AIEA ព្រមានពីគ្រោះភេរវកម្មនុយក្លេអ៊ែរ
ភ្នាក់ងារថាមពលបរមាណូអន្តរជាតិ ហៅកាត់ថា AIEA ដែលកំពុងរៀបចំបើកសន្និសីទអន្តរជាតិ ស្តីអំពីសុវត្ថិភាពនុយក្លេអ៊ែរ នៅទីក្រុងវីយ៉ែន បានព្រមាននៅថ្ងៃចន្ទនេះ អំពីគ្រោះហានិភ័យនៃការវាយប្រហារភេរវកម្មប្រឆាំងនឹងទីតាំង ឬសម្ភារៈនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ពួកភេរវជន ឬក្រុមឧក្រិដ្ឋជន ទាំងឡាយ កំពុងតែស្វែងរកគ្រប់មធ្យោបាយ និងរង់ចាំឆក់ឱកាសរកចំណុចខ្សោយពីប្រព័ន្ធសុវត្ថិភាពនុយក្លេអ៊ែរពិភពលោក ឃើញភ្លាម នឹងធ្វើការវាយប្រហារភ្លាម។ នេះបើតាមប្រសាសន៍របស់អគ្គលេខាធិការភ្នាក់ងារថាមពលបរមាណូអន្តរជាតិ លោក យូគីយ៉ា អាម៉ាណូ នៅចំពោះមុខអ្នកជំនាញនិងរដ្ឋមន្ត្រីនៃប្រទេសជាសមាជិក១៦៨ប្រទេស ដោយថែមគូសបញ្ជាក់ថា គ្រប់ប្រទេសមាននុយក្លេអ៊ែរសុទ្ធតែជាចំណុចដៅនៃការវាយប្រហារពីសំណាក់ជនអន្ធពាលទាំងអស់។
ទិសដៅនៃការការវាយប្រហាររបស់ពួកគេ អាចជាទីកន្លែង ឬជាសម្ភារៈផ្ទុកសារធាតុវិទ្យុសកម្ម សម្រាប់បម្រើបម្រាស់ក្នុងវិស័យនុយក្លេអ៊ែរ។ ពួកភេរវជនអាចប្រើប្រាស់សារធាតុវិទ្យុសកម្មដែលលួចបាន សម្រាប់យកទៅផលិតគ្រាប់បែកប្រល័យលោក មកបង្កភេរវកម្ម ឬក៏ចេញធ្វើភេរវកម្មប្រឆាំងនឹងទីតាំងមានមជ្ឈមណ្ឌលនុយក្លេអ៊ែរដោយផ្ទាល់តែម្តង។ ហេតុដូច្នេះហើយបានជាលោកអគ្គលេខាAIEA បានអំពាវនាវឱ្យគ្រប់ប្រទេសជាសមាជិកទីភ្នាក់ ធ្វើការប្រុងប្រយ័ត្ននៅពេលដឹកជញ្ជូនចេញនិងចូលសំណល់សារធាតុវិទ្យុសកម្ម។
ដើម្បីឆ្លុះបញ្ចាំងពីគ្រោះហានិភ័យនៃការវាយប្រហារនុយក្លេអ៊ែរនេះ ប៉ូលិសប៊ែលហ្សិក បានចេញធ្វើប្រតិបត្តិការ កាលពីខែធ្នូឆ្នាំ២០១៥ សិក្សាតាមដានលើខ្សែវីដេអូសុវត្ថិភាពរាប់សិបម៉ោង ដៅអ្នកទទួលខុសត្រូវជាន់ខ្ពស់ឧស្សាហកម្មនុយក្លេអ៊ែរប៊ែលហ្សិកម្នាក់។
មជ្ឈមណ្ឌលនុយក្លេអ៊ែរបារាំង ក៏ធ្លាប់រងការគំរាមកំហែងជាច្រើនដងដែរ ដោយឃើញមានដ្រូនគ្មានអត្តសញ្ញាណហោះឆ្វែលពីលើតំបន់សុវត្ថិភាពហាមឃាត់។ កាលពីខែមិថុនា២០១៣ ប៉ារីសបានបើកអង្កេតស៊ីជម្រៅមួយ បន្ទាប់ពីសារព័ត៌មានបានចុះផ្សាយអំពីកង្វះខាតដ៏ធ្ងន់ធ្ងរផ្នែកសុវត្ថិភាពនៅតាមមជ្ឈមណ្ឌលនុយក្លេអ៊ែរ។
ក្នុងរយៈពេលប្រមាណ២០ឆ្នាំចុងក្រោយនេះ ភ្នាក់ងារថាមពលបរមាណូអន្តរជាតិបានរាប់ឃើញមានករណីរត់ពន្ធ លួច ឬបាត់សារធាតុវិទ្យុសកម្មដល់ទៅជាង២៨០០ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ