បារាំង៖រដ្ឋាភិបាលប្រកាសបន្តដាក់ប្រទេសក្នុងស្ថានភាពអាសន្នរហូតដល់ថ្ងៃទី១៥ កក្កដា ឆ្នាំ ២០១៧
នៅក្នុងប្រទេសបារាំង លោកនាយករដ្ឋមន្រ្តី Bernard Cazeneuve បានប្រកាសឲ្យដឹងពីការបន្តដាក់ប្រទេសក្នុងស្ថានភាពអាសន្នរហូតដល់ថ្ងៃទី១៥ កក្កដា ឆ្នាំ ២០១៧។ សំណើរបស់លោក Bernard នឹងដាក់ឲ្យសភា និងព្រឹទ្ធសភាបោះឆ្នោតនៅសប្តាហ៍ក្រោយ។ គួររម្លឹកជូនថា តាំងពីក្រោយភេរវកម្មថ្ងៃទី១៣ ធ្នូ ឆ្នាំ ២០១៥ ក្នុងទីក្រុងប៉ារីសមក នេះជាលើកទី៥ ដែលរដ្ឋាភិបាលបានបន្តស្ថានភាពអាសន្ននៅក្នុងប្រទេស។ នៅក្នុងកិច្ចប្រជុំពិសេសគណៈរដ្ឋមន្រ្តីនាថ្ងៃសៅរ៍ ទី១០ ធ្នូ លោក Bernard បានបញ្ជាក់ថា ការពន្យារស្ថានភាពអាសន្នក៏ដើម្បីធានាសុវត្ថិភាពនៃការរៀបចំបោះឆ្នោតខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
« សម័យឃោសនាបោះឆ្នោតដែលនឹងឈានមកដល់នៅនិទាឃរដូវខាងមុខ នឹងមានការរៀបចំអង្គប្រជុំ និងការជួបជុំជាលក្ខណៈសាធារណៈយ៉ាងច្រើន។ តែគួរឲ្យសោកស្តាយនៅពេលនោះ ក៏អាចនឹងកើតមានឡើងនូវហានិភ័យភេរវកម្មដែលពួកភេរវជនចង់វាយប្រហារលើបេះដូងនៃតម្លៃប្រជាធិបតេយ្យ និងគោលការណ៍សាធារណរដ្ឋរបស់យើង។
ដូច្នេះក្រោមភ្នែក ច្រមុះរបស់រដ្ឋាភិបាល វាពិតជាចាំបាច់មិនអាចខ្វះបានដែលត្រូវពន្យារស្ថានភាពអាសន្នដើម្បីធានាសន្តិសុខ និងសុវត្ថិភាពនៅក្នុងរយៈពេលឃោសនាបោះឆ្នោត និងថ្ងៃរៀបចំបោះឆ្នោតប្រធានាធិបតីនាថ្ងៃទី២៣ មេសា និងថ្ងៃទី៧ ឧសភា ព្រមទាំងការរៀបចំបោះឆ្នោតសភានៅថ្ងៃទី១១ និងទី១៨ មិថុនា ឆ្នាំ ២០១៧។
ការសម្រេចបន្តស្ថានភាពអាសន្នឲ្យលើសឆ្ងាយពីថ្ងៃបោះឆ្នោតនឹងអនុញ្ញាតឲ្យប្រធានាធិបតីថ្មី និងរដ្ឋាភិបាលថ្មីដែលនឹងប្រសូត្រចេញពីការបោះឆ្នោតមានពេលវេលាគ្រប់គ្រាន់ដើម្បីពិនិត្យមើលស្ថានភាពជាក់ស្តែងមុននឹងសម្រេចថា តើត្រូវ ឬមិនត្រូវបន្តដាក់ប្រទេសក្នុងស្ថានភាពអាសន្នបន្ថែមទៀត »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ