បារាំងបើកមណ្ឌលប្រើគ្រឿងញៀនស្របច្បាប់ជាលើកទីមួយ
ចុះផ្សាយនៅថ្ងៃ៖
ស្តាប់ - ០៤:១៤
បន្ទាប់ពីមានការតស៊ូមតិដ៏ស្វិតស្វាញ និងការប្រឆាំងដ៏ចម្រូងចម្រាសមក នៅទីបំផុត មណ្ឌលប្រើគ្រឿងញៀនបង្រួមហានិភ័យដំបូង ត្រូវបានបង្កើតនិងបើកសម្ពោធឱ្យដំណើរការ នៅក្នុងមន្ទីរពេទ្យមួយនាក្រុងប៉ារីស កាលពីថ្ងៃអង្គារ។ សម្រាប់អាជ្ញាធរបារាំង បង្កើតមណ្ឌលប្រើគ្រឿងញៀននេះ ជាចំណែកមួយនៃការប្រយុទ្ធប្រឆាំងនឹងគ្រឿងញៀន ដោយ កាត់បន្ថយគ្រោះថ្នាក់ ដូចជាការប្រើហួសកំរិត និងការចម្លងរោគ។
ប្រព្រឹត្តគ្រឿងញៀនជាទង្វើខុសច្បាប់ និងបំផ្លាញសុខភាព ប៉ុន្តែដើម្បីប្រយុទ្ធប្រឆាំងនឹងនឹងទង្វើនេះ បារាំង បានសម្រេចដើរតាមគន្លងប្រទេសជិតខាង ដូចជា អាល្លឺម៉ង់ អូស្ត្រាលី កាណាដា អេស្ប៉ាញ ដាណឺម៉ាក លុចសំបួរ ន័រវែស ហូឡង់ និងស្វីស ដោយបង្កើតឱ្យមានកន្លែងប្រើគ្រឿងញៀន សម្រាប់ទទួលអ្នកញៀនអាភៀន ពេញវ័យ។ កន្លែងនេះ មានឈ្មោះជាផ្លូវការថា បន្ទប់ប្រើគ្រឿងញៀនបង្រួមហានិភ័យ ឬកន្លែងចាក់គ្រឿងញៀន (Salle de Shoot) បើហៅតាមអ្នកប្រឆាំង។
មណ្ឌលប្រើគ្រឿងញៀននេះ អាចបើកឱ្យដំណើរការបាន ក្នុងក្របខ័ណ្ឌដកពិសោធន៍ រយៈពេល៦ឆ្នាំ ដែលមានកំណត់ដោយច្បាប់អនុម័តកាលពីខែធ្នូឆ្នាំ២០១៥។ គ្រប់ជនដែលមកប្រើប្រាស់គ្រឿងញៀននៅក្នុងសាលនេះ នឹងមិនត្រូវរងការគំរាមកំហែងចាប់ខ្លួនដោយប៉ូលិស ឬជាប់ចោទដោយតុលាការអ្វីទេ ព្រោះសមាគមន៍គ្រប់គ្រងមណ្ឌលនេះបានចុះសន្ធិសញ្ញាជាមួយនឹងក្រសួងមហាផ្ទៃនិងយុត្តិធម៌ហើយ។
ដោយយល់ថាការប្រយុទ្ធប្រឆាំងគ្រឿងញៀន មិនមែនមានច្រកតែមួយគឺលុបបំបាត់ កម្ចាត់ការជួញដូរ និងដោយហេតុតែមិនអាចបង្ខំ ឬបញ្ឈប់ពួកគេឱ្យដកខ្លួនចេញពីគ្រឿងញៀនបាន សមាគមន៍គ្រប់គ្រងមណ្ឌលក៏ដូចជារដ្ឋាភិបាល សង្ឃឹមថានឹង មណ្ឌលចាក់គ្រឿងញៀននេះ អាចជួយអ្នកញៀន គ្រប់ប្រភេទ មិនឱ្យប្រព្រឹត្តគ្រឿងញៀននៅតាមផ្លូវ នៅតាមបង្គន់សាធារណៈ ឬនៅតាមចំណតរថយន្ត ឬនៅតាមទីធ្លាផ្ទះ តែងាកមកស្វែងរកជម្រកដ៏ស្ងប់ស្ងាត់ មានអនាម័យត្រឹមត្រូវ ម្ជុលសារ៉ាងគ្មានមីក្រុប និងស្ថិតក្រោមការត្រួតពិនិត្យរបស់គិលានុបដ្ឋាកមានសមត្ថភាព ខ្លាចក្រែងមានការប្រើហួសដូស។
បើតាមក្រសួងសុខាភិបាល ស្ថានភាពអ្នកប្រើប្រាស់គ្រឿងញៀននៅបារាំងមានលក្ខណៈគួរឱ្យព្រួយបារម្ភណាស់ ព្រោះជាង១០%បានឆ្លងមេរោគអេដស៍ និងជាង៤០%ឆ្លងមេរោគរលាកថ្លើមប្រភេទC។ នេះបើតាមតួលេខឆ្នាំ២០១១។
នៅក្នុងមណ្ឌលប្រើគ្រឿងញៀននេះ គេអាចចាក់អាភៀនក៏បាន ហឺតក៏បាន។ ប៉ុន្តែអ្នកប្រើត្រូវនាំវត្ថុញៀនមកដោយខ្លួនឯង មជ្ឈមណ្ឌលផ្តល់តែសម្ភារៈនិងទីកន្លែងស្អាតគ្មានការចម្លងរោគតែប៉ុណ្ណោះ តែគ្មានឡើងការលើកទឹកចិត្ត ឬជួយជ្រោមជ្រែងឱ្យប្រើឬចាក់គ្រឿងញៀនទេ។
ដើម្បីដំណើរការ អាជ្ញាធរបារាំងត្រូវចំណាយអស់ជាង១លានពីរសែនអឺរ៉ូ ក្នុងមួយឆ្នាំៗ។ អស់ប្រាក់ច្រើន ប៉ុន្តែហេតុអ្វីរដ្ឋាភិបាលហ៊ានចំណាយ ? បើតាមបទពិសោធន៍កន្លងមកបានបង្ហាញថា ការមានកន្លែងចាក់អាភៀនត្រឹមត្រូវ បានចូលរួមចំណែកកាត់បន្ថយការចម្លងមេរោគ និងសន្តិសុខក្នុងសង្កាត់ យ៉ាងមានប្រសិទ្ធិភាព និងគួរឱ្យកត់សម្គាល់។ លទ្ធផលដំបូងគេបង្អស់គឺនៅប្រទេសស្វីស។ ស្វីស បានបើកមណ្ឌលប្រើគ្រឿងញៀន ជាលើកមួយ និងមុនគេបង្អស់នៅឆ្នាំ១៩៨៦ នៅទីក្រុង Berne។ បន្តិចក្រោយមកមាន ស្វីសរាប់ឃើញមានសាលគ្រឿងញៀនជាងមួយរយ ដែលបានបើកជាបន្តបន្ទាប់ រហូតដល់ក្រុងហ្សឺណែវក៏មានដែរ។ តុល្យការសរុបសុទ្ធតែវិជ្ជមានទាំងអស់។
នៅរ៉ូទែដាំប្រទេសហូឡង់ អាជ្ញាធរបានរៀបក្រឡាចក្រត្រង្គ ឱ្យអ្នកប្រើគ្រឿងញៀន ត្រូវចុះឈ្មោះនិងអាចទៅជក់ឬចាក់គ្រឿងញៀនតែក្នុងសង្កាត់រស់នៅរបស់ខ្លួន។ នៅពេលស្ថានភាពបានប្រសើរឡើង មណ្ឌលចាក់គ្រឿងញៀន នោះក៏បានបិទជាបណ្តើរវិញ ដោយរក្សាទុកតែមួយចំនួនតូចវិញប៉ុណ្ណោះ។
បើផ្តល់ផលវិជ្ជមានច្រើន ចុះនៅស្រុកបារាំង ហេតុអ្វីដើរយឺតជាងគេម្ល៉េះក្នុងការបើកកន្លែងប្រើគ្រឿងញៀននេះ ? នៅបារាំងការតស៊ូមតិ មានសន្ធឹកហិង្សា និងតានតឹងខ្លាំងណាស់ ព្រោះនៅក្នុងខួរក្បាលបារាំង ដំណោះស្រាយបំបាត់គ្រឿងញៀន គឺមានតែការព្យាបាល ឬដាក់ទោស។ មិនដាក់ទោស និងមិនព្យាបាលបំបាត់ការញៀន តែបែរបើតម្រង់ទិស បើកកន្លែងឱ្យអ្នកប្រើឱ្យចាក់ គឺជាទង្វើក្បត់ដែលមិនអាចទទួលយកបានឡើយ។ ជាពិសេសទៅទៀត គេត្រូវល្មើសនឹងការហាមឃាត់។ ដូច្នេះហើយទើបត្រូវការប្រើពេលវេលាយូរទើបអាចរកជម្នះផ្នត់គំនិតនេះបាន។
ការវិភាគស៊ីជម្រៅ ព្រមទាំងការសិក្សានិងបទពិសោធន៍ជាច្រើនបានបង្ហាញថា ការជួយទំនុកបំរុង ពួកគេអាចពង្រឹងឆន្ទៈអភិវឌ្ឍន៍ខ្លួនបានជាមួយនឹងការប្រើគ្រឿងញៀន តែបើទុកពួកចោល នោះពួកគេគ្មានថ្ងៃងើបរួចឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ