លោកប្រមុខរដ្ឋបារាំងហូឡង់សម្តែងក្តីបារម្ភរឿងអ៊ុយក្រែនប្រាប់សមភាគីរុស្ស៊ីលោកពូទីន
លោកប្រធានាធិបតីបារាំងហ្រ្វង់ស័រ ហូឡង់បានសម្តែងក្តីបារម្ភជាថ្មីចំពោះស្ថានការណ៍វិវត្តន៍ចុងក្រោយយ៉ាងតានតឹងនៅប៉ែកខាងកើតប្រទេសអ៊ុយក្រែន។ នៅក្នុងសេចក្តីជូនដំណឹងមួយរបស់វិមានប្រធានាធិបតីបារាំងចេញផ្សាយនារសៀលថ្ងៃអង្គារ ទី២៣ សីហា លោកហូឡង់បាននិយាយប្រាប់សមភាគីរុស្ស៊ីលោកពូទីនពីការកើនឡើងនៃការរំលោភបទឈប់បាញ់នៅប៉ែកខាងកើតអ៊ុយក្រែនដោយពួកអ្នកទាមទារផ្តាច់ទឹកដីដែលមានទំនោររករុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
គឺនៅក្នុងកិច្ចសន្ទនាតាមទូរស័ព្ទជាមួយលោកប្រធានាធិបតីរុស្ស៊ីពូទីន និងលោកស្រីនាយករដ្ឋមន្រ្តីអាល្លឺម៉ង់អង់ហ្កឺឡា មែរកិលដែលលោកប្រធានាធិបតីបារំាងហ្រ្វង់ស័រ ហូឡង់បាននិយាយប្រាប់លោកពូទីនពីក្តីបារម្ភរបស់លោកចំពោះស្ថានការណ៍វិវត្តន៍ចុងក្រោយនៅប៉ែកខាងកើតអ៊ុយក្រែន ពិសេសគឺការរំលោភបទឈប់បាញ់ពីភាគីពាក់ព័ន្ធ។ ទន្ទឹមគ្នានេះ លោកហូឡង់ក៏បានប្រាប់លោកពូទីនជាថ្មីអំពីជំហររបស់បារាំងដែលមិនទទួលស្គាល់ការផ្តាច់យកទឹកដីគ្រីមេរបស់អ៊ុយក្រែនពីរុស្ស៊ី។
នៅក្នុងកិច្ចសន្ទនាតាមទូរស័ព្ទដដែល ប្រមុខរដ្ឋបារាំងក៏បានព្រមានទុកជាមុនពីការផ្ទុះសង្រ្គាមជាយថាហេតុ និងបានអំពាវនាវជាថ្មីឲ្យគ្រប់ភាគីពាក់ព័ន្ធគោរពតាមកិច្ចព្រមព្រៀងទីក្រុងមីនស្កិ៍។ ជាចម្លើយតបនឹងលោកហូឡង់វិញ លោកពូទីនបានបរិហាររដ្ឋាភិបាលអ៊ុយក្រែនដែលបានបញ្ជូនក្រុមភេរវជនអ៊ុយក្រែនឲ្យទៅបង្កភេរវកម្មក្នុងទឹកដីគ្រីមេកាលពីដើមខែសីហា។ លោកពូទីនបានចាត់ទុកទង្វើរបស់អ៊ុយក្រែនថា ជាការរំលោភបំពានលើដំណោះស្រាយវិបត្តិអ៊ុយក្រែនដោយសន្តិវិធី និងរំលោភលើកិច្ចព្រមព្រៀងសហប្រតិបត្តិការណ័រម៉ង់ឌី។
កិច្ចព្រមព្រៀងសហប្រតិបត្តិការណ័រម៉ង់ឌី គឺជាកិច្ចព្រមព្រៀងដែលអនុម័តដោយបារាំង រុស្ស៊ី អាល្លឺម៉ង់ និងអ៊ុយក្រែនក្នុងគោលដៅស្វែងរកដំណោះស្រាយឲ្យជម្លោះរវាងរដ្ឋាភិបាលអ៊ុយក្រែន និងក្រុមឧទ្ទាមទាមទារផ្តាច់ទឹកដីនិយមនៅប៉ែកខាងកើតមានទំនោររករុស្ស៊ី។ យ៉ាងណាក៏ដោយ និងដើម្បីជួយផ្តល់សន្ទុះបន្ថែមទៀតនៅក្នុងដំណោះស្រាយឲ្យវិបត្តិអ៊ុយក្រែន លោកហូឡង់ លោកពូទីន និងលោកស្រីនាយករដ្ឋមន្រ្តីអាល្លឺម៉ង់អង់ហ្កឺឡា មែរកិលបានព្រមព្រៀងជួបគ្នាជាថ្មីនៅក្នុងឱកាសជំនួបកំពូល G២០ ក្នុងទីក្រុងប៉េកាំង ប្រទេសចិននៅថ្ងៃទី៤ និងទី៥ កញ្ញាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ