ហេតុអ្វីបានជាប្រតិបត្តិការផ្លូវអាកាសរបស់រុស្ស៊ីពីទឹកដីអ៊ីរ៉ង់នៅស៊ីរីរហ័សបិទបញ្ចប់ម្ល៉េះ?
ចុះផ្សាយនៅថ្ងៃ៖
ស្តាប់ - ០៥:០០
បន្ទាប់ពីបានបើកការវាយប្រហារពេញមួយសប្តាហ៍មក ប្រតិបត្តិការផ្លូវអាកាសរបស់រុស្ស៊ីទៅលើប្រទេសស៊ីរីពីមូលដ្ឋានទ័ពអ៊ីរ៉ង់បានបិទបញ្ចប់ក្នុងថ្ងៃចន្ទ ទី២២ សីហា។ សូមជម្រាបជូនថា តាំងពីក្រោយបដិវត្តន៍អ៊ីស្លាមនៅអ៊ីរ៉ង់ក្នុងឆ្នាំ ១៩៧៩ និងតាំងពីស៊ីរីបានធ្លាក់ក្នុងវិបត្តិហែកហួរគ្នាជាង ៥ឆ្នាំមក នេះជាលើកទី ១ ដែលអ៊ីរ៉ង់បានបើកមូលដ្ឋានយោធារបស់ខ្លួនឲ្យប្រទេសបរទេសមួយប្រើប្រាស់។ តែសំណួរដែលកំពុងចោទពេលនេះគឺថា ហេតុអ្វីបានជាប្រតិបត្តិការផ្លូវអាកាសរបស់រុស្ស៊ីពីទឹកដីអ៊ីរ៉ង់នៅស៊ីរីរហ័សបិទបញ្ចប់ម្ល៉េះ?
សម្រាប់ប្រទេសរុស្ស៊ីគឺច្បាស់ណាស់ ការដែលខ្លួនបានបិទបញ្ចប់យ៉ាងទាន់ហន់នូវបេសកកម្មផ្លូវអាកាសវាយប្រហារអង្គការរដ្ឋអ៊ីស្លាមក្នុងប្រទេសស៊ីរីដោយប្រើមូលដ្ឋានទ័ពអ៊ីរ៉ង់ពេលនេះ ដោយសារតែអ្វីៗបានទទួលជោគជ័យដូចការគ្រោងទុក។ អ្វីដែលក្រុងមូស្គូចង់និយាយនោះគឺថា ផ្ទាំងស៊ីបនៃការវាយប្រហាររបស់ខ្លួនបានសម្រេចហើយ តើមានហេតុផលអ្វីដែលយន្តហោះចម្បាំងរុស្ស៊ីត្រូវបន្តស្ថិតក្នុងទឹកដីអ៊ីរ៉ង់ទៀតនោះ។ តែបញ្ហានៅត្រង់ថា ការពិតជាក់ស្តែងមិននៅបន្តស្រពិចស្រពិលដដែល។ អ្វីដែលគេដឹង នៅ ២ថ្ងៃក្រោយការផ្តើមប្រតិបត្តិការផ្លូវអាកាសរបស់រុស្ស៊ីនៅស៊ីរីពីមូលដ្ឋានទ័ពអ៊ីរ៉ង់ហាម៉ាដានក្នុងថ្ងៃទី១៦ សីហា មានផ្ទុះចេញនូវប្រតិកម្មមិនសប្បាយចិត្តពីមជ្ឈដ្ឋានមហាជនអ៊ីរ៉ង់ រួមទាំងក្រុមសមាជិកសភាអ៊ីរ៉ង់ជាច្រើនរូបផង។
គឺផ្តើមចេញពីប្រតិកម្មក្តៅក្រហាយនៅអ៊ីរ៉ង់នេះហើយដែលបានជំរុញរដ្ឋាភិបាលទីក្រុងតេហេរ៉ង់ឲ្យផ្អាកការផ្តល់មូលដ្ឋានយោធាហាម៉ាដានឲ្យរុស្ស៊ីប្រើប្រាស់នៅពេលនេះ។ អ្នកនាំពាក្យក្រសួងការពារជាតិរុស្ស៊ីមិនបានបញ្ជាក់ពីហេតុផលផ្លូវការលើសេចក្តីសម្រេចចិត្តរបស់អ៊ីរ៉ង់ដែលឈប់ឲ្យរុស្ស៊ីប្រើប្រាស់មូលដ្ឋានយោធាហាម៉ាដានទេ តែគ្រាន់អះអាងថា ការប្រើប្រាស់មូលដ្ឋានយោធាអ៊ីរ៉ង់ហាម៉ាដាននាពេលអនាគតនឹងត្រូវធ្វើឡើងដោយផ្អែកលើមូលដ្ឋាននៃកិច្ចព្រមព្រៀងទ្វេភាគីនៅក្នុងក្របខ័ណ្ឌនៃយុទ្ធនាការប្រយុទ្ធប្រឆាំងអំពើភេរវកម្ម និងផ្អែកលើស្ថានការណ៍ជាក់ស្តែងនៅក្នុងប្រទេសស៊ីរី។
ចំណែកអ្នកនាំពាក្យក្រសួងការបរទេសអ៊ីរ៉ង់វិញបាននិយាយធានាថា កិច្ចសហប្រតិបត្តិការរវាងរុស្ស៊ី និងអ៊ីរ៉ង់ទាក់ទងនឹងមូលដ្ឋានយោធាហាម៉ាដានគ្រាន់តែជាកិច្ចសហប្រតិបត្តិការបណ្តោះអាសន្ន និងមានការសហការណ៍គ្នាច្បាស់លាស់។ បន្ទាប់មកទៀត លោករដ្ឋមន្រ្តីក្រសួងការពារជាតិអ៊ីរ៉ង់បានបញ្ជាក់តាមទូរទស្សន៍ជាសាធារណៈថា យុទ្ធនាការវាយប្រហារផ្លូវអាកាសរបស់រុស្ស៊ីទៅលើស៊ីរីដោយប្រើមូលដ្ឋានយោធាអ៊ីរ៉ង់បានបង្កប់ដោយភាពក្រអឺតក្រទមរបស់ក្រុងមូស្គូ។ អ្វីដែលរដ្ឋមន្រ្តីការពារជាតិអ៊ីរ៉ង់រូបនេះដដែលចង់និយាយនោះ គឺការដែលរុស្ស៊ីចង់ដើរតួជាមហាអំណាចតែម្នាក់ឯងនៅលើសមរភូមិស៊ីរី មុននឹងសារភាពត្រង់ៗថា អ៊ីរ៉ង់បានយល់ព្រមប្រគល់មូលដ្ឋានយោធាហាម៉ាដានឲ្យរុស្ស៊ីប្រើប្រាស់ដោយមិនបានធ្វើកិច្ចព្រមព្រៀងជាលាយលក្ខណ៍អក្សរជាផ្លូវការទេ។
ផ្តើមចេញពីប្រតិកម្មទាំងអស់ខាងលើនាំឲ្យមានសំណួរចោទឡើងថា តើការពិតវាយ៉ាងម៉េចខ្លះទៅ?។
រហូតមកដល់ពេលនេះ នៅមិនទាន់មានចម្លើយច្បាស់លាស់អ្វីទេ អ្វីដែលគេដឹង ប្រតិកម្មទាំងអស់បានកើតមានឡើង បន្ទាប់ពីមានក្រុមតំណាងរាស្ត្រអ៊ីរ៉ង់ប្រមាណជា ២០នាក់បានស្នើឲ្យសភាបើកកិច្ចប្រជុំបន្ទាន់មួយដើម្បីដេញដោលរកការពិត។ យ៉ាងណាក៏ដោយ គេពិបាកនឹងជជែកដេញដោលរកមូលហេតុដែលរដ្ឋាភិបាលបានបើកមូលដ្ឋានយោធាហាម៉ាដានឲ្យរុស្ស៊ីប្រើប្រាស់។ គួរបញ្ជាក់ជូនថា នេះជាលើកទី១ តាំងពីក្រោយថ្ងៃបដិវត្តន៍អ៊ីស្លាមអ៊ីរ៉ង់ក្នុងឆ្នាំ ១៩៧៩ ដែលអ៊ីរ៉ង់បានអនុញ្ញាតឲ្យប្រទេសមួយប្រើប្រាស់មូលដ្ឋានទ័ពរបស់ខ្លួន។
ពិតណាស់ថា រុស្ស៊ី និងអ៊ីរ៉ង់ជាសម្ព័ន្ធមិត្តចាក់ទឹកមិនលេចរបស់រដ្ឋាភិបាលស៊ីរីសព្វថ្ងៃ ហើយគឺវិបត្តិនយោបាយអូសបន្លាយនៅស៊ីរីតាំងពីជាង ៥ឆ្នាំកន្លងទៅនេះឯងដែលបានធ្វើឲ្យទំនាក់ទំនងរវាងក្រុងមូស្គូ និងតេហេរ៉ង់ខិតជិតចូលគ្នាកាន់តែខ្លាំង។ តែបើគេពិនិត្យមើលជាលក្ខណៈប្រវត្តិសាស្រ្តវិញ រុស្ស៊ី និងអ៊ីរ៉ង់នៅបន្តរក្សាទំនាក់ទំនងរកាំរកូស ពោលមិនមែនរលូនដូចគ្រប់គ្នាបានគិតនោះទេ ពិសេសគឺរុស្ស៊ីដែលហាក់មិនសូវមានជំនឿទុកចិត្តលើអ៊ីរ៉ង់។ រឿងរ៉ាវប្រវត្តិសាស្រ្តជូរចត់រវាងរុស្ស៊ី និងអ៊ីរ៉ង់ទាក់ទងជាពិសេសលើសន្ធិសញ្ញាឆ្នាំ ១៨២៨ ដែលអាណាចក្រពែស្សដែលសព្វថ្ងៃមានឈ្មោះថា អ៊ីរ៉ង់បានបាត់បង់ទឹកដីមួយភាគធំទៅក្នុងកណ្តាប់ដៃអាណាចក្ររុស្ស៊ី។ ម្យ៉ាងទៀត បដិវត្តន៍អ៊ីស្លាមនៅអ៊ីរ៉ង់ក្នុងឆ្នាំ ១៩៧៩ ដែលមានកម្មវត្ថុស្តារឡើងវិញនូវអធិបតេយ្យភាពប្រទេសក៏ដោយ ក៏បដិវត្តន៍អ៊ីស្លាមកាលណោះមានគោលដៅប្រឆាំងនឹងមហាអំណាចអាមេរិក អង់គ្លេស និងសហភាពសូវៀតដែរ។
ក្រៅពីរឿងរ៉ាវប្រវត្តិសាស្រ្តជូរចត់រវាងគ្នា រុស្ស៊ី និងអ៊ីរ៉ង់ក៏មិនមែនយល់ឃើញដូចគ្នា និងឯកភាពគ្នាគ្រប់ពេលនៅក្នុងសំណុំរឿងអន្តរជាតិផ្សេងៗ ពិសេសសំណុំរឿងនៅក្នុងតំបន់ដើមបូព៌ាទេ។ រុស្ស៊ីដែលបានរក្សាទំនាក់ទំនងជាមួយបណ្តាប្រទេសកាន់សាសនាអ៊ីស្លាមនិកាយស៊ុយនីតហាក់ដូចជាបានខិតឆ្ងាយ ឬមួយក៏ប្រយ័ត្នប្រយែងចំពោះជម្លោះរវាងសាសនាអ៊ីស្លាមរវាងនិកាយស៊ុយនីត និងនិកាយឈីអ៊ីតដែលមានអ៊ីរ៉ង់ជាមេក្លោងធំនៅក្នុងតំបន់។ ទាក់ទងនឹងជម្លោះផ្ទៃក្នុងនៅយេម៉ែនវិញ រុស្ស៊ីបន្តមិនលូកដៃ ចំពេលដែលអ៊ីរ៉ង់បានលូកដៃយ៉ាងជ្រៅ។ តែនៅក្នុងកាលៈទេសៈបច្ចុប្បន្ន រុស្ស៊ី និងអ៊ីរ៉ង់គ្មានជម្រើសផ្សេងក្រៅពីចាប់ដៃគ្នា ទោះបីជាអ៊ីរ៉ង់ដឹងថា រុស្ស៊ីមិនស្មោះនឹងខ្លួន ១០០% ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ