អាល្លឺម៉ង់៖ឃាត់ខ្លួនជនជាតិស៊ីរី ៣នាក់ដែលមានជាប់ពាក់ព័ន្ធនឹងភេរវកម្មនៅប៉ារីស
នៅក្នុងប្រទេសអាល្លឺម៉ង់ លោករដ្ឋមន្រ្តីក្រសួងមហាផ្ទៃ Thomas de Maizière បានប្រកាសឲ្យដឹងពីការឃាត់ខ្លួនជនជាតិស៊ីរីចំនួន ៣នាក់នៅប៉ែកខាងជើងប្រទេស។ ជនជាតិស៊ីរីទាំង ៣នាក់នោះត្រូវបានអង្គការរដ្ឋអ៊ីស្លាមបញ្ជូនចូលក្នុងទឹកដីអាល្លឺម៉ង់ដោយលួចលាក់កាលពីរដូវស្លឹកឈើជ្រុះកន្លងទៅដើម្បីរៀបចំភេរវកម្ម។ ទន្ទឹមគ្នានេះ លោក Thomas ក៏បានលើកឡើងពីចំណងទាក់ទងគ្នារវាងជនជាតិស៊ីរីទាំង ៣នាក់ និងភេរវជនមួយចំនួនដែលបានបង្កភេរវកម្មក្នុងទីក្រុងប៉ារីសកាលពីខែវិច្ឆិកា ឆ្នាំ ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៥
ការឃាត់ខ្លួនបានបុរសទាំង ៣នាក់ត្រូវបានធ្វើឡើងនៅក្នុងប្រតិបត្តិការក្រោមទ្រង់ទ្រាយធំរបស់កម្លាំងប៉ូលិសអាល្លឺម៉ង់ប្រមាណជា ២០០នាក់នាថ្ងៃអង្គារ ទី១៣ កញ្ញានៅប៉ែកខាងជើងប្រទេសអាល្លឺម៉ង់។ នៅក្នុងប្រតិបត្តិការចូលឆែកឆេរនៅតាមអាគារស្នាក់នៅ និងទីកន្លែងស្នាក់នៅរបស់ជនភៀសខ្លួន ប៉ូលិសបានរកឃើញនៅលើខ្លួនជនសង្ស័យទាំង ៣នាក់នូវលិខិតឆ្លងដែនស៊ីរី។ ជនទាំង ៣នាក់ត្រូវបានជាប់ចោទពីបទលួចចូលក្នុងទឹកដីអាល្លឺម៉ង់ដោយខុសច្បាប់បញ្ជូនដោយអង្គការរដ្ឋអ៊ីស្លាមកាលពីរដូវស្លឹកឈើជ្រុះកន្លងទៅ។
ក្រៅពីរកឃើញលិខិតឆ្លងដែនស៊ីរី ប៉ូលិសក៏បានរកឃើញលុយដុល្លារជាច្រើនពាន់ រួមទាំងទូរស័ព្ទដៃដែលមានបំពាក់ដោយកម្មវិធីសម្រាប់ទាក់ទងផងដែរ។ លោករដ្ឋមន្រ្តីក្រសួងមហាផ្ទៃអាល្លឺម៉ង់ Thomas de Maizière បានប្រាប់ឲ្យដឹងនៅក្នុងសន្និសីទកាសែតថា ជនជាតិស៊ីរីទាំង ៣នាក់គ្មានគម្រោងរៀបចំអំពើភេរវកម្មដោយខ្លួនឯងទេ តែរង់ចាំទទួលបញ្ជាផ្ទាល់ពីអង្គការរដ្ឋអ៊ីស្លាម។ ទន្ទឹមគ្នានេះ លោក Thomas ក៏បានលើកឡើងពីចំណងទាក់ទងគ្នារវាងជនជាតិស៊ីរីទាំង ៣នាក់ និងអំពើភេរវកម្មក្នុងទីក្រុងប៉ារីស ប្រទេសបារាំងកាលពីខែវិច្ឆិកា ឆ្នាំ ២០១៥។
យោងតាមរូបលោករដ្ឋមន្រ្តីមហាផ្ទៃអាល្លឺម៉ង់ដដែល ភេរវជនអត្តឃាតចំនួន ២នាក់ដែលបានបំផ្ទុះគ្រាប់បែកនៅពីមុខពហុកីឡាដ្ឋានជាតិ Stade de France ក្នុងប្រទេសបារាំងកាលពីថ្ងៃទី១៣ វិច្ឆិកា ២០១៥ ស្ថិតនៅក្នុងក្រុមជាមួយជនជាតិស៊ីរីទាំង ៣នាក់ និងបានលួចចូលក្នុងដែនដីអឺរ៉ុបតាមបណ្តាញតែមួយដូចគ្នា។ ទន្ទឹមគ្នានេះ ក្រដាសរបស់ពួកគេក៏ប្រហែលជាបានធ្វើនៅទីកន្លែងដូចគ្នាទៀត។
ការចាប់ខ្លួនជនជាតិស៊ីរីទាំង ៣នាក់ក្នុងទឹកដីអាល្លឺម៉ង់ពេលនេះបានធ្វើឡើង បន្ទាប់ពីមានការចាប់ខ្លួនជនជាតិស៊ីរីជាច្រើននាក់ដោយប៉ូលិសអាល្លឺម៉ង់កាលពីដើមខែមិថុនាកន្លងទៅចំពេលដែលពួកគេកំពុងរង់ចាំបញ្ជាពីអង្គការរដ្ឋអ៊ីស្លាមដើម្បីបង្កភេរវកម្មក្នុងទីក្រុង Düsseldorf។ លោក Thomas បានយល់ឃើញថា អាល្លឺម៉ង់កំពុងបន្តប្រឈមនឹងហានិភ័យភេរវកម្ម តែបានច្រានចោលចំពោះពាក្យចចាមអារ៉ាមដែលថា អាល្លឺម៉ង់កំពុងចេញប្រតិបត្តិការប្រឆាំងជនភៀសខ្លួនជាលក្ខណៈទូទៅ។ តាមលោក Thomas មានការស៊ើបអង្កេតតែចំនួន ៦០ ប៉ុណ្ណោះដែលត្រូវបានធ្វើឡើងទៅលើជនភៀសខ្លួនជាច្រើនពាន់នាក់នៅក្នុងទឹកដីអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ