ្គាមទល់នឹងរុស្ស៊ីក្នុងឆ្នាំ ២០០៨ បានធ្វើឲ្យហ្សកហ្ស៊ីបានបាត់បង់ការត្រួតត្រាលើតំបន់ចំនួនពីររបស់ខ្លួន គឺតំបន់អូសេទីខាងត្បូងដែលកំពុងទាមទារផ្តាច់ទឹកដីពីក្រុមឧទ្ទាមគាំទ្រដោយរុស្ស៊ី និងតំបន់អាប់កាហ្ស៊ីដែលរុស្ស៊ីបានដាក់តាំងមូលដ្ឋានយោធារបស់ខ្លួននៅទីនោះ។ សព្វថ្ងៃនេះ ក្រុងម៉ូស្គូបានទទួលស្គាល់តំបន់ទាំងពីរថា ជាដែនដីឯករាជ្យ។ ដូច្នេះវត្តមានរបស់លោកឃែរីនៅក្នុងប្រទេសហ្សកហ្ស៊ី ជាសក្ខីកម្មមួយដែលអាមេរិកចង់បញ្ជាក់ពីការគំាទ្រយ៉ាងពេញទំហឹងរបស់ខ្លួនចំពោះប្រទេសជិតខាងរុស្ស៊ីមួយនេះ។
ដើម្បីសម្តែងឲ្យកាន់តែជាក់ស្តែងថែមទៀតនាឱកាសទស្សនកិច្ចរបស់លោកចន ឃែរី អាមេរិក និងហ្សកហ្ស៊ីបានចុះហត្ថលេខាលើកិច្ចព្រមព្រៀងជាដៃគូនៃកិច្ចសហប្រតិបត្តិក្នុងវិស័យការពារ និងសន្តិសុខ។ លោកឃែរីបានថ្លែងចាត់ទុកកិច្ចព្រមព្រៀងជាដៃគូថា ជារឿងសំខាន់មិនអាចខ្វះបាន ចំណែកលោកនាយករដ្ឋមន្រ្តីហ្សកហ្ស៊ីវិញ លោកបានចាត់ទុកកិច្ចព្រមព្រៀងជាដៃគូជាមួយអាមេរិកថា ជារឿងចាំបាច់ក្នុងការជួយពង្រឹងសន្តិសុខ និងសមត្ថភាពការពារប្រទេសហ្សកហ្ស៊ី។
នៅអ៊ុយក្រែន លោកចន ឃែរីអំពាវនាវឲ្យភាគីពាក់ព័ន្ធគោរពកិច្ចព្រមព្រៀងទីក្រុងមីនស្កិ៍ឆ្នាំ ២០១៥
គោលដៅនៃទស្សនកិច្ចរបស់លោកចន ឃែរីនៅក្នុងប្រទេសអ៊ុយក្រែនក៏មិនខុសពីប្រទេសហ្សកហ្ស៊ីទេ គ្រាន់តែថា បញ្ហានៅអ៊ុយក្រែនហាក់ដូចជាកំពុងបន្តសាំញាំបន្តិច។ សាំញាំនៅត្រង់ថា បន្ទាប់ពីត្រូវបានប្រទេសរុស្ស៊ីក្រសោបយកដែនដីគ្រីមេក្នុងឆ្នាំ ២០១៤ មក តំបន់ប៉ែកខាងកើតអ៊ុយក្រែនក៏បាន និងកំពុងទទួលការគំរាមកំហែងផ្តាច់ទឹកដីពីក្រុមឧទ្ទាមគាំទ្រដោយរុស្ស៊ីទៀត។ គឺស្ថានការណ៍នៅតំបន់ប៉ែកខាងកើតអ៊ុយក្រែននោះឯងដែលលោកប្រមុខការទូតអាមេរិកចន ឃែរី និងលោកនាយករដ្ឋមន្រ្តីអ៊ុយក្រែនបានលើកយកទៅជជែកគ្នាក្នុងទីក្រុងគៀរ។
នៅក្នុងស្ថានការណ៍តំបន់ប៉ែកខាងកើតអ៊ុយក្រែនដដែលនោះ លោកឃែរីក៏មិនភ្លេចនិយាយដល់កិច្ចព្រមព្រៀងទីក្រុងមីនស្កិ៍ចុះហត្ថលេខាក្នុងខែកុម្ភៈ ឆ្នាំ ២០១៥ រវាងភាគីពាក់ព័ន្ធក្នុងជម្លោះ រួមទាំងភាគីរុស្ស៊ីផង។ កិច្ចព្រមព្រៀងនោះបានតម្រូវឲ្យក្រុងមូស្គូបញ្ឈប់ការគាំទ្រចំពោះក្រុមឧទ្ទាមទាមទារផ្តាច់ទឹកដីគាំទ្ររុស្ស៊ី និងគោរពបទឈប់បាញ់។ ជាថ្នូរត្រឡប់វិញ អ៊ុយក្រែនត្រូវធ្វើកំណែទម្រង់នយោបាយមួយចំនួន ពិសេសផ្តល់លក្ខន្តិកស្វយ័តឲ្យតំបន់ដែលកំពុងមានជម្លោះ។ អ្វីដែលលោកឃែរីចង់ដឹងនោះគឺថា តើស្ថានការណ៍នៅតំបន់ខាងកើតអ៊ុយក្រែនបានវិវត្តន៍ដល់ណាហើយ និងថា តើកិច្ចព្រមព្រៀងកន្លងមកត្រូវបានភាគីពាក់ព័ន្ធគោរពត្រឹមត្រូវ ឬអត់។
អូតង់មិនភ្លេចហ្សកហ្ស៊ី តែនៅមានការងារជាច្រើនទៀតដែលហ្សកហ្ស៊ីត្រូវធ្វើ
សំណើរបស់ហ្សកហ្ស៊ី និងអ៊ុយក្រែនសុំចូលជាសមាជិកអង្គការអូតង់អាចជារបៀបវារៈមួយនៃជំនួបកំពូលអូតង់ក្នុងទីក្រុងវ៉ាសូវី ប្រទេសប៉ូឡូញរយៈពេល ២ថ្ងៃដែលចាប់ផ្តើមនៅថ្ងៃសុក្រ ទី៨ កក្កដា។ រុស្ស៊ីដែលមិនមែនជាសមាជិកអូតង់ និងក្នុងនាមជាអាតីតអាណាព្យាបាលរបស់ហ្សកហ្ស៊ី និងអ៊ុយក្រែន តែងតែងចេញមុខប្រឆាំងដោយមិនចង់ឃើញប្រទេសជិតខាងទាំងពីរក្បែរខ្លួនក្លាយជាសមាជិករបស់អង្គការអូតង់ទេ។ នៅក្នុងជំនួបកំពូលអូតង់ឆ្នាំ ២០០៨ ក្នុងទីក្រុងប៊ុយការ៉េស ប្រទេសរូម៉ានី អូតង់បានសន្យាថា ហ្សកហ្ស៊ីនឹងក្លាយជាសមាជិកអូតង់នៅថ្ងៃណាមួយ។
យ៉ាងណាក៏ដោយ អ្នកទទួលខុសត្រូវជាន់ខ្ពស់អាមេរិកម្នាក់ក្នុងក្រសួងការបរទេសអាមេរិកបានបញ្ជាក់នាថ្ងៃទី៦ កក្កដាថា អូតង់មិនភ្លេចពាក្យសន្យាកាលពីឆ្នាំ ២០០៨ របស់ខ្លួនទេ តែនៅមានការងារជាច្រើនទៀតដែលហ្សកហ្ស៊ីត្រូវធ្វើ មុននឹងអាចក្លាយជាសមាជិកអូតង់បាន។ ការងារមួយដែលសំខាន់មិនអាចខ្វះបាន គឺការគោរពស្តង់ដារលទ្ធិប្រជាធិបតេយ្យ។ បន្ទាប់មក ហ្សកហ្ស៊ីត្រូវដោះស្រាយឲ្យបានដាច់ស្រឡះពីជោគវាសនានៅតំបន់អូសេទីខាងត្បូង និងតំបន់អាប់កាហ្ស៊ីដែលកំពុងមានវត្តមានទាហានរុស្ស៊ីនៅទីនោះ។
ជាកាយវិការមួយដើម្បីជាសញ្ញាជួយលើកទឹកចិត្ត និងការមិនភ្លេចហ្សកហ្ស៊ី អូតង់បានអញ្ជើញលោកប្រធានាធិបតីហ្សកហ្ស៊ីឲ្យចូលរួមនៅក្នុងជំនួបកំពូលអូតង់ឆ្នាំ ២០១៦នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ