បារាំង៖« Lascaux ៤ » ជារូងភ្នំសិប្បនិមិត្មដែលសាងសង់ដោយចម្លងតាមគំរូដើមមានអាយុកាល ១៨ ០០០ឆ្នាំ
នៅក្នុងប្រទេសបារាំង លោកប្រធានាធិបតីហ្រ្វង់ស័រ ហូឡង់បានចូលរួមនៅក្នុងពិធីបើកសម្ពោធរូងភ្នំសិប្បនិមិត្ម « Lascaux ៤ » ស្ថិតប៉ែកនិរតីនាថ្ងៃសៅរ៍ ទី១០ ធ្នូនេះ។ រូងភ្នំសិប្បនិមិត្ម « Lascaux ៤ » ត្រូវបានសាងសង់ឡើងដោយចម្លងតាមគំរូដើមទាំងស្រុងពីរូងភ្នំ « Lascaux » ដែលមានអាយុកាលប្រមាណជា ១៨ ០០០ឆ្នាំ និងដែលមានបង្កប់ដោយរឿងរ៉ាវប្រវត្តិសាស្រ្ត និងអាថ៌កំបាំងជាច្រើនមកដល់សព្វថ្ងៃ។ តើរូងភ្នំ « Lascaux » មានប្រវត្តិយ៉ាងម៉េចខ្លះ?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៦
គឺនៅក្នុងថ្ងៃទី១២ កញ្ញា ឆ្នាំ ១៩៤០ ដែលរូងភ្នំ « Lascaux » ត្រូវបានរកឃើញដោយក្រុមក្មេងជំទង់ចំនួន ៤នាក់នៅក្នុងព្រៃភ្នំមួយស្ថិតប៉ែកនិរតីប្រទេសបារាំង។ អ្វីដែលអស្ចារ្យមាននៅក្នុងរូងភ្នំ « Lascaux » គឺរូបគំនូរដ៏ប្រណិតនៅលើជញ្ជាំងដែលបានបង្កប់ដោយរឿងរ៉ាវប្រវត្តិសាស្រ្ត និងអាថ៌កំបាំងមកដល់សព្វថ្ងៃ។ នៅឆ្នាំ ១៩៤៨ ពោលបន្ទាប់ពីរកឃើញបាន ៨ឆ្នាំ រូងភ្នំ « Lascaux » ត្រូវបានគេបើកទ្វារឲ្យអ្នកទេសចរណ៍ជាតិ និងអន្តរជាតិចូលទស្សនា។ តែដោយភាពចាស់ជរា និងភាពផុយស្រួយរបស់រូងភ្នំ « Lascaux » រដ្ឋអំណាចក៏បានបិទទ្វារមិនឲ្យចូលទស្សនាជាស្ថាពរក្នុងឆ្នាំ ១៩៦៣។ មានភ្ញៀវជាតិ និងអន្តរជាតិសរុប ១លាននាក់បានចូលទស្សនារូងភ្នំ « Lascaux » ចន្លោះឆ្នាំ ១៩៤៨ និងឆ្នាំ ១៩៦៣។
ក្រោយពេលបិទទ្វារជាស្ថាពរនូវរូងភ្នំ « Lascaux » រដ្ឋអំណាចបារាំងក៏បានសម្រេចសាងសង់រូងភ្នំ « Lascaux ២ » ដោយចម្លងតាមគំរូដើមតែ ៩០% ប៉ុណ្ណោះ។ រូងភ្នំ « Lascaux ២ » នេះបានបើកទ្វារឲ្យភ្ញៀវទេសចរណ៍ចូលទស្សនាក្នុងឆ្នាំ ១៩៨៣ និងមានអ្នកចូលទស្សនាជាង ១០លាននាក់ហើយតាំងពីឆ្នាំ ១៩៨៣ មកដល់ពេលនេះ។ បន្ទាប់ពីរូងភ្នំ « Lascaux ២ » ឈានដល់រូងភ្នំ « Lascaux ៣ » ដែលបានលេចរូបរាងក្នុងឆ្នាំ ២០១២។ តែរូងភ្នំ « Lascaux ៣ » មានតែនៅលើក្រដាសដោយគូរចម្លងតាមគំរូដើម ១០០% ដើម្បីចូលរួមនៅក្នុងពិធីតាំងពិពណ៌នានាក្នុងលោក។ គួរជម្រាបជូនថា រូងភ្នំ « Lascaux » បានចុះក្នុងបញ្ជីបេតិកភណ្ឌពិភពលោកក្នុងឆ្នាំ ១៩៧៩។
តែសម្រាប់រូងភ្នំ « Lascaux ៤ » ដែលបើកសម្ពោធពេលនេះ គឺជាលើកទី១ ដែលគេបានសាងសង់ជាក់ស្តែងដោយចម្លងតាមគំរូដើមទាំងស្រុង ១០០% នៅលើផ្ទៃក្រឡាដីប្រមាណជា ៨ ៥០០ម៉ែត្រក្រឡាដោយចំណាយពេលសាងសង់ចំនួន ៤ឆ្នាំ និងចំណាយប្រាក់សាងសង់សរុបចំនួន ៦៦លានអឺរ៉ូ។ រូងភ្នំ « Lascaux ៤ » នឹងបើកទ្វារឲ្យភ្ញៀវចូលទស្សនាចាប់ពីថ្ងៃទី១៥ ធ្នូខាងមុខនេះទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ