លោកចន ឃែរី៖អាមេរិកនឹងបញ្ជូនលោកហ្គ៊ូឡេនទៅឲ្យតួកគី បើតួកគីបង្ហាញភស្តុតាងត្រឹមត្រូវ
នៅថ្ងៃសៅរ៍ ទី១៧ កក្កដា ពោលប៉ុន្មានម៉ោងក្រោយព្រឹត្តិការណ៍ប៉ុនប៉ងធ្វើរដ្ឋប្រហារមិនបានសម្រេចក្នុងប្រទេសតួកគី លោកប្រមុខការទូតអាមេរិកចន ឃែរីបានប្រកាសឲ្យដឹងថា អាមេរិកនឹងជួយតួកគីនៅក្នុងការស៊ើបអង្កេតស្ចែងរកជន ឬក្រុមដែលបានរៀបចំរដ្ឋប្រហារនោះ។ ទាក់ទងនឹងសកម្មជនប្រឆាំងរដ្ឋាភិបាលតួកគីលោកហ្វឺទូឡា ហ្គ៊ូឡេនដែលកំពុងភៀសខ្លួនរស់នៅសហរដ្ឋអាមេរិកត្រូវបានលោកចន ឃ៊ែរីអះអាងថា អាមេរិកអាចនឹងបញ្ជូនទៅឲ្យតួកគីបាន បើរដ្ឋាភិបាលតួកគីបង្ហាញភស្តុតាងជាក់ស្តែងពីការរួមគំនិតរបស់លោកហ្គូឡេន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ការថ្លែងរបស់លោកប្រមុខការទូតអាមេរិកចន ឃ៊ែរីត្រូវបានធ្វើឡើងនាដំណើរទស្សនកិច្ចរបស់លោកនៅក្នុងប្រទេសលុចសំបួរ។ លោកចន ឃែរីបានបញ្ជាក់ដោយលំអិតច្បាស់ៗនៅក្នុងសន្និសីទកាសែតជាមួយសមភាគីលុចសំបួរថា អាមេរិកនៅមិនទាន់បានទទួលសំណើសុំធ្វើបត្យាប័នលោកហ្វឺទូឡា ហ្គ៊ូឡេនពីរដ្ឋាភិបាលតួកគីនៅឡើយទេ និងថា អាមេរិកអាចនឹងបញ្ជូនលោកហ្គ៊ូឡេនទៅឲ្យតួកគីបាន ប្រសិនបើរដ្ឋាភិបាលក្រុងអង់ការ៉ាបង្ហាញភស្តុតាងជាក់ស្តែងពីការរួមគំនិតរបស់លោកហ្គូឡេននៅក្នុងទង្វើរដ្ឋប្រហារមិនបានសម្រេចនៅតួកគីពេលនេះ។
លោកប្រមុខការទូតអាមេរិកដែលបានជួបសន្ទនាតាមទូរស័ព្ទជាមួយសមភាគីតួកគីនៅយប់ថ្ងៃសុក្រ ទី១៥ កក្កដាក្នុងពេលផ្ទុះព្រឹត្តិការណ៍រដ្ឋប្រហារក្នុងទីក្រុងអង់ការ៉ាថា បន្ទាប់ពីបានទទួលភស្តុតាងជាក់ច្បាស់ និងត្រឹមត្រូវពីក្រុងអង់ការ៉ាស្តីពីការចូលរួមរបស់លោកហ្គ៊ូឡេនហើយ ក្រុងវ៉ាស៊ីតោននឹងលើកយកទៅពិនិត្យស៊ីជម្រៅ រួចសម្រេចថា តើត្រូវ ឬមិនត្រូវបញ្ជូនលោកហ្គ៊ូឡេនទៅឲ្យរដ្ឋអំណាចតួកគី។ សូមជម្រាបជូនថា ការថ្លែងរបស់លោកចន ឃែរីដូចនេះបានធ្វើឡើង បន្ទាប់ពីលោកប្រធានាធិបតីតួកគីអ៊ែរដូហ្កានបានចង្អុលចំមុខលោកហ្គ៊ូឡេនថា ជាអ្នកនៅពីក្រោយរដ្ឋប្រហារយោធាមិនបានសម្រេចក្នុងយប់ថ្ងៃសុក្រ ទី១៥ កក្កដា។
តែប្រតិកម្មតបភ្លាមៗ សកម្មជនប្រឆាំងរដ្ឋាភិបាលតួកគីរូបនេះបានមុខច្រានចោលការចោទប្រកាន់នោះ និងថែមទាំងថ្កោលទោសលើទង្វើប៉ុនប៉ងរដ្ឋប្រហារយោធានោះទៀតផង។ សូមជម្រាបជូនថា មានអាយុ ៧៥ឆ្នាំ លោកហ្គូនឡេនដែលជាសត្រូវស៊ីសាច់ហុតឈាមនឹងលោកអ៊ែរដូហ្កានបានភៀសខ្លួនទៅរស់នៅសហរដ្ឋអាមេរិកតាំងពីឆ្នាំ ១៩៩៩។ តែសកម្មជនប្រឆាំងរូបនេះមិនបានដកខ្លួនចេញពីឆាកនយោបាយតួកគីទាំងស្រុងទេ។ ក្រៅពីសន្យាជួយធ្វើការស៊ើបអង្កេតជាមួយរដ្ឋាភិបាលតួកគី លោកចន ឃែរីក៏បានបញ្ជាក់ពីជំហរគំាទ្រឥតងាករេរបស់រដ្ឋបាលអាមេរិកចំពោះរដ្ឋាភិបាលតួកគីដែរ។
លោកចន ឃែរីសង្ឃឹមថា រដ្ឋាភិបាលក្រុងអង់ការ៉ានឹងធ្វើការកាត់ទោសជនដៃដល់ និងជនរួមគំនិតនៅក្នុងទង្វើរដ្ឋប្រហារយោធាមិនបានសម្រេចនេះដោយផ្អែកលើមូលដ្ឋានច្បាប់ និងរដ្ឋធម្មនុញ្ញរបស់ប្រទេស។ ទន្ទឹមគ្នានេះ លោកចន ឃែរីសង្ឃឹមថា វិបត្តិតួកគីពេលនេះនឹងមិនធ្វើឲ្យប៉ះពាល់ដល់កិច្ចសហប្រតិបត្តិការរវាងអាមេរិក និងតួកគី ឬមួយរវាងតួកគី និងអង្គការអូតង់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ