ភេរវកម្មប៊ែរឡាំង ៖ បារាំងបើកការស៊ើបអង្កេត វែករកដានដំណើរភេរវជន
រដ្ឋអាជ្ញាបារាំងបានសម្រេចបើកការស៊ើបអង្កេត ដើម្បីសាកល្បងកំណត់អំពីដំណើររបស់ អានីស អាមរី។ អាមរី ភេរវជនជាប់សង្ស័យថាបើកឡានបុកមនុស្សនៅផ្សារណូអែលក្រុងប៊ែរឡាំង ត្រូវបានប៉ូលិសអ៊ីតាលីបាញ់សម្លាប់នៅក្រុងមីឡង់ កាលពីថ្ងៃសុក្រ ប៉ុន្តែមានតម្រ៉ុយជាច្រើន ដែលបញ្ជាក់ថាជននេះបានធ្វើដំណើរគេចចេញពីអាល្លឺម៉ង់ ឆ្លងកាត់តាមបារាំង មុននឹងទៅដល់អ៊ីតាលី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៤
ប្រឈមមុខនឹងការរិះគន់ រដ្ឋមន្ត្រីក្រសួងមហាផ្ទៃបារាំង បានអំពាវនាវឱ្យគ្រប់គ្នាទទួលស្តាប់ព័ត៌មានដោយប្រុងប្រយ័ត្នសិន ដើម្បីទុកពេលឱ្យក្រុមអ្នកស៊ើបអង្កេតស្រាវជ្រាវ កំណត់អំពីដំណើរផ្លូវរបស់ភេរវជនអាមរី ឱ្យបានច្បាស់លាស់។
បើតាមលោករដ្ឋមន្ត្រី បារាំងបានពង្រឹង សន្តិសុខនៅតាមព្រំដែន ជាមួយអាល្លឺម៉ង់ លុចសំបួរ និងស្វីសភ្លាម ក្រោយហេតុការណ៍វាយប្រហារភេរវកម្មនៅ ក្រុងប៊ែរឡាំង កាលពីល្ងាចថ្ងៃចន្ទ។
ប៉ុន្តែ អានីស អាមរី ភេរវជនសង្ស័យជាតិទុយនីស៊ី ត្រូវបានប៉ូលិសអ៊ីតាលីបាញ់សម្លាប់នៅមីឡង់ ក្នុងពេលត្រួតពិនិត្យធម្មតាតាមដងផ្លូវ។ នៅលើជាប់នឹងខ្លួន គេរកឃើញសំបុត្ររថភ្លើង ចាកចេញពីបារាំងមកក្រុងតួរ៉ាំងរបស់អ៊ីតាលី បន្ទាប់មកទើបបន្តដំណើរតាមរថភ្លើងខេត្តមកកាត់ជាយក្រុងមីឡង់។ នេះបើតាមប្រភពតុលាការអ៊ីតាលី។
បើតាមប្រព័ន្ធឃោសនាព័ត៌មានបារាំង អឺរ៉ុប១ អាមរី ទំនងជាបានធ្វើដំណើរតាមរទេះភ្លើង ពីរបីដំណាក់ ដោយឆ្លងកាត់តាមក្រុងលីយ៉ុង ក្រុងធំបំផុតរបស់បារាំងនៅភាគខាងកើត នៅល្ងាចថ្ងៃព្រហស្បតិ៍ឆ្ពោះទៅក្រុងស្ហំបេរី ខាងក្រោមក្រុងលីយ៉ុង មុននឹងទិញសំបុត្ររថភ្លើងមួយទៀត ឆ្លងទៅអ៊ីតាលី។
ភ្នាក់ងារប្រយុទ្ធប្រឆាំងភេរវកម្ម ដែលមានភារៈស៊ើបអង្កេតនេះ មានមធ្យោបាយផ្ទៀតផ្ទាត់ទំនើបណាស់ គេនឹងកំណត់បានយ៉ាងប្រាកដថាភេរវជនអាមេរី ពិតជាបានឆ្លងកាត់ទឹកដីបារាំងពីណាទៅណា។ នេះជាការអះអាងរបស់អគ្គនាយកនគរបាលជាតិបារាំង មុននឹងបន្ថែមថា ភ្នាក់ងារចារកិច្ចបារាំងមិនបានស្គាល់អានីស អាមរីទេ ពីមុនមក ហើយភេរវជនជីហាតនេះ ទំនងជាមានបណ្តាញភ្ជាប់គ្នាពីអាល្លឺម៉ង់ទៅបារាំង ប៉ុន្តែជនសង្ស័យគ្មានបន្សល់អ្វីដែលអាចប្រទាក់ស្រាវដល់ប្រភពបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ