តើម៉ូស្គូ នឹងឆ្លើយយ៉ាងណា តបនឹងការឈរជើងរបស់អង្គភាពទ័ពអាមេរិក នៅជាប់ព្រំដែនខាងលិចរបស់រុស្ស៊ី
ចុះផ្សាយនៅថ្ងៃ៖
ស្តាប់ - ០៦:១២
តាំងពីដើមសប្តាហ៍នេះមក ប្រព្រឹត្តទៅ ប្រតិបត្តិការខាងរើចេញ ពី នាវាអាមេរិកាំង ដែលក្រោយពីឆ្លងផុតមហាសមុទ្រអាត្លង់ទិក បានដឹកទៅដល់ កំពង់ផែប្រទេសអាល្លឺម៉ង់ គឺ គ្រឿងបច្ចេកទេសសឹក ក្នុងទម្រង់ជា រថក្រោះ រថពាសដែកផ្សេងៗ យានយន្តចម្បាំងប្លែកៗ កាំភ្លើងធំស្វ័យចល័ត សរុបទៅរាប់រយគ្រឿង ព្រមទាំងយោធាអាមេរិក ម្តុំ៤ពាន់នាក់ ឬ ៤កងវរសេនាតូច សម្រាប់ប្រចាំការ នៅតាម ៦ប្រទេសអឺរ៉ុបខាងកើត ជាសមាជិកអូតង់ ដើម្បី ប្រឈមនឹង អ្វីដែលហៅថា “ ការគម្រាមឈ្លានពាន” ពីខាងរុស្ស៊ី។ ម៉ូស្គូ ចាត់ទុកការពង្រាយ ទ័ពបែបនេះ របស់អូតង់ថា ជា “ទង្វើបង្កហេតុ” ដែល “ បង្ខូចតុល្យភាពកម្លាំង នៅទ្វីបអឺរ៉ុប “ ហើយ មិនអាចស្ថិតនៅ ដោយគ្មានចម្លើយពីខាងរុស្ស៊ីឡើយ។
ជាបឋម កាណាល់ប៉ុស្តលេខ១ នៃទូរទស្សន៍រុស្ស៊ី កត់សម្គាល់ថា គ្រឿងចម្បាំងទាំងនេះ ស្របនឹងផែនការគ្រោងទុកពីដើមទី ត្រូវទៅដល់ទ្វីបអឺរ៉ុប គឺលុះ នៅដំណាច់ខែនេះទេតើ ប៉ុន្តែ ដោយខ្លាចរដ្ឋបាលលោកដូណាល់ ត្រាំ ដែលនឹងក្លាយជា ប្រធានាធិបតីថ្មី នៅថ្ងៃ២០មករា ខាង មុខ អាចកែប្រែផែនការនេះ បានជា ប្រធានាធិបតីអូបាម៉ាជិតអស់អំណាច ខំរួសរាន់បញ្ជូនទៅ។
សូម្បីតែ ប្រព័ន្ធផ្សព្វផ្សាយអង់គ្លេស BBC ក៏ចាប់អារម្មណ៍ដែរថា ការទៅដល់ទ្វីបអឺរ៉ុបលើកនេះ នៃគ្រឿងបច្ចេកទេសសឹកអាមេរិកាំង មានទ្រង់ទ្រាយធំបំផុត បើគិតតាំងពីយុគសង្គ្រាមត្រជាក់ បានចប់ទៅ។ ក្រោយពីរើចេញពីនាវាអាមេរិក សព្វាវុធនោះ នឹងត្រូវដឹកជាបន្តបន្ទាប់ ទៅ ប្រចាំការ មុនដំបូង នៅប្រទេសប៉ូឡូញ បន្ទាប់មក នៅតាមបី ប្រទេសមាត់សមុទ្របាល់ទិក គឺ លីទុយអានី ឡេតូនី អេស្តូនី រួចជាបង្ហើយកិច្ច គឺ ទៅកាន់ ប្រទេសប៊ុលហ្ការី និង រូម៉ានី។ ចំណែក ពួកយោធាអាមេរិក ៤.០០០នាក់ នឹងឈរជើងនៅទីនោះ ដោយផ្លាស់វេនគ្នា ៩ខែម្តង។
តាមតួលេខផ្សាយ ដោយវិទ្យុអាល្លឺម៉ង់ Deutsche Welle សម្រាប់ដឹកគ្រឿងចម្បាំងទាំងនេះ ក្រសួងការពារជាតិអាល្លឺម៉ង់ ត្រូវការក្បួនរថភ្លើង ដែលមាន ៩០០ ទូររទេះភ្លើង ប្រវែងដល់ទៅ ១៤ គ.ម. នៅលើផ្លូវដែក។
ការពង្រាយកងកម្លាំង OTAN នៅអឺរ៉ុបខាងកើត ជាភាគមួយនៃ កម្មវិធីរបស់បក្សសម្ព័ន្ធនេះ ដែលតម្រង់មកទប់ “ អំពើឈ្លានពាន “ ដែលអាចកើតមានពីខាងរុស្ស៊ី។ ម៉ូស្គូ ពីចំណែកខ្លួន រមែងថ្លែងប្រឆាំងជានិច្ច ទល់នឹងការ ពង្រីកវត្តមានរបស់ OTAN នៅអឺរ៉ុបខាងកើត។
ក្នុងដំណាក់កាលឥឡូវ មានដឹកទៅដល់ប៉ូឡូញទៅហើយ គឺ គ្រឿងបច្ចេកទេសសឹក ដែលក្នុងនោះ មានជាអាទិ៍ គឺ រថក្រោះធុន Abrams ចំនួន ៨៧គ្រឿង និង យានយន្តសម្រាប់ទ័ពជើងគោក ធុន Brandley ចំនួន ១៤៤គ្រឿង ព្រមទាំង កាំភ្លើងធំស្វ័យចល័ត ច្រើនឥតគណនា។ នឹងប្រចាំការ នៅប៉ូឡូញ ក្នុងចំនួនច្រើនជាងគេ គឺពួកយោធាអាមេរិក នៅក្នុងកងពលថ្មើរជើង លេខ ៤។ កងពលដែលធ្លាប់ល្បី ចូលរួមក្នុងយុទ្ធនាការ នៃសង្គ្រាមលោកលើកទី១ លើកទី២ សង្គ្រាមនៅ វៀតណាម និងនៅអ៊ីរ៉ាក់ជាទីដែលកងពលនេះ ចេះចាប់បានរូបប្រធានាធិបតី Saddam Hussen។
ប្រាកដណាស់ ដែលម៉ូស្គូ មិនអាចអោបដៃនៅព្រងើយកន្តើយឡើយ ចំពោះទង្វើបង្កហេតុនេះ ពីខាងស.រ.អា.។ ជាក់ស្តែង លោក Frants Klintsevich អនុប្រធានគណៈកម្មាធិការព្រឹទ្ធសភា រុស្ស៊ីខាងបញ្ហាការពារប្រទេស និង សន្តិសុខជាតិ ក្នុងសម្ភាសន៍ទៅប្រព័ន្ធផ្សព្វផ្សាយរុស្ស៊ី បាន ថ្លែងថា៖ អាមេរិក ដោយបញ្ជូន កងកម្លាំងទ័ព និងគ្រឿងចម្បាំរបស់ខ្លួន មកទ្វីបអឺរ៉ុប កំពុង ប្រែទ្វីបនេះ ទៅជា “ ធុងរំសេវ “ ហើយនឹងញ៉ាំងឲ្យមានចម្លើយបកវិញ យ៉ាងប្តូរប្តេជ្ញ ពីខាងរុស្ស៊ី។
តាមប្រសាសន៍គាត់ ចម្លើយនេះ នឹងលេចចេញមក គ្មានសល់ចន្លោះ ណាឡើយ នៅតាម បណ្តោយព្រំប្រទល់រុស្ស៊ី ជាប់នឹងប៉ូឡូញ លីតុយអានី ឡេតូនី អេស្តូនី ប៊ុលហ្ការី និង រូម៉ានី ជាទី ដែលនឹងមានដាក់ ឲ្យ ប្រចាំការ គ្រឿងបច្ចេកទេសសឹកទើបទទួលបាន ពីស.រ.អា.។ ខ្ញុំគ្មាន ក្តីមន្ទិលសោះឡើយថា រុស្ស៊ីអាចធានាដល់សន្តិសុខខ្លួន។ ប៉ុន្តែ អឺរ៉ុបខ្លួនឯង ប្រែជា “ធុងរំសេវ “។
មិនមែនចៃដន្យទេ ដែលព្រឹទ្ធសភាប្រតិកម្ម ពីព្រោះនៅរុស្ស៊ី ស្របនឹងរដ្ឋធម្មនុញ្ញ រឿងបញ្ជូនទ័ព និងគ្រឿងបច្ចេកទេសសឹក សម្រាប់ការពារប្រទេស ជា បុព្វសិទ្ធិ របស់សភាថ្នាក់លើនេះ។
ទាក់ទងនឹងសាច់រឿងនេះ និពន្ធនាយក នៃទស្សនាវដ្តីយោធារុស្ស៊ី ឈ្មោះ “ ឃ្លាំងអាវុធមាតុភូមិ” លោក Victor Murakhovski បានបញ្ចេញមតិថា តាមពិត រុស្ស៊ីអាចមិនចាប់អារម្មណ៍ក៏បាន ចំពោះ ការពង្រាយអង្គភាពទ័ពអូតង់ ចំនួនម្តុំតែ ៤០ ០០០នាក់ បន្លាយនៅតាមព្រំដែនប្រវែង ដល់ទៅ ជិត ២.០០០គម នៃរដ្ឋទាំង៦នោះរបស់អូតង់ នៅអឺរ៉ុបខាងកើត នៅជាប់ផ្ទាល់ នឹង ព្រំប្រទល់ខាងលិចរបស់រុស្ស៊ី។
ជាពិសេស តាមតួលេខបក្សអូតង់ផ្ទាល់ ចំនួនយោធារុស្ស៊ី ដែលប្រមូលផ្តុំ នៅតាមបណ្តោយ ព្រំដែនខាងលិច របស់រុស្ស៊ី បច្ចុប្បន្ន មានដល់ទៅ ៣៣០.០០០នាក់ឯណោះ។ ប៉ុន្តែ សំនួរដែល ចោទ តើតួលេខនេះ ជាតួលេខបំផ្លើសសម្រាប់ជាលេស ដើម្បី អូតង់ឆ្លៀតពង្រាយកងទ័ពខ្លួន ក្រោមផ្លាកថា សម្រាប់ទប់នឹង”ការគម្រាមឈ្លានពាន” ពីខាងរុស្ស៊ី ឬ?
រីឯ អ្នកសង្កេតការណ៍យោធាឯករាជ្យរុស្ស៊ី លោក Pavel Felguengawer លើកយកមក បង្ហាញ សេចក្តីថ្លែងការណ៍ ធ្វើដោយ នាយអគ្គសេនាធិការដ្ឋានកងទ័ពរុស្ស៊ី ឧត្តមសេនីយ Valeri Guerassimov ដែលថា ក្រោយពីសមយុទ្ធកងទ័ពក្រោមឈ្មោះថា “ កូកាសឆ្នាំ២០១៦” កាលពីខែ កញ្ញាឆ្នាំទៅ រុស្ស៊ីមានយោធាចំនួន ៦៨ កងវរសេនាតូច ដែលត្រៀមប្រយុទ្ធពេញទី ប្រចាំ នៅភូមភាគខាងលិចរបស់ខ្លួន ហើយមកដល់ដើមឆ្នាំថ្មីនេះ-ឆ្នាំ២០១៧ គឺវាឡើងដល់ចំនួន ៩៦កងទៅហើយ បានន័យថា កើនឡើង៥០%។ ស្របនឹងផែនការ ទៅទល់ចុងឆ្នាំ ២០១៧ វា នឹងឡើងដល់ ១១៥កង ហើយក្នុងឆ្នាំ២០១៨ វានឹងឡើងដល់ចំនួន ១២៥ កងវរសេនាតូច ដែល ត្រៀមប្រយុទ្ធពេញទី ប្រចាំ នៅតាមតំបន់ខាងលិចរបស់រុស្ស៊ី។ អ្នកសង្កេតការណ៍យោធានោះ ថែមទាំងប្រៀបធៀប ដោយផ្គើនឲ្យទៅផងថា នេះជាចម្លើយឬ តបនឹង ៤កងវរសេនាតូច របស់ អូតង់?
មិនតែប៉ុណ្ណោះ តាមយោបល់អ្នកសង្កេតការណ៍យោធារូបនេះ ដែលរមែងទិតៀន មិនថ្នមមាត់ ឡើយ អំណាចលោកប្រធានាធិបតីពូទីន ឆ្លៀតដៀមដាមថា ការពង្រាយទ័ព អូតង់នៅជាប់ នឹង ព្រំដែនខាងលិចរបស់រុស្ស៊ី ដើម្បីឲ្យពួកប្រទេសតូចតាច សមាជិកអូតង់ស្ងប់ចិត្ត ក៏ ជាឱកាសល្អ សម្រាប់ពួកឧត្តមសេនីយរុស្ស៊ី និង ពហុរោងចក្រយោធាផ្អែមមាត់ ដើម្បីសុំដំឡើងថវិកាយោធា ថែមទៀត គ្រាន់នឹងប្រឈមនឹងគ្រោះថ្នាក់ដល់សន្តិសុខជាតិរុស្ស៊ី។
តាមសំដីគាត់ លោករដ្ឋមន្ត្រីការពារជាតិរុស្ស៊ី Serguei Shoigu នឹងទះតុ ទាមទារពីលោករដ្ឋមន្ត្រី ហិរញ្ញវត្ថុ Anton Siluanov ឲ្យរំលែកទឹកប្រាក់ សម្រាប់បំពេញ តាមកម្មវិធី ដាក់ចុះយ លោកប្រធានាធិបតីពូទីន ខាងកែ កងទ័ពជាតិ ឲ្យកាន់តែទំនើប គ្រោងទុក ដល់ឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ