កូនសិស្សបារាំងជាប់ចំណាត់ថ្នាក់ក្រោយគេខាងគណិតនិងវិទ្យាសាស្ត្រ
ចុះផ្សាយនៅថ្ងៃ៖
ស្តាប់ - ០៤:២១
ជាប់លេខប៉ូចគេ ខាងគណិតវិទ្យា ជាប់លេខបន្ទាប់ផុត លើមុខវិជ្ជាវិទ្យាសាស្ត្រ ! នេះហើយជាចំណាត់ថ្នាក់ទូទៅរបស់សិស្សបារាំង បើប្រៀបទៅនឹងបណ្តាប្រទេសនៅក្នុងសហភាពអឺរ៉ុប។ នៅចំពោះមុខលទ្ធផលចុងកន្ទុយគេ ដែលពិបាកទទួលយកបំផុតនេះ លោកស្រីរដ្ឋមន្ត្រីក្រសួងអប់រំ បានស្រែកបន្ទោសរដ្ឋាភិបាលមុន ថាបានធ្វើកំណែទម្រង់ដើម្បីប្រយោជន៍នយោបាយ តែបានបូជាសិស្សអស់មួយជំនាន់។ ចុះតើសិស្សប្រទេសណាមានកំរិតសិក្សាគណិតវិទ្យាខ្ពស់ជាងគេ ? ហេតុអ្វីបារាំងអន់ខ្លាំងម្ល៉េះ ?
កូនសិស្សថា្នក់ទីបួនបារាំង ខ្សោយគណិតវិទ្យា និងមុខវិជ្ជាវិទ្យាសាស្ត្រខ្លាំងណាស់ ! ដោយមានកំរិតចំណេះដឹងទាបជាងមធ្យមភាគអន្តរជាតិ និងអឺរ៉ុបឆ្ងាយណាស់ ! នេះបើតាមរបាយការណ៍សិក្សារបស់សមាគមន៍អន្តរជាតិផ្នែកវាយតម្លៃជោគជ័យក្នុងការសិក្សា IAE ដែលជាស្ថាប័នវិទ្យាសាស្ត្រមានទីស្នាក់ការនៅអាមេរិក បន្ទាប់ពីបានធ្វើការសិក្សាអង្កេត ធ្វើតេស្តលើសិស្សថ្នាក់ទីបួន ចំនួនរាប់សិបពាន់នាក់ នៅក្នុងប្រទេសចំនួន៤៩ ក្នុងអំឡុងរដូវផ្ការីក ក្នុងឆ្នាំសិក្សា២០១៥។
ចំណាត់ថ្នាក់ល្អជាងគេ ខាងផ្នែកគណិតវិទ្យា ពីលេខមួយដល់លេខ៥ បានធ្លាក់ទៅលើសិស្សនៃក្រុមប្រទេសនៅអាស៊ីខាងកើត គឺ សិង្ហបុរី ហុងកុង កូរ៉េខាងត្បូង តៃវ៉ាន់ និងជប៉ុន។ ប្រទេសនៅទ្វីបអឺរ៉ុប ដែលជាប់លេខល្អជាងគេ គឺប្រទេសអៀរឡង់ខាងជើង ជាតំណាងប្រទេសអឺរ៉ុបទីមួយ ដែលមានចំណាត់ខ្ពស់គេបំផុតផ្នែកគណិតវិទ្យា ដោយដណ្តើមបានចំណាត់ថ្នាក់អន្តរជាតិលេខ៦។
ចំណែកបារាំងវិញ មិនដឹងស្ថិតនៅលំដាប់ទីប៉ុន្មានទេ ព្រោះសិស្សបារាំងមិនទាំងជាប់មធ្យមភាគអន្តរជាតិផង។ ហើយបើគិតតែក្នុងរវង្វង់សហភាពអឺរ៉ុប បារាំងស្ថិតនៅលំដាប់បន្ទាប់ប៉ូច ដោយឈ្នះតែប្រទេសស្លូវានីមួយប៉ុណ្ណោះ ខណៈដែលប្រទេសជិតខាង អៀរឡង់ខាងជើង អៀរឡង់ និងអង់គ្លេស ឡើងតារាងកិត្តិយស។
ខាងផ្នែកវិទ្យាសាស្ត្រវិញ ប្រទេសនៅអាស៊ីទាំង៥ដែលរៀបរាប់ខាងលើ នៅតែនាំមុខគេរក្សាចំណាត់៥ដំបូងដដែល តែចំពោះមុខវិជ្ជានេះ រុស្ស៊ីបានឡើងជាប់លេខ៦។ ហ្វាំងឡង់ ជាប្រទេសលេខមួយរបស់អឺរ៉ុប ស្ថិតនៅលំដាប់លេខ៧។ ឯបារាំងវិញ គ្មានភ្ញាក់ផ្អើល ស្ថិតចុងប៉ូចគេដដែល គ្រាន់បើជាងប្រទេសស៊ីបមួយតែប៉ុណ្ណោះ។
សមាគមន៍បានរៀបចំធ្វើការសិក្សាផ្តល់ចំណាត់ថ្នាក់បែបនេះ ជារៀងរាល់ឆ្នាំ តាំងពីឆ្នាំ១៩៩៥មក ប៉ុន្តែបារាំងទើបចូលរួមជាលើកទីមួយនៅឆ្នាំ២០១៥នេះប៉ុណ្ណោះ។ ហើយនៅសប្តាហ៍ក្រោយ អង្គការអន្តរជាតិមួយទៀត ដ៏ល្បីឈ្មោះ ក៏នឹងត្រូវផ្សព្វផ្សាយការវាយតម្លៃកំរិតសិក្សានៅសាលាបឋមសិក្សា មុនការធ្វើកំណែទម្រង់ច្បាប់ និងកម្មវិធីសិក្សានៅបឋមនិងអនុវិទ្យាល័យ ស្នើឡើងដោយរដ្ឋាភិបាលរបស់លោកហ្វ្រង់ស័រ ហូឡង់។ ប៉ុន្តែក៏ទំនងជានឹងផ្តល់លទ្ធផលប្រហាក់ប្រហែលនឹងរបាយការណ៍របស់សមាគមន៍ IAE ដែរ។
ចុះហេតុអ្វីបានជាសិស្សបារាំងមានកំរិតសិក្សាខ្សោយជាងគេខ្លាំងម្ល៉េះ ?
ដោយគ្មានបង្អង់ រដ្ឋមន្ត្រីក្រសួងអប់រំ លោកស្រី ណាហ្សា វ៉ាឡូ-បែលកាសឹម ដ៏ក្មេងខ្ចី បានទម្លាក់ទំនួលខុសត្រូវទៅលើរដ្ឋាភិបាលលោក សាកូហ្ស៊ី (២០០៧-២០១២) ដែលមានលោកហ្វ្រង់ស័រ ហ្វីយ៉ុង ជានាយករដ្ឋមន្ត្រី។ សិស្សថ្នាក់ទីបួននៅឆ្នាំ២០១៥នេះ បានចូលរៀនថ្នាក់ទីមួយនៅឆ្នាំ២០១១។ ដូច្នេះជាជំនាន់រងថ្មបាក់ នៃកម្មវិធីសិក្សាដ៏ទន់ខ្សោយ កំណត់ដោយរដ្ឋាភិបាលលោក ហ្វីយ៉ុង តាំងពីឆ្នាំ២០០៨មក តែត្រូវបានប្តូរផ្លាស់ហើយនៅឆ្នាំ២០១៦។
លោកស្រីរដ្ឋមន្ត្រី បានឆ្លៀតវាយប្រហារ លោក ហ្វ្រីយ៉ុង ដែលទើបជាប់ឆ្នោតជាបេក្ខជនប្រធានាធិបតីបក្សស្តាំនិយមបារាំងថ្មីៗ ដោយបន្ទោសចំៗថា នយោបាយរបស់រដ្ឋាភិបាលចាស់ លុបចោលការបណ្តុះបណ្តាលគ្រូបង្រៀន កាត់បន្ថយតិចទៅៗ វគ្គបំពាក់បំប៉នគ្រូខ្លីៗ និងលុបចោលការងារគ្រូបង្រៀនអស់៨ម៉ឺននាក់ នៅក្នុងសម័យគ្រប់គ្រងរបស់លោកសាកូហ្ស៊ី ទើបឱ្យបារាំងជួបលទ្ធផលអាក្រក់ និងដូចជាបានបូជាសិស្សអស់មួយជំនាន់។
រដ្ឋមន្ត្រីទំលាក់កំហុសលើអ្នកនយោបាយ អាចចាត់ទុកថាជាឱកាសវាយប្រហារគ្នាយកចំណេញ ប៉ុន្តែតំណាងសហជីពគ្រូបង្រៀនបឋមសិក្សា ក៏បានពន្យល់ហេតុផលស្រដៀងនឹងលោកស្រីរដ្ឋមន្ត្រី ដោយបានគូសបញ្ជាក់ថា កម្មវិធីសិក្សាកំណត់ដោយរដ្ឋាភិបាលនៅឆ្នាំ២០០៨ មិនល្អទេ ប្រើវិធីបែបចាំស្វ័យប្រវត្តិច្រើនជាងការពន្យល់លម្អិតឱ្យយល់។ តាមរយៈកម្មវិធីនោះ គ្រូធ្វើការច្រើនម៉ោង ដូចចង់ញាត់បញ្ចូលក្នុងខួរក្បាលសិស្ស បង្រៀនគណិតវិទ្យាដល់ទៅ ១៩៣ម៉ោងក្នុងមួយឆ្នាំ ទល់នឹង១៥៨ម៉ោង នៅតាមបណ្តាប្រទេសក្នុងអឺរ៉ុបផ្សេងទៀតហើយ នៅតែមានលទ្ធផលមិនល្អ។ មិនតែប៉ុណ្ណោះសោត គ្រូបង្រៀនទាំងឡាយស្ថិតក្នុងសម្ពាធយ៉ាងខ្លាំង ដោយមានការលុបវគ្គបណ្តុះបណ្តាលនិងបំពាក់បំប៉ន។
សូមបញ្ជាក់ថានៅក្នុងរបាយការណ៍សមាគមន៍វាយតម្លៃកំរិតសិក្សា ក៏បានបង្ហាញអំពីសមត្ថភាពរបស់គ្រូបារាំងដែរ ថាគ្មានសិល្ប៍វិធីបង្រៀននិងមិនសូវចេះពន្យល់ឱ្យសិស្សឆាប់យល់ និងមានជំនក់ចិត្តក្នុងការសិក្សាទេ។ វាពិតជាមិនចម្លែកឡើយព្រោះថា ៨០%នៃគ្រូបង្រៀននៅបឋមសិក្សា មានប្រវត្តិសិក្សាខ្លួនឯងមិនពូកែខាងវិទ្យាសាស្ត្រ និងគណិតវិទ្យាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ