ម៉ូស្គូ ច្រានចោលសំដីសង្ស័យមកលើខ្លួន ពីខាង វ៉ាស៊ីនតោន
វិមានក្រេមឡាំង រសៀលថ្ងៃពុធម្សិលមិញ បានបដិសេធ រាល់ការលូកដៃអ្វីណា ពីខាងរុស្ស៊ី ទៅក្នុងយុទ្ធនាការឃោសនាបោះឆ្នោតនៅស.រ.អា. – បដិសេធនេះ ក្នុងឋានៈ ជាចម្លើយតបនឹងលោកប្រធានាធិបតី បារ៉ាក់ អូបាម៉ា ដែលថារុស្ស៊ីអាចសាកល្បងជះឥទ្ធិពល ទៅលើការបោះឆ្នោតនៅអាមេរិករើសប្រធានាធិបតីថ្មី សម្រាប់ជាគុណប្រយោជន៍នៃបេក្ខជនប្រធានាធិបតី ខាងបក្សសាធារណរដ្ឋ គឺលោក ដូណាល់ ត្រាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
អ្នកនាំពាក្យផ្លូវការរបស់វិមានក្រេមឡាំង លោក ឌ្មីទ្រី ពេស្កូវ ជាចម្លើយតបនឹងសំនួរ អ្នកកាសែតម្នាក់ ស្តីអំពីសម្តីនោះរបស់លោកអូបាម៉ា ធ្វើទៅកាណាល់ទូរទស្សន៍ NBC News បានថ្លែង ជាអាទិ៍ ៖ លោកប្រធានាធិបតីពូទីន ធ្លាប់បាននិយាយជាច្រើនលើកទៅហើយថា រុស្ស៊ី មិនដែលបានលូកដៃសោះឡើយ ហើយសព្វថ្ងៃ ក៏មិនលូកដៃម្តងណាឡើយ ទៅក្នុងកិច្ចផ្ទៃក្នុង របស់ប្រទេសណាមួយ ជាពិសេស ទៅក្នុងយុទ្ធនាការបោះឆ្នោតប្រទេសដទៃ។ លោក ពេស្កូវ គូសបញ្ជាក់ថា រុស្ស៊ីតែងចៀសវាងយ៉ាងមធ្យ័ត មិនធ្វើសកម្មភាពណា ដែលអាចត្រូវគេបកស្រាយថាជា ការជ្រៀតជ្រែក ចូលក្នុងសម័យឃោសនាបោះឆ្នោត នៅតាមប្រទេសឯទៀត។
អ្នកនាំពាក្យនោះបន្ថែមថា “បើគេចង់និយាយពីក្តីសង្ស័យចំពោះប្រទេសមួយផ្សេង នោះ យ៉ាងហោចណាស់ ត្រូវនិយាយឲ្យបានជាក់លាក់ និង ច្បាស់លាស់។ ក្នុងករណីដែលមាន ការពិចារណាតាមផ្លូវប៉ាន់ស្មាន គឺមិនសឲ្យឃើញពីស្មារតីស្ថាបនាឡើយ។ ប៉ុន្តែ ពួកអ្នកនយោបាយអាមេរិកាំង ចូលចិត្តនិយាយ អំពី “គ្រោះថ្នាក់អ្វីម្យ៉ាងពីខាងរុស្ស៊ី” រួចមកនាំគ្នាលើកវា ជា ”សន្លឹកបៀរអុងអាត់ក្នុងល្បែងរបស់ខ្លួន។
អំពីរឿងអាស្រូវ បណ្តាលមកពីការបែកធ្លាយទៅអ៊ីមេល របស់បក្សប្រជាធិបតេយ្យអាមេរិក អ្នកនាំពាក្យវិមានក្រេមឡាំងថ្លែងថា សូម្បីតែគូប្រជែងរបស់បក្សប្រជាធិបតេយ្យនោះ ក៏បានថ្លែងបដិសេធ ច្រានចោលទៅហើយ ការលូកដៃស្អីណាពីខាងរុស្ស៊ី។ ប្រាកដណាស់ ដែលរុស្ស៊ីផ្ទាល់ បានបដិសេធម្តងហើយម្តងទៀត។ មិនតែប៉ុណ្ណោះ ទាំងស្ថាបនិកវេបសាយ Wikileaks លោក Julian Assange ក៏បានថ្លែងថា ក្តីសង្ស័យថា រុស្ស៊ីពាក់ព័ន្ធនឹងរឿងនេះ គឺគ្មានមូលដ្ឋានអ្វី ជាសំអាងឡើយ។
ជាការរំលឹក តបនឹងសំនួរ ស្តីអំពីនាទីទទួលខុសត្រូវរបស់រុស្ស៊ី ចំពោះការធ្លាយចេញយ៉ាងសន្ធឹកសន្ធាប់ នៃអ៊ីមេលរបស់ពួកអ្នកមុខអ្នកការខ្ពស់ៗ នៃបក្សប្រជាធិបតេយ្យ លោកប្រធានាធិបតីស.រ.អា. បារ៉ាក់ អូបាម៉ា ក្នុងសម្ភាសន៍ទៅកាណាល់ទូរទស្សន៍ NBC News បានថ្លែងថា “រាល់អ្វីៗ អាចមានទាំងអស់” បូកទាំង ការទម្លាយចូលពីខាងពួក Hackers រុស្ស៊ី គឺ ពួកដែលតាក់តែងកម្មវិធីពិសេស សម្រាប់លុកចូលទៅ ទទួលឲ្យបាននូវព័ត៌មានសម្ងាត់ៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ