អាល្លឺម៉ង់ ចោទរុស្ស៊ីជាអ្នកវាយប្រហារអ៊ីនធ័រនែត
បន្ទាប់ពីអាមេរិក ដល់វេនអាល្លឺម៉ង់ម្តង ដែលធ្វើការចោទប្រកាន់រុស្ស៊ី ក្នុងសកម្មភាពវាយប្រហារតាមអ៊ីនធ័រនែត។ លោកស្រីប្រមុខរដ្ឋាភិបាលអាល្លឺម៉ង់ អង់ហ្គឺឡា មែរកិល បានអះអាងនៅថ្ងៃអង្គារនេះ ថា មានការវាយប្រហារតាមអ៊ីនធ័រនែតជាច្រើន ជាស្នាដៃរបស់រុស្ស៊ី ចង់មករំខានអាល្លឺម៉ង់ជិតបោះឆ្នោត។ ដូច្នេះអាល្លឺម៉ង់ ត្រូវរៀនរស់ដោយប្រឈមនឹងការវាយប្រហារតាមអ៊ីនធ័រនែត ដែលមានស្ទើរជារៀងរាល់ថ្ងៃ។
ចុះផ្សាយនៅថ្ងៃ៖
អាល្លឺម៉ង់ សង្ស័យថា ការវាយប្រហារតាមអ៊ីនធ័រនែត កាន់តែច្រើនឡើងៗនារយៈពេលចុងក្រោយនេះ គឺជាស្នាដៃរបស់ម៉ូស្គូ ដែលចង់បង្កអស្ថិរភាពនយោបាយរបស់អឺរ៉ុប និយាយជារួម និងជាពិសេសប្រទេសអាល្លឺម៉ង់ ព្រោះនៅសល់មិនដល់មួយឆ្នាំទៀតទេ អាល្លឺម៉ង់នឹងត្រូវរៀបចំការបោះឆ្នោតសភា !
ការវាយប្រហារតាមអ៊ីនធ័រនែត បានដៅមហាអំណាចទីមួយរបស់អឺរ៉ុប កាលពីម្សិលមិញ ដោយបានធ្វើឱ្យក្រុមហ៊ុនទូរគមនាគមន៍ដ៏ធំរបស់អាល្លឺម៉ង់ ជួបភាពរអាក់រអួលយ៉ាងខ្លាំង។ ពលរដ្ឋអាល្លឺម៉ង់ជាងមួយលាននាក់ គ្មានប្រព័ន្ធអ៊ីនធ័រនែតប្រើប្រាស់ តាំងពីថ្ងៃអាទិត្យមក។ ថ្វីបើអាល្លឺម៉ង់ពុំទាន់ចោទប្រកាន់នរណាជាផ្លូវការចំពោះការវាយប្រហារអ៊ីនធ័រនែតម្សិលមិញនេះមែន តែភ្នាក់ងារសន្តិសុខបានរកឃើញកម្មវិធីវាយលុកMirai ផលិតដោយក្រុមចោររុស្ស៊ីSofacy។ កម្មវិធីនេះអាចចូលទៅរំខានប្រព័ន្ធអ៊ីនធ័រនែតតាមផ្ទះ ប្រព័ន្ធថតវីដេអូ កាមេរ៉ាសុវត្ថិភាព ឯកជន និងជាទ្រង់ទ្រាយធំដូចដែលគេធ្លាប់វាយប្រហារវិបសៃត៍សភាអាល្លឺម៉ង់ កាលពីឆ្នាំ២០១៥ ដែលជាស្នាដៃរបស់រុស្ស៊ី។
លោកស្រី អង់ហ្គឺឡា មែរកិល មិនចោទរុស្ស៊ីដោយចំមែននៅថ្ងៃនេះ តែលោកស្រីប្រមុខរដ្ឋាភិបាល បានអំពាវនាវឱ្យអាល្លឺម៉ង់ចេះប្រុងប្រយ័ត្ន និងចេះរស់ប្រឈមនឹងការវាយប្រហារអ៊ីនធ័រនែតមកពីរុស្ស៊ី ដែលមានស្ទើរជារៀងរាល់ថ្ងៃ។ សម្រាប់លោកស្រីប្រមុខរដ្ឋាភិបាល ការវាយការប្រហារមានកាន់ខ្លាំងតាមប្រព័ន្ធអ៊ីនធ័រនែត តែមិនមែនការរំខាន ហើយគេត្រូវចេះធ្វើនយោបាយជាមួយនឹងការវាយប្រហារតាមអ៊ីនធ័រនែត។
សូមបញ្ជាក់ថា អាល្លឺម៉ង់ ធ្លាប់បានធ្វើការចោទប្រកាន់រុស្ស៊ី ជាញយដងមកហើយ នារយៈពេលប៉ុន្មានខែនេះ ថាជាអ្នកនៅពីក្រោយក្រុមចោរអ៊ីនធ័រនែត។ ជាការវាយប្រហារនិងលួចចូលក្នុងប្រព័ន្ធព័ត៌មានវិទ្យាអឺរ៉ុប ដោយដៅលើសភាអាល្លឺម៉ង់ផង លើបក្សនយោបាយផង។ លោកស្រី មែរកិល ដែលបានសម្រេចឈរឈ្មោះជាលើកទីបួន ក៏ធ្លាប់បានព្រមានរួចហើយអំពីចេតនារុស្ស៊ីក្នុងការបំពុលព័ត៌មាន និងវាយប្រហារតាមអ៊ីនធ័រនែតទាក់ទងនឹងការបោះឆ្នោតសភាអាល្លឺម៉ង់ឆ្នាំ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ