បន្ទាប់ពីអគ្គីភ័យក្នុងជំរំនៅកាឡេមក ការដឹកជម្លៀសជនអន្តោប្រវេសន៍បានចាប់ផ្តើមឡើងវិញនៅថ្ងៃពុធនេះ
នៅប្រទេសបារាំង អគ្គីភ័យជាច្រើននិងការផ្ទុះធុងហ្កាស នៅសំណង់អាណាធិបតេយ្យជនអន្តោប្រវេសន៍នៅកាឡេ បានបណ្តាលឲ្យមានអ្នករងរបួសស្រាលម្នាក់។ ក៏ប៉ុន្តអគ្គីភ័យនេះពុំបានបង្កឲ្យមានការភ័យស្លន់ស្លោនោះទេ នៅមុនពេលដែលប្រតិបត្តិការដឹកជម្លៀសជនអន្តោប្រវេសន៍ ត្រូវបានចាប់ផ្តើមឡើងវិញនៅថ្ងៃពុធនេះក្នុងបរិយាកាសស្ងប់ស្ងាត់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ប្រមុខប៉ូលីសនៅតំបន់Pas-de-Calais បានពន្យល់ប្រាប់ដល់ទីភ្នាក់ងារព័ត៌មានបារាំងAFPថា” អគ្គីភ័យនេះ “ជាបាតុភាពមួយដែលមានតាំងពីយូរលង់មកហើយ” ជាពិសេស មានសហគមន៍ខ្លះៗ បានដុតចោលលំនៅរបស់ខ្លួននៅមុនពេលចាកចេញពីកន្លែងរស់នៅរបស់ពួកគេ។
បាតុភាពនេះ ធ្លាប់កើតមានកាលពីខែមីនាមុនដែរ នៅពេលមានការកំទេចបំផ្លាញសំណង់អាណាធិបតេយ្យនៅតំបន់ភាគខាងត្បូងប្រទេសបារាំង។ ដើម្បីប្រយុទ្ធបង្រ្កាបអគ្គីភ័យទាំងនេះ មេប៉ូលីស បានបញ្ជារឲ្យកែណ្ឌកម្លាំងអ្នកលត់ភ្លើងផងនិងកងប៉ូលីសផងដើម្បីជួយការពារសុវត្ថិភាពដល់ក្រុមអ្នកពន្លត់ភ្លើងក្នុងពេលបំពេញការងាររបស់ពួកគេ។
រីឯ“អ្នករងរបួសម្នាក់នៅក្នុងគ្រោះអគ្គីភ័យ ក៏ត្រូវបានគេដឹកបញ្ជូនទៅកាន់មន្ទីរពេទ្យហើយ ដោយសារគេត្រូវរងរបួសនៅក្រដាសត្រចៀក”នេះជាការបញ្ជាក់បន្ថែមរបស់មេប៉ូលីស។
សូមបញ្ជាក់ថា តាំងពីព្រលប់ថ្ងៃអង្គារម្សិលមិញ អគ្គីភ័យជាច្រើន ត្រូវបានគេដុតនៅក្នុងជំរំជនអន្តោប្រវេស្តន៍ ខណៈពេលដែលគេកំពុងផ្តើមដឹកជម្លៀសជនអន្តោប្រវេសន៍តាំងពីថ្ងៃច័ន្ទមក។ប៉ុន្តែអគ្គីភ័យចុងក្រោយ បានរីករាលដាលយ៉ាងខ្លាំងនៅរវាងជាងពាក់កណ្តាលអធ្រាត្រម្សិលមិញនិងនៅម៉ោង៣ទៀបភ្លឺនាថ្ងៃពុធនេះ ជាពិសេសនៅតំបន់ពាណិជ្ជកម្មត្រង់ច្រកចូលជំរំអន្តោប្រវេសន៍-នេះជាការបញ្ជាក់បន្ថែមរបស់ប្រមុខនគរបាលតំបន់កាឡេ។
ក៏ប៉ុន្តែ អគ្គីភ័យទាំងអស់នេះ ត្រូវ បានគេបង្ក្រាបរួចរាល់ហើយដែរ។ ក្នុងរយៈពេលតែ២ថ្ងៃប៉ុណ្ណោះ ជនអន្តោប្រវេសន៍ចំនួនជាង ៤០០០នាក់ ត្រូវបានគេរកទីកន្លែងឲ្យស្នាក់នៅរួចហើយដែរ។ ហើយយោងតាមរដ្ឋាភិបាលបារាំង ក្រុមជនអន្តោប្រវេសន៍វ័យធំចំនួន ៣ ២៤២នាក់ បានចាកចេញពីជំរំហើយ តាមរថយន្តដឹកអ្នកដំណើរឆ្ពោះទៅកាន់មជ្ឈមណ្ឌលនានានៅក្នុងប្រទេសបារាំងដែលគេបានរៀបចំទុកសម្រាប់ទទួលឲ្យជនអន្តោប្រវេស្តន៍ស្នាក់នៅនិងដើម្បីជួយតម្រង់ទិសដៅដល់ពួកគេផងដែរ។
រីឯក្មេងនៅពុំទាន់ពេញវ័យ ចំនួន ៧៧២នាក់ ត្រូវបានដឹកយកទៅដាក់នៅមជ្ឈមណ្ឌលទទួលយកជនអន្តោប្រវេសន៍ជាបណ្តោះអាសន្នសិន។ រីឯការឈូសឆាយខ្ទមជម្រកនានានៅតំបន់កាឡេ ត្រូវបានចាប់ផ្តើមធ្វើតាំងពីថ្ងៃអង្គារម្សិលមិញនិងក៏ប្រហែលជាត្រូវបន្តធ្វើនៅថ្ងៃពុធនេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ