អ.ស.ប. ៖ ការឡើងកម្តៅនៃភពផែនដីកាន់តែធ្ងន់ធ្ងរនៅឆ្នាំ២០១៥ ដោយឧស្ម័នកាបូនិក
ឆ្នាំ២០១៥ ជាឆ្នាំដែលពិភពលោកបានសម្រេចកិច្ចព្រមព្រៀងស្តីអំពីអាកាសធាតុ ប៉ុន្តែឆ្នាំ២០១៥ដដែលនេះ គេសង្កេតឃើញថាអត្រាឧស្ម័នពុលអុកស៊ីតដឺកាបូន ឬឧស្ម័នកាបូនិកCO2 ក្នុងបរិយាកាសបានកើនឡើងជាគួរកត់សម្គាល់ជាថ្មីទៀត។ ឧស្ម័នកាបូនិក គឺជាកត្តាចំបងនៃការឡើងកម្តៅនៃភពផែនដី។ នេះបើតាមរបាយការណ៍របស់អង្គការអាកាសធាតុពិភពលោក នៃអង្គការសហប្រជាជាតិ ដែលមានទីស្នាក់ការនៅក្រុងហ្សឺណែវប្រទេសស្វីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ពេលកន្លងគេក៏ធ្លាប់ឃើញមានដែរ ករណីឧស្ម័នកាបូនិកក្នុងបរិយាកាសឡើងដល់កំរិត៤០០ppm ម្តងម្កាល ក្នុងខែខ្លះ និងកន្លែងខ្លះ ពីមុនៗមក ប៉ុន្តែនៅឆ្នាំ២០១៥នេះ ជាលើកទីមួយ បន្សំឧស្ម័នផ្ទះកញ្ចក់ បានកើនឡើងហួសកំរិត ដែលអនុញ្ញាត ពេញមួយឆ្នាំតែម្តង។ នេះបើតាមរបាយការណ៍របស់អង្គការអាកាសធាតុពិភពលោក ចុះផ្សាយក្នុងទំព័រទិន្នានុប្បវត្តប្រចាំឆ្នាំរបស់ខ្លួន ស្តីពីឧស្ម័នផ្ទះកញ្ចក់។
សម្រាប់ភ្នាក់ងាររបស់អង្គការសហប្រជាជាតិមួយនេះ ឧស្ម័នកាបូនិកជាប្រភពបញ្ហាទីមួយ និងអ្នកទទួលត្រូវក្នុងការប្រែប្រួលអាកាសធាតុ ដោយធ្វើឱ្យមានការឡើងកម្តៅនៃភពផែនដី។ ពីព្រោះឧស្ម័នកាបូនិកនេះ អាចស្ថិតនៅក្នុងខ្យល់រាប់សិបពាន់ឆ្នាំ និងកាន់យូរខ្លាំងទៀត បើនៅក្នុងទឹក។ ចុះសួរថាតើ CO2 កើតចេញមកពីណា ? CO2 មានប្រភពកើតចេញមកពីគ្រឿងចំហេះធ្យូងថ្ម និងឈើ។
ក្រៅអំពីឧស្ម័នកាបូនិក នៅមានឧស្ម័នសំខាន់ពីរមុខទៀត ដែលជាអ្នកបង្កឧស្ម័នផ្ទះកញ្ចក់ នោះគឺឧស្ម័នមេតាន CH4 ដែលក៏បានកើនឡើងខ្ពស់បំផុតដែរនៅឆ្នាំ២០១៥ និងឧស្ម័នប្រូតូស៊ីត ដាហ្សូត NO2 ដែលមាននៅក្នុងជីរ។ នាសម័យបច្ចុប្បន្ននេះ បណ្តុំអាហ្សូតបានកើនឡើង១២១% បើប្រៀបទៅនឹងឆ្នាំ១៧៥០ មុនការកកើតឧស្សាហកម្ម។
ដូច្នេះ ការប្រយុទ្ធប្រឆាំងនឹងការឡើងកម្តៅនៃភពផែនដីត្រូវផ្តើមពីការប្រយុទ្ធប្រឆាំងនឹងឧស្ម័នកាបូនិក តែពិភពលោកហាក់ដូចជាកំពុងធ្វើសកម្មភាពបញ្ច្រាសទិស ព្រោះកំរិតCO2 កើនឡើងជារៀងរាល់ឆ្នាំ។ នេះបើតាមអគ្គលេខាអង្គការអាកាសធាតុពិភពលោក ដែលបានទទួលស្គាល់ថា មានហេតុការណ៍ធម្មជាតិEl Ninoដែលបង្ក រីងស្ងួតកើតឡើងនៅឆ្នាំ២០១៥ កាត់បន្ថយសមត្ថភាពរបស់ព្រៃឈើនិងសមុទ្ទ ក្នុងស្រូបឧស្ម័នកាបូនិក ក៏មានចំណែកធ្វើបង្កើនបរិមាណCO2ដែរ ប៉ុន្តែវដ្តធម្មជាតិនោះបានកន្លងផុត តែការឡើងកម្តៅអាកាសធាតុ និងកំរិតឧស្ម័នCO2 មាននិន្នាការកើនឡើងដដែល។
អង្គការ បានទទួចបញ្ជាក់ថា ដំណោះស្រាយកាត់បន្ថយការបញ្ចេញឧស្ម័នពុលនោះ គឺត្រូវមានឆន្ទៈនយោបាយ និងសកម្មភាពពិត។ របាយការណ៍របស់ភា្នក់ងារអង្គការសហប្រជាជាតិនេះជាឯកសារបច្ចេកទេសក្នុងកិច្ចចរចានៅក្នុងសន្និសីទអន្តរជាតិស្តីពីអាកាសធាតុ COP22 ពីថ្ងៃទី ៧-១៨វិច្ឆិកា នៅទីប្រទេសម៉ារ៉ុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ