ស៊ីរីបានក្លាយជាប្រធានបទនៃកិច្ចប្រជុំនៅក្នុងប្រទេសបារាំង និងប្រទេសស្វ៊ីស
នៅថ្ងៃសៅរ៍ ទី១០ ធ្នូនេះ សំណុំរឿងស៊ីរីបានក្លាយជារបៀបវារៈនៃកិច្ចប្រជុំរៀបចំក្នុងប្រទេសបារាំង និងប្រទេសស្វ៊ីស។ នៅក្នុងទីក្រុងប៉ារីស ប្រទេសបារាំង ជាកិច្ចប្រជុំរវាង៥ប្រទេសបស្ចិមលោកជាមួយ ៥ប្រទេសអារ៉ាប់នៅក្នុងតំបន់។ ចំណែកកិច្ចប្រជុំនៅក្នុងទីក្រុងហ្សឺណែវ ប្រទេសស្វ៊ីស ជាកិច្ចប្រជុំថ្នាក់យោធា និងការទូតរវាងអាមេរិក និងរុស្ស៊ី។ កិច្ចប្រជុំទាំងពីរថ្ងៃនេះបានធ្វើឡើង បន្ទាប់ពីអង្គការសហប្រជាជាតិបានព្រមព្រៀងគ្នាក្នុងសម្លេងភាគច្រើនទាមទារបិទបញ្ចប់អំពើហិង្សានៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
កិច្ចប្រជុំរវាង៥ប្រទេសបស្ចិមលោកជាមួយ ៥ប្រទេសអារ៉ាប់ក្នុងតំបន់នៅបារាំងថ្ងៃនេះត្រូវបានគ្រោងទុកអស់ជាច្រើនសប្តាហ៍មកហើយ។ ៥ប្រទេសបស្ចិមលោកនោះរួមមានអាមេរិក បារាំង អាល្លឺម៉ង់ អង់គ្លេស និងអ៊ីតាលី ចំណែក៥ប្រទេសអារ៉ាប់នៅក្នុងតំបន់ គឺហ្សកដានី តួកគី អេមីរ៉ាអារ៉ាប់រួម កាតា និងប្រទេសអារ៉ាប់ប៊ីសាអូឌីត។ កម្មវត្ថុសំខាន់នៃកិច្ចប្រជុំនេះ គឺស្វែងរកបទឈប់បាញ់ជាស្ថាពរមួយនៅក្នុងទីក្រុងអាឡិប ប្រទេសស៊ីរី។ មន្រ្តីការទូតបារាំងម្នាក់បានទម្លាយឲ្យដឹងថា អ្វីដែលកិច្ចប្រជុំចង់បានគឺការធានាសុវត្ថិភាពចំពោះជនស៊ីវិលស៊ីរីដែលកំពុងរស់នៅក្នុងទីក្រុងអាឡិប ពិសេសចំពោះអ្នកដែលចង់ភៀសខ្លួនចេញ និងអ្នកដែលចង់បន្តរស់នៅទីនោះ។
រូបមន្រ្តីការទូតបារាំងដដែលបានបន្ថែមថា ក្រុមប្រទេសបស្ចិមលោក និងក្រុមប្រទេសអារ៉ាប់ក្នុងតំបន់ដែលជាអ្នកគាំទ្រក្រុមប្រឆាំងបានទាមទារជាថ្មីឲ្យមានដំណោះស្រាយតាមផ្លូវសន្តិវិធីដែលមិនមែនកំណត់ដោយប្រទេសរុស្ស៊ីជាសម្ព័ន្ធមិត្តរបស់ស៊ីរីនោះទេ មានន័យថា ការមានប្រៀបកម្លាំងទ័ពរបស់រដ្ឋាភិបាលស៊ីរីដោយមានជំនួយពីរុស្ស៊ីលើក្រុមប្រឆាំងមិនអាចជាមូលដ្ឋានក្នុងការបន្តរក្សាអំណាចស្របច្បាប់របស់លោកប្រធានាធិបតីស៊ីរីអាសាដបានឡើយ។ ក្រៅពីបារម្ភស្ថានការណ៍នៅទីក្រុងអាឡិប កិច្ចប្រជុំក្នុងទីក្រុងប៉ារីសថ្ងៃនេះក៏ផ្តោតលើទីក្រុងស៊ីរីរ៉ាកាដែលកំពុងស្ថិតក្រោមការកាន់កាប់របស់អង្គការរដ្ឋអ៊ីស្លាម។
មន្រ្តីការទូតបស្ចិមលោកបានយល់ឃើញដូចគ្នាថា ការវាយដណ្តើមទីក្រុងរ៉ាកាពិតជាពិបាក និងត្រូវប្រើពេលយូរ។ ដោយឡែក កិច្ចប្រជុំយោធា និងការទូតរវាងអាមេរិក និងរុស្ស៊ីក្នុងទីក្រុងហ្សឺណែវ ប្រទេសស្វ៊ីសក៏នឹងផ្តោតសំខាន់លើស្ថានការណ៍ក្នុងទីក្រុងអាឡិបដែរ ពិសេសស្វែងរកបទឈប់បាញ់ ការជម្លៀសជនស៊ីវិល និងការដឹកជញ្ជូនជំនួយមនុស្សធម៌។ អ្វីជាការកត់សម្គាល់ កិច្ចប្រជុំទាំងពីរថ្ងៃនេះបានធ្វើឡើង បន្ទាប់ពីអង្គការសហប្រជាជាតិបានព្រមព្រៀងគ្នាក្នុងសម្លេងភាគច្រើនទាមទារឲ្យបិទបញ្ចប់អំពើហិង្សានៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ