លោកនាយករដ្ឋមន្ត្រី វ៉ាល់ស៍ ប្រកាសឈរឈ្មោះជាបេក្ខជនប្រធានាធិបតីបារាំង
ចុះផ្សាយនៅថ្ងៃ៖
ស្តាប់ - ០៥:៣៦
នៅថ្ងៃនេះ បារាំងបានភ្ញាក់ពីដំណេកជាមួយដំណឹងប្រកាសតែងតាំងនាយករដ្ឋមន្ត្រីថ្មី និងទីបី គឺលោក ប៊ែរណា កាហ្សឺណឺវ។ មូលហេតុ មកពី នាយករដ្ឋមន្ត្រីចាស់ គឺលោក ម៉ាណុយអែល វ៉ាល់ស៍ បានសុំលាលែងចេញពីតំណែង ដើម្បីមានឱកាសពេញលេញចេញធ្វើយុទ្ធនការឃោសនាបោះឆ្នោត។ លោក ម៉ាណុយអែល វ៉ាល់ស៍ បានប្រកាសឈរឈ្មោះជាបេក្ខជនប្រធានាធិបតី នៅឆ្នាំ២០១៧ ក្រោយពីលោកប្រធានាធិបតី ហ្វ្រង់ស័រហូឡង់ សម្រេចចិត្តដកខ្លួនមិនឈរឈ្មោះបន្តអាណត្តិទីពីរ។ ជាមនុស្សច្បាស់លាស់ ប្រកបដោយបុគ្គលិកលក្ខណៈមុះមុត ចេះសម្រេចចិត្តផាំងៗ តែមានចំណុចខ្សោយមួយគឺមិនសូវត្រូវជាមួយសកម្មជនបក្សសង្គមនិយមដូចគ្នា។
បួនថ្ងៃក្រោយសេចក្តីសម្រេច របស់លោកហ្វ្រង់ស័រហូឡង់មិនឈរឈ្មោះបន្តអាណត្តិនោះ ថ្ងៃនេះប្រធានាធិបតីបារាំង បានធ្វើការរុះរើគណៈរដ្ឋមន្ត្រីឡើងវិញ ដោយលោកម៉ានុយអែល វ៉ាល់ស៍បានលាលែងពីតំណែងនាយករដ្ឋមន្ត្រី ដើម្បីទៅឈរឈ្មោះជាបេក្ខជនប្រធានាធិបតី នៅឆ្នាំក្រោយ។
ហ្មត់ចត់ មានសណ្តាប់ធ្នាប់ មានមហិច្ឆតា លោក ម៉ានុយអែល វ៉ាល់ស៍ មិនខ្លាចនឹងប្រើអំណាចក្នុងការអារកាត់សេចក្តីសម្រេចចិត្តអ្វីមួយឡើយ ! ជាក់ស្តែង នៅពេលមិនអាចប្រមូលសំឡេងភាគច្រើនគ្រប់គ្រាន់សម្រាប់អនុម័តច្បាប់អ្វីមួយទេ លោក ម៉ានុយអែល វ៉ាល់ស៍ មិនខ្លាចនឹងប្រើសិទ្ធិជានាយករដ្ឋមន្ត្រីក្នុងការចេញច្បាប់នេះឱ្យប្រើប្រាស់ឡើយ។
ជាមនុស្សរហ័សរហួន ភ្នែកខ្មៅ ចង្កាជ្រុង មុខចង សម្រាប់អ្នកមិនពេញចិត្ត តែជាមិត្តដ៏ស្រទន់ សម្រាប់អ្នកគាំទ្រ លោក ម៉ានុយអែល វ៉ាល់ស៍ នៅក្មេងមែនតែមានបទពិសោធន៍នយោបាយច្រើន និងជាមនុស្សសកម្មការងារខ្លាំងណាស់។
មានកំណើតអេស្ប៉ាញនៅឆ្នាំ១៩៦២ បានសញ្ជាតិជាបារាំងនៅឆ្នាំ១៩៨២ ជាឥស្សរជននយោបាយបក្សសង្គមនិយម លោក វ៉ាល់ស៍ ក្លាយជាអ្នកជំនួយការសភា តាំងពីអាយុ២៣ឆ្នាំ។ អាយុ២៤ឆ្នាំ លោកបានជាប់ឆ្នោតជាសមាជិកក្រុមប្រឹក្សាតំបន់ Ile de France។ នៅឆ្នាំ១៩៩៨ លោកបានចូលជាសមាជិកការិយាល័យនាយករដ្ឋមន្ត្រី Michel Rocard។ ជាអ្នកទទួលខុសត្រូវផ្នែកទំនាក់ទំនងរបស់នាយករដ្ឋមន្ត្រី Jospin ពីឆ្នាំ១៩៩៧-២០០២ និងជាចៅហ្វាយក្រុង អេវរី ក្រុងជាយជាប់របងប៉ារីស។
លោក ធ្លាប់ឈរឈ្មោះបេក្ខជនប្រធានាធិបតីក្នុងបក្សសង្គមនិយម នៅឆ្នាំ២០១២ ហើយគ្រាន់តែចាញ់ឆ្នោតភ្លាមលោក បានសម្តែងការគាំទ្រយ៉ាងពេញទំហឹងលោក ហ្វ្រង់ស័រ ហូឡង់ ព្រមទាំងក្លាយជាមនុស្សមិនអាចខ្វះបានរបស់លោកប្រធានាធិបតី។
មុននឹងទទួលនាទីជានាយករដ្ឋមន្ត្រី លោក ម៉ានុយអែល វ៉ាល់ស៍ ជារដ្ឋមន្ត្រីក្រសួងមហាផ្ទៃ ជាទីពេញនិយមសម្រាប់ពលរដ្ឋបារាំងទាំងមូល។ លោក ក៏បានទទួលប្រជាប្រិយភាពខ្ពស់ជាងគេ បើប្រៀបធៀបទៅនឹងឥស្សរជន និងបេក្ខជនក្នុងបក្សផ្សេងទៀត ប៉ុន្តែលោកក៏ជាបុគ្គលដ៏ចម្រូងចម្រាសខ្លាំងដែរនៅក្នុងបក្ស។
លោក ម៉ានុយអែល វ៉ាល់ស៍ និងការបង្រួបបង្រួមបក្ស
ការបោះឆ្នោតជ្រើសរើសបេក្ខជនក្នុងបក្ស ត្រូវប្រព្រឹត្តទៅ នៅថ្ងៃទី ២២ និង២៩ មករា ដោយមានបេក្ខជនយ៉ាងហោច៨នាក់ ចូលប្រកួតប្រជែងគ្នា ក្នុងនោះមានពីររូបជាអតីតរដ្ឋមន្ត្រីក្នុងរដ្ឋាភិបាលជាមួយលោកម៉ានុយអែល វ៉ាល់ស៍ផ្ទាល់។
ការយកឈ្នះនៅក្នុងសម័យបោះឆ្នោតក្នុងបក្សជារឿងមួយ តែការប្រមូលផ្តុំកម្លាំងនយោបាយអ្នកឆ្វេងនិយម ជាវិញ្ញាសា ដ៏លំបាកបំផុត ! បើធ្វើមិនបានទេ នោះលោក ម៉ានុយអែល វ៉ាល់ស៍ ពិតជាពិបាកយកឈ្នះគូប្រជែងអ្នកស្តាំនិយមខ្លាំងណាស់ ! លោក បានយល់អំពីចំណុចនេះច្បាស់ណាស់ និងបានសម្តែងការសង្ស័យរួចមកហើយ អំពីភាពចាំបាច់នៃប្រមូលផ្តុំកម្លាំងគ្នាដើម្បីប្រយោជន៍រួម ឬដើម្បីយកឈ្នះសត្រូវរួម គឺលោក ហ្វ្រង់ស័រ ហ្វីយ៉ុង បេក្ខជនប្រធានាធិបតីបក្សស្តាំនិយមទេ។
ថ្វីបើលោកមានបុគ្គលិកលក្ខណៈល្អ គ្មានប្រវត្តិជាប់អាស្រូវមែន និងមានប្រជាប្រិយភាពខ្លាំងជាងគេមែន តែឥស្សរជនក្នុងបក្ស ឬអ្នកឆ្វេងនិយមមួយចំនួន ចាត់ទុកលោកជាសត្រូវ ហើយអ្នកខ្លះទៀតហ៊ានដល់ទៅចាត់ទុកថាលោកមិនមែនជាអ្នកសង្គមនិយមទេ។
កម្មវិធីសេដ្ឋកិច្ចនិងសង្គម
លោក វ៉ាល់ស៍ បានតាំងខ្លួនជាអ្នកសង្គមនិយមបែបថ្មី ដែលបានប្រកាសចូលចិត្ត និងស្រលាញ់ក្រុមហ៊ុនសហគ្រាស ! ព្រោះ ក្រុមថៅកែសហគ្រាស ជាអ្នកនាំភាពមានបានដល់ប្រទេសនិង ជាអ្នកបង្កើតទីផ្សារការងារ។ លោកធ្លាប់ទាំងបានព្រលយពាក្យចង់សើរើ ច្បាប់ការងារ ទាក់ទងនឹងរយៈពេលធ្វើការ៣៥ម៉ោងក្នុងមួយសប្តាហ៍ផង។ លោកជាប្រមុខរដ្ឋាភិបាលសង្គមនិយម ដែលស្វាគមន៍ទះដៃអបអរសាទរដោយក្រុមថៅកែ។ ជាជំហរនយោបាយបែបសេរីនិយមជ្រុលសម្រាប់ក្រសែភ្នែកអ្នកឆ្វេងនិយមបារាំង។
លោក ជាមនុស្សដំបូងគេក្នុងបក្ស-មុនលោកហ្វ្រង់ស័រ ហូឡង់ទៅទៀត ដែលបានបង្ហាញជំហរបែបសេរីសង្គមនិយម បន្ធូរបន្ថយពន្ធដារ ផ្តល់ភាពប្រកួតប្រជែងដល់សហគ្រាស កាត់បន្ថយចំណាយសាធារណៈ។ តែដើម្បីតម្រូវចិត្តអ្នកឆ្វេងនិយម លោកបានបន្ទន់នយោបាយសង្គមសេរីនិយម តាំងពីប៉ុន្មានខែមកហើយ ដោយងាកទៅចាត់វិធានការលើនយោបាយការពារតែប្រយោជន៍ជាតិឯង និងដល់សង្គម ដោយចង់កំណត់ចំណូលសកល និងផ្តល់ការឧបត្ថម្ភដល់យុវជនលើសពីអាយុ១៨ឆ្នាំឡើងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ