តួកគី៖កងទ័ពបានបើកប្រតិបត្តិការកម្ទេចពួកជីហាតអង្គការរដ្ឋអ៊ីស្លាមនៅស៊ីរី
នៅថ្ងៃអង្គារ ទី២៣ សីហានេះ កងទ័ពតួកគីបានបើកប្រតិបត្តិការបាញ់ផ្លោងលើទីតាំងរបស់ពួកជីហាតអង្គការរដ្ឋអ៊ីស្លាមក្នុងប្រទេសស៊ីរី។ ប្រតិកម្មរបស់កងទ័ពតួកគីពេលនេះ គឺដើម្បីវាយបកនឹងការបាញ់គ្រាប់កាំភ្លើងត្បាល់របស់ពួកជីហាតអង្គការរដ្ឋអ៊ីស្លាមពីទឹកដីស៊ីរីឆ្លងចូលទឹកដីតួកគីនាថ្ងៃចន្ទ ទី២២ សីហា។ ស្របគ្នានឹងប្រតិបត្តិការរបស់កងទ័ពតួកគី ក្រុមបះបោរស៊ីរីដែលគាំទ្រដោយទីក្រុងអង់ការ៉ាក៏កំពុងត្រៀមវាយលុកបណ្តេញពួកជីហាតចេញពីស្រុកហ្សារ៉ាប្លុសដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
តាំងពីព្រលឹមស្រាងៗថ្ងៃអង្គារ ទី២៣ សីហាដែលកងទ័ពតួកគីបានបង្កើនការបាញ់ផ្លោងលើទីតាំងរបស់ពួកជីហាតអង្គការរដ្ឋអ៊ីស្លាមក្នុងទឹកដីស៊ីរី។ ជាផ្លូវការ រដ្ឋាភិបាលតួកគីចង់វាយបកនឹងការបាញ់ផ្លោងគ្រាប់កាំភ្លើងត្បាល់របស់ពួកជីហាតអង្គការរដ្ឋអ៊ីស្លាមពីទឹកដីស៊ីរីចូលក្នុងទឹកដីតួកគីនាថ្ងៃអង្គារ ទី២២ សីហា។ តែក្នុងពេលជាមួយគ្នានេះ ទីក្រុងអង់ការ៉ាក៏ចង់ជួយក្រុមបះបោរស៊ីរីដែលកំពុងត្រៀមបើកការវាយប្រហារដណ្តើមយកស្រុកហ្សារ៉ាប្លុសពីកណ្តាប់ដៃពួកជីហាតអង្គការរដ្ឋអ៊ីស្លាមដែរ។
សម្រាប់ទីក្រុងអង់ការ៉ា ការជួយរំដោះស្រុកហ្សារ៉ាប្លុសរបស់ស៊ីរីពីកណ្តាប់ដៃអង្គការរដ្ឋអ៊ីស្លាមជារឿងសំខាន់ និងចំាបាច់ ព្រោះជាទីតាំងឆ្លងកាត់រវាងព្រំដែនស៊ីរី និងតួកគី។ ម្យ៉ាងទៀត ការជួយក្រុមបះបោរស៊ីរីក្នុងការរំដោះស្រុកហ្សារ៉ាប្លុសក៏ជាឆន្ទៈរបស់ទីក្រុងអង់ការ៉ាក្នុងការរារាំងកុំឲ្យក្រុមប្រដាប់អាវុធគួដឌីស្ថានចូលកាន់កាប់ដែរ។ នៅយប់ថ្ងៃចន្ទ ទី២២ សីហា លោកនាយករដ្ឋមន្រ្តីតួកគីបានអំពាវនាវដល់ក្រុមប្រទេសមហាអំណាចដែលបានចូលរួមដោះស្រាយវិបត្តិស៊ីរី ដូចយ៉ាងរុស្ស៊ី អាមេរិក និងអ៊ីរ៉ង់ឲ្យពួតដៃគ្នាក្នុងការបើកទំព័រថ្មីនៅស៊ីរី។
សេចក្តីអំពាវនាវរបស់ប្រមុខរដ្ឋាភិបាលតួកគីបានធ្វើឡើង បន្ទាប់ពីរដ្ឋមន្រ្តីការបរទេសតួកគីបានបញ្ជាក់ពីភាពចាំបាច់ក្នុងការបោសសំអាតពួកជីហាតអង្គការរដ្ឋអ៊ីស្លាមនៅតាមបណ្តោយព្រំប្រទល់ដែនតួកគី ស៊ីរីដែលមានប្រវែង ៩០០គីឡូម៉ែត្រ។ ប្រតិកម្មផ្ទួនៗរបស់ថ្នាក់ដឹកនាំតួកគីក្នុងយុទ្ធនាការប្រយុទ្ធប្រឆាំងអង្គការរដ្ឋអ៊ីស្លាមបានធ្លាក់មក បន្ទាប់ពីតួកគីបានរងការវាយប្រហារជាបន្តបន្ទាប់ពីអង្គការរដ្ឋអ៊ីស្លាមតាំងពីឆ្នាំ ២០១៥។ ថ្មីៗចុងក្រោយ គឺភេរវកម្មអត្តឃាតនាឱកាសពិធីមង្គលការជនជាតិគួដឌីស្ថានក្នុងស្រុកមួយស្ថិតក្បែរព្រំដែនស៊ីរីកាលពីថ្ងៃទី២០ សីហាកន្លងទៅដែលបានបណ្តាលឲ្យមានមនុស្សស្លាប់ ៥៤នាក់។
ដោយឡែក ទន្ទឹមគ្នានឹងយុទ្ធនាការប្រឆាំងអង្គការរដ្ឋអ៊ីស្លាម រដ្ឋាភិបាលតួកគីក៏កំពុងបន្តដំឡើងសាច់ដុំដាក់គណបក្សពលករគួដឌីស្ថានដែលខ្លួនចាត់ទុកជាអង្គការភេរវកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ