បារាំងបើកអង្កេតរឿងធ្លាយទិន្នន័យសាងសង់នាវាមុជទឹក
ប្រទេសបារាំង និងឥណ្ឌា បានសម្រេចបើកអង្កេតដាច់ដោយឡែកពីគ្នា ជុំវិញការបែកធ្លាយសំណុំឯកសារជាងពីរម៉ឺនទំព័រ ទាក់ទងនឹងការសាងសង់នាវាមុជទឹក សម្រាប់លក់ទៅឱ្យឥណ្ឌា។ ជាការបែកធ្លាយដ៏សម្បើមក្រៃ ប៉ុន្តែគឺសារព័ត៌មានអូស្ត្រាលី ជាអ្នកបង្ហើបឱ្យដឹងមុនគេអំពីការធ្លាយទិន្នន័យជាទ្រង់ទ្រាយធំនេះ។
ចុះផ្សាយនៅថ្ងៃ៖
ស្តាប់ - ០១:៥៤
កាសែត The Australian បានបង្ហើបនៅថ្ងៃពុធនេះថា មានឯកសារជាងពីរម៉ឺន២ពាន់បួនរយទំព័រ រៀបរាប់អំពីសមត្ថភាពប្រយុទ្ធដ៏សម្ងាត់របស់នាវាមុជទឹកបារាំង Scorpène ទាំង៦ ដែលកំពុងសាងសង់នៅក្នុងការដ្ឋានឥណ្ឌា នាទីក្រុងប៊ុមបេ។ ឯកសារនេះបានធ្លាយចេញមកក្រៅ តាំងពីឆ្នាំ២០១១។ នៅក្នុងសម្រង់អត្ថបទដែលមានចុះផ្សាយក្នុងទំព័រវិបសៃត៍The Australian គេឃើញមានព័ត៌មានរសើបៗជាច្រើន ដូចជាសៀវភៅពន្យល់ពីរបៀបប្រើប្រាស់ ឬពីអង់តែន របស់នាវាមុជទឹក ...
អាជ្ញាធរបារាំងបានបដិសេធមិនធ្វើអត្ថាធិប្បាយអ្វីទេ។ ប៉ុន្តែបើតាមប្រភពសិទ្ធនឹងសំណុំរឿងនេះ ខ្លឹមសារនៃឯកសារបែកធ្លាយមានទម្រង់រសើបបន្តិចមែន ប៉ុន្តែមិនធ្ងន់ធ្ងរ និងគ្មានលក្ខណៈសម្ងាត់ទេ។ អ្នកនាំពាក្យក្រុមហ៊ុនសាងសង់នាវាមុជទឹក DCNS មិនច្រានចោលសេណារីយ៉ោ “សង្គ្រាមសេដ្ឋកិច្ច”ទេ បើយោលទៅលើភាពប្រកួតប្រជែងគ្នានាពេលបច្ចុប្បន្ន ហេតុដូច្នេះហើយបានជាក្រុមហ៊ុនបានស្នើសុំឱ្យគ្រប់គ្នារង់ចាំលទ្ធផលអង្កេតរបស់អាជ្ញាធរសិន ទើបអាចកំណត់អំពីធាតុពិតនៃឯកសារ និងការទទួលខុសត្រូវបាន។
ចំណែករដ្ឋមន្ត្រីក្រសួងការពារជាតិឥណ្ឌាក៏បានប្រកាសបើកអង្កេតដែរ តែលោកបានគូសបញ្ជាក់ភ្លាមថា ប្រភពនៃធ្លាយឯកសារទំនងជានៅបរទេស មិនមែននៅឥណ្ឌាទេ និងទំនងជាមានការចូលលួចតាមប្រព័ន្ធព័ត៌មានវិទ្យា។
យ៉ាងណាក៏ដោយ ក៏ដំណឹងធ្លាយឯកសារនេះមិនមែនជាប្រការល្អសម្រាប់បារាំងឡើយ ព្រោះវាធ្លាក់មកជួនចំពេលបារាំងកំពុងស្វែងរកកិច្ចសន្យាសាងសង់នាវាមុជទឹកឱ្យន័រវែសនិងប៉ូឡូញ។ ដំណឹងនេះក៏អាចធ្វើឱ្យប៉ះពាល់ដល់រូបភាពបារាំងផ្នែកសាងសង់នាវាមុជទឹក ដែលទើបបានអួតអាងប្រាប់អូស្ត្រាលីពីភាពល្អប្រសើរនៃឧស្សាហកម្មបារាំង រហូតអូស្ត្រាលីសន្យាព្រមព្រៀងបញ្ជាទិញនាវាមុជទឹកបារាំង ១២គ្រឿង តែម៉ូដែលខុសពីនាវាមុជទឹកឥណ្ឌា ក្នុងទំហំទឹកប្រាក់ ៣៤ពាន់លានអឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ