បារាំងព្រមានតួកគីពីការប៉ុនប៉ងលូកដៃក្នុងសំណុំរឿងគួដឌីស្ថាននៅស៊ីរី
នៅថ្ងៃសៅរ៍ ទី២៧ សីហា ប្រទេសបារាំងតាមរយៈលោករដ្ឋមន្រ្តីការបរទេសហ្សង់ម៉ាក អេរ៉ូបានថ្លែងសាទរចំពោះការចូលរួមរបស់ប្រទេសតួកគីនៅក្នុងយុទ្ធនាការប្រយុទ្ធប្រឆាំងនឹងពួកជីហាតអង្គការរដ្ឋអ៊ីស្លាមក្នុងប្រទេសស៊ីរី។ តែទន្ទឹមនឹងការសាទរ លោកប្រមុខការទូតបារាំងបានព្រមានទីក្រុងអង់ការ៉ាពីការប៉ុនប៉ងលូកដៃចូលដោះស្រាយបញ្ហាប្រជាជនកួដឌីស្ថានរស់ក្នុងទឹកដីស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
គឺតាមរយៈការផ្តល់បទសម្ភាសន៍ឲ្យកាសែតបារាំងប្រចាំថ្ងៃមួយឈ្មោះ Le Monde ដែលលោកប្រមុខការទូតបារាំងហ្សង់ម៉ាក អេរ៉ូបានថ្លែងថា វាពិតជារឿងល្អណាស់ដែលតួកគីបានបើកការវាយប្រហារយ៉ាងចាស់ដៃលើពួកជីហាតអង្គការរដ្ឋអ៊ីស្លាមនៅក្នុងប្រទេសស៊ីរី និងថា អ្វីដែលតួកគីកំពុងធ្វើនេះពិតជារឿងស្របច្បាប់ដែលតួកគីត្រូវធានាសន្តិសុខ និងសុវត្ថិភាពនៅតាមបណ្តោយព្រំដែនខ្លួនជាមួយស៊ីរី។ តែទន្ទឹមនឹងការសាទរ ប្រមុខការទូតបារាំងរូបនេះដដែលមិនភ្លេចរម្លឹកប្រាប់តួកគីដោយព្រមានចំៗ កុំឲ្យព្យាយាមភ្ជាប់រឿងយុទ្ធនាការវាយប្រហារអង្គការរដ្ឋអ៊ីស្លាមទៅនឹងបញ្ហាគួដឌីស្ថានរស់នៅក្នុងទឹកដីស៊ីរី។
សូមជម្រាបជូនថា កាលពីថ្ងៃពុធ ទី២៤ សីហា កងទ័ពតួកគីបានបើកការវាយប្រហារក្រោមទ្រង់ទ្រាយធំលើពួកជីហាតអង្គការរដ្ឋអ៊ីស្លាមក្នុងទឹកដីស៊ីរី និងក៏មានគោលដៅទប់ស្កាត់កម្លាំងប្រដាប់អាវុធគួដឌីស្ថានស៊ីរីកុំឲ្យរំកិលទៅក្បែរព្រំដែនរបស់ខ្លួនដែរ។ ក្រោមភ្នែក ច្រមុះរបស់ទីក្រុងអង់ការ៉ា កម្លាំងប្រដាប់អាវុធគួដឌីស្ថានស៊ីរីជាដៃគូរបស់គណបក្សពលករគួដឌីស្ថាន PKK នៅតួកគីដែលតួកគីចាត់ទុកជាចលនាភេរវកម្ម។ តាមក្រុមអ្នកជំនាញ កម្មវត្ថុវាយប្រហាររបស់កម្លាំងតួកគីនៅស៊ីរីមានបំណងទប់ស្កាត់កុំឲ្យពួកគួដឌីស្ថាននៅស៊ីរីអាចបង្កើតតំបន់ស្វយ័តរបស់គេក្នុងទឹកដីស៊ីរី។
លោកប្រមុខការទូតបារាំងហ្សង់ម៉ាក អេរ៉ូបានគូសបញ្ជាក់ថា លោកថ្កោលទោសលើទង្វើភេរវកម្មដែលពួក PKK បានប្រព្រឹត្តិនៅក្នុងទឹកដីតួកគីនាពេលកន្លងមក តែពួកគួដឌីស្ថាននៅស៊ីរីមិនមែនស្ថិតក្នុងក្រុម PKK និងថែមទាំងបានចូលរួមវាយប្រហារពួកជីហាតអង្គការរដ្ឋអ៊ីស្លាមប្រកបដោយប្រសិទ្ធិភាពទៀតផង។ គួរបញ្ជាក់ជូនថា កម្លាំងប្រដាប់អាវុធគួដឌីស្ថាននៅស៊ីរីបានទទួលការគាំទ្រយ៉ាងពេញទំហឹងពីបស្ចិមលោក ពិសេសពីអាមេរិកដែលបានចាត់ទុកជាក្រុមយុទ្ធជនឆ្នើមខាងប្រយុទ្ធតទល់នឹងអង្គការរដ្ឋអ៊ីស្លាម។
ដោយឡែកនៅក្នុងបទសម្ភាសន៍ជាមួយកាសែតបារាំងប្រចាំថ្ងៃ Le Monde ដដែល លោកហ្សង់ម៉ាក អេរ៉ូបានឆ្លៀតជំរុញរុស្ស៊ីឲ្យធ្វើការថ្កោលទោសរបបស៊ីរីរបស់លោកប្រធានាធិបតីអាសាដនៅអង្គការសហប្រជាជាតិ និងបានទាមទារឲ្យរុស្ស៊ីបញ្ឈប់ការទម្លាក់គ្រាប់បែកគាំទ្រកម្លាំងរបស់របបលោកអាសាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ