ពីរឆ្នាំក្រោយភេរវកម្ម តើទស្សនាវដ្តីថ្លុកក្លាយទៅជាយ៉ាងណា ?
៧ មករា ២០១៥-៧មករា២០១៧ ថ្ងៃនេះជាខួបពីរឆ្នាំគត់ នៃភេរវកម្មផ្តាច់ឬសទស្សនាវដ្តីថ្លុក ស្ហារលី អិបដូ Charlie Hebdo និងបន្តដោយភេរវកម្មប្រឆាំងនឹងផ្សារទំនើបជ្វីហ្វ មុននឹងត្រូវប៉ូលិសកម្ចាត់ភេរវជនបាន។ ជាតំណាងសេរីភាពនៃការបញ្ចេញមតិ ទស្សនាវដ្តីដែលហៀបនឹងក្ស័យធនទៅហើយមុនភេរវកម្ម បន្ទាប់មកត្រូវបាត់បង់ អ្នកនិពន្ធ អ្នកមានថ្វីដៃ ខាងគំនូរ ខាងថ្លុកកំប្លែងល្បីៗរបស់ខ្លួនទៀត តើពីរឆ្នាំក្រោយទស្សនាវដ្តីមានជីវិតយ៉ាងណា ?
ចុះផ្សាយនៅថ្ងៃ៖
ស្តាប់ - ០១:៥១
ទស្សនាវដ្តីលេខផ្សាយក្រោយភេរវកម្មថ្ងៃទី ៧ មករា ២០១៥ បានលក់ដាច់អស់ដល់ជាង៧លានច្បាប់ អ្នកចុះទិញជាប្រចាំបានឡើងដល់២៦ម៉ឺននាក់ បើប្រៀបទៅនឹងបីម៉ឺននាក់នៅមុនហេតុការណ៍។ ប៉ុន្តែនៅភាពរន្ធត់រលត់បាត់ទៅ ការជ្រាវទស្សនាវដ្តីក៏ចុះថយ ដោយសល់អ្នកជ្រាវជាប្រចាំត្រឹមប្រមាណ៥ម៉ឺននាក់ប៉ុណ្ណោះ។
ប៉ុន្តែជាមួយមូលនិធិបំរុង ទស្សនាវដ្តីអាចត្រដររស់ដោយសមរម្យបាន និងមានគម្រោងថ្មី ដោយមានចេញផ្សាយតាមអ៊ីនធ័រនែត បកប្រែជាភាសាអង់គ្លេស អាល្លឺម៉ង់ ដើម្បីដាក់លក់ក្នុងប្រទេសផ្សេងក្រៅពីបារាំង។ អ្នកគូររូបថ្លុកដ៏ល្បីៗ បានបង់បង់ជីវិតមែន ប៉ុន្តែអ្នកគូរក្នុងកាសែតផ្សេងៗ បានស្ម័គ្រចិត្តចូលមកធ្វើការឱ្យទស្សនាវដ្តី និងក្លាយជាសរសរទ្រូងថ្មី។
នៅក្នុងខួបពីរឆ្នាំនេះ ទស្សនាវដ្តីបានចេញផ្សេងលេខពិសេស ដោយដាក់ចំណងជើងបែបចំអកដូចទម្លាប់ថា “ឆ្នាំ២០១៧ ឃើញពន្លឺតិចៗហើយ” អមដោយរូបគំនូរ មនុស្សម្នាក់មើលតាមរន្ធកាណុងកាំភ្លើង កាន់ដោយពួកអ៊ីស្លាមជ្រុលនិយម។
ទស្សនាវដ្តីត្រដររស់ ប៉ុន្តែក្រោមទម្ងន់សម្ពាធដ៏ធ្ងន់ ! ពីរឆ្នាំក្រោយភេរវកម្ម អ្នកគំនូរសារព័ត៌មាន នៅតែប្រឈមនឹងកង្វះសេរីភាពនៃការចំអករិះគន់ ! នេះជាការបរិហាររបស់អង្គការអ្នកយកការណ៍គ្មានព្រំដែន។ អង្គការដែលបានលើកឡើងអំពីករណីគំរាមកំហែងលើជាងគំនូរថ្លុករបស់កាសែត និងទស្សនាវដ្តីផ្សេងៗនៅលើលោក ដូចជាអ្នកគំនូរម៉ាឡេស៊ី ដែលរងសំលុតកំហែងជាប្រចាំ ពីសំណាក់អ្នកកាន់អំណាច ជាងគំនូជាតិអាល់ហ្សេរី តួកគីដែលត្រូវបានគេចាប់ញាត់ពន្ធនាគារព្រោះបានគូររូបប៉ះពាល់ដល់ប្រធានាធិបតី។ បើតាមអង្គការ របបគូសរូបថ្លុក ដែលជារង្វាស់នៃសេរីភាពក្នុងការបញ្ចេញមតិ កំពុងក្លាយជាអាជីព ដ៏គ្រោះថ្នាក់ជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ