គណៈកម្មការអូឡាំពិកបង្កើតក្រុមអត្តពលិកជនភៀសខ្លួន ជាលើកទីមួយ
ចុះផ្សាយនៅថ្ងៃ៖
ស្តាប់ - ០៣:៥៧
ការប្រកួតកីឡាអូឡាំពិកឆ្នាំ២០១៦ នៅក្រុងរីយ៉ូ ប្រទេសប្រេស៊ីល ត្រូវចាប់បើកជាផ្លូវការចាប់ពីថ្ងៃទី ៥ រហូតដល់ថ្ងៃទី ២១សីហា ក្នុងវិញ្ញាសាកីឡាចំនួន២៨ និងមានកីឡាករចូលរួមជាង ១០៥០០នាក់ មកពីក្រុមកីឡាជម្រើសជាតិ ២០៦ក្រុម។ តែអ្វីជាការកត់សម្គាល់និងមិនធ្លាប់មានក្នុងការប្រកួតកីឡាអូឡាំពិកមុនៗ គឺការចូលរួមរបស់ក្រុមកីឡាករអត្តពលិក១០នាក់ ក្នុងនាមជាក្រុមកីឡាករជនភៀសខ្លួន។
នេះជាលើកទីមួយហើយក្នុងប្រវត្តិកីឡាអូឡាំពិក ដែលមានក្រុមកីឡាករមួយក្រុមជាជនភៀសខ្លួន ត្រូវបានបង្កើតឡើងជាផ្លូវការ នៅថ្ងៃទី២ ខែមីនា ២០១៦ ក្រោមគំនិតផ្តួចផ្តើមរបស់គណៈកម្មការអូឡាំពិក និងឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (HCR)។
ក្រុមកីឡាជនភៀសខ្លួនដំបូងគេនេះ នឹងត្រូវទទួលស្វាគមន៍ ព្រមទាំងមានកីឡាករចូលរួមប្រកួត គោរពវិន័យ វិធានផ្ទៃក្នុង មានមេដឹកនាំ មានគ្រូបច្ចេកទេស ដូចជាក្រុមប្រតិភូកីឡាករជាតិផ្សេងៗទៀតដែរ។ នៅពេលដង្ហែក្បួនបើកកម្មវិធី នាថ្ងៃសុក្រទី ៥សីហា ក្រុមកីឡាករជនភៀសខ្លួន នឹងត្រូវដើរពីក្រោយទង់ជាតិអូឡាំពិក ពីមុខក្រុមកីឡាករប្រេស៊ីលជាម្ចាស់ផ្ទះ។ រាល់វត្តមានផ្លូវការរបស់ក្រុម ក៏ដូចជានៅពេលឡើងទទួលយកមេដាយ ទង់ជាតិ និងភ្លេងគោរពទង់ជាតិអូឡាំពិក នឹងត្រូវបង្ហូតឡើង។ ក្រុមកីឡានេះស្ថិតនៅក្រោមការគ្រប់គ្រងនិងផ្គត់ផ្គង់ហិរញ្ញវត្ថុរបស់អង្គការសាមគ្គីអូឡាំពិក ជារហូតតទៅ និងត្រូវឆ្លងកាត់ដំណើរការត្រួតពិនិត្យការប្រើថ្នាំប៉ូវ ដូចជាកីឡាករជាតិដទៃដែរ។
សម្រាប់ការប្រកួតកីឡាអូឡាំពិកក្រុងរីយ៉ូនេះ គណៈកម្មការអូឡាំពិក បានសំឡឹងឃើញអត្តសញ្ញាណកីឡាករជាជនភៀសខ្លួនចំនួន៤៣រូប តែមានកីឡាករតែ១០រូបដែលបានជាប់ជ្រើសរើស យកទៅចូលរួមប្រកួតប្រជែង ស្របតាមលក្ខន្តិកៈកីឡាកំណត់ដោយសហព័ន្ធកីឡាអន្តរជាតិផង និងលក្ខន្តិកៈរដ្ឋបាលផង ថាពិតជាជនភៀសខ្លួន ទទួលស្គាល់ដោយអង្គការសហប្រជាជាតិ មានបុគ្គលិកលក្ខណៈនិងប្រវត្តិភៀសខ្លួនត្រឹមត្រូវផង។
ក្រុមអត្តពលិកទាំង១០នាក់ ដែល៥នាក់មានដើមកំណើតនៅប្រទេសស៊ូដង់ខាងត្បូង ពីរនាក់ជាជនជាតិស៊ីរី (ហែលទឹក) ពីរនាក់មានកំណើតនៅកុងហ្កោ(យូដូនិងតៃក្វាន់ដូ) និងម្នាក់ជាអេត្យូពីរ (រត់ប្រណាំងអេត្យូពីម្នាក់) សុទ្ធតែមានប្រវត្តិជូរចត់ នឹងការភៀសខ្លួន។
ក្នុងករណីកីឡាការិនីហែលទឹក ស៊ីរី Yusra Mardini ដែលបានទទួលសិទ្ធិជាជនភៀសខ្លួនក្នុងប្រទេសអាល្លឺម៉ង់ អាយុទើប១៨ឆ្នាំ តែកាលពីមួយឆ្នាំមុន នាងធ្លាប់បានហែលឆ្លងសមុទ្ទមេឌីទែណេ អូសទូកខូចដឹកជនភៀសខ្លួនផ្សេងទៀត រយៈពេលបីម៉ោងកន្លះទម្រាំបានជួបក្រុមសង្គ្រោះ។ កីឡាករយូដូជាតិកុងហ្កោPopole Misenga ដែលកាលពីអាយុ៩ឆ្នាំ ត្រូវបែកពីគ្រួសាររស់ក្នុងព្រៃម្នាក់ឯងរយៈពេល៨ថ្ងៃ ទម្រាំត្រូវបានសង្គ្រោះមកកាន់មជ្ឈមណ្ឌលកុមារ និងបានមកជ្រកកោននៅប្រេស៊ីល ដោយលែងស្គាល់មុខបងប្អូនទៅហើយ។
សម្រាប់ពួកគេ ដោយមិនគិតដល់មេដាយ ជាប់ជម្រើសបានមកប្រកួតកីឡាអូឡាំពិករីយ៉ូ គឺជាមោទនភាព និងជាជោគជ័យដ៏ត្រចះត្រចង់មួយស្រេចទៅហើយ។ ការប្រយុទ្ធពេលនេះ មិនមែនមានអត្ថន័យត្រឹមកីឡាទេ តែជាការប្រយុទ្ធដើម្បីជីវិត។
សម្រាប់គណៈកម្មការអូឡាំពិក វិបត្តិជនភៀសខ្លួនដែលពិភពលោកកំពុងឆ្លងកាត់នាពេលបច្ចុប្បន្ននេះមានលក្ខណៈធំធេង និងធ្ងន់ធ្ងរណាស់។ ហេតុដូច្នេះហើយបានជាគណៈកម្មការសម្រេចចិត្តបង្កើតជាក្រុមកីឡាជនភៀសខ្លួនមួយក្រុមដំបូងនេះឡើង ដើម្បីទុកជាសារផ្ញើក្តីសង្ឃឹមឱ្យដល់ជនភៀសខ្លួនគ្រប់រូប នៅលើភពផែនដីទាំងមូល។
នៅពេលអនុម័តកាលវិភាគអូឡាំពិកឆ្នាំ២០២០ គណៈកម្មការអូឡាំពិក បានគូសវាសផែនទីចង្អុលផ្លូវចលនាអូឡាំពិក ដោយមិនភ្លេចគិតគូរដល់បញ្ហាជនភៀសខ្លួនដែលជាវិបត្តិកំរិតពិភពលោកឡើយ។ គណៈកម្មការបានទម្លាយកញ្ចប់មូលនិធិបន្ទាន់ពិសេសមួយ ក្នុងទំហំ២លានដុល្លារអាមេរិក ដើម្បីដាក់ឱ្យដំណើរការគម្រោងជំនួយ តាមរយៈកីឡា។
គណៈកម្មការអូឡាំពិក បានធ្វើការជាមួយភ្នាក់ងាររបស់អង្គការសហប្រជាជាតិជាច្រើនមកហើយ ដើម្បីជួយជនភៀសខ្លួន។ មិនជាការកម្រទេដែលគណៈកម្មការកីឡាអូឡាំពិក បានអនុញ្ញាតឱ្យកីឡាករជាជនភៀសខ្លួន ជាជនរត់សង្គ្រាមចូលប្រកួត ក្នុងនាមជាអ្នកកីឡា អព្យាក្រិត្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ