ប្រធានាធិបតីបារាំង៖ រដ្ឋបាលត្រាំ ជាបញ្ហាប្រឈមរបស់អឺរ៉ុប
ប្រមុខដឹកនាំបារាំង និងអាល្លឺម៉ង់ នៅថ្ងៃសុក្រម្សិលមិញ បានជួបពិភាក្សាគ្នា ពីដំណើរវិវឌ្ឍន៍ របស់អឺរ៉ុប ដែលចាប់បក់បោក ដោយការបោះឆ្នោត ដើរចេញរបស់អង់គ្លេសពីសហភាពអឺរ៉ុប ហើយនិងការចូលកាន់តំណែងរបស់លោកដូណាល់ ត្រាំ។ ជំនួបអាល្លឺម៉ង់ -បារាំង ធ្វើឡើង ការប្រកាសរបស់សេតវិមានដែលថា លោកដូណាល់ ត្រាំត្រូវនិយាយទូរស័ព្ទជាមួយប្រធានាធិបតីបារាំង ហើយនិងនាយករដ្ឋមន្រ្តីអាល្លឺម៉ង់ នៅថ្ងៃសៅរ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
បារាំង និងអាល្លឺម៉ង់ ក្បាលម៉ាស៊ីនដឹកនាំអឺរ៉ុប បានចាប់ដៃគ្នា សម្រិតសម្រាំង សម្រួចយុទ្ធសាស្រ្ត ដើម្បីប្រឈមនឹងអាមេរិក របស់លោកដូណាល់ ត្រាំ។ សម្រាប់ប្រធានាធិបតីបារាំង លោកហ្វ្រង់ស័រ ហូឡង់ វាច្បាស់ណាស់ថា រដ្ឋបាលរបស់លោកដូណាល់ ត្រាំ ជាបញ្ហាប្រឈមរបស់អឺរ៉ុប តាំងពីក្នុងផ្នែកពាណិជ្ជកម្ម ហើយនិងវិធីសាស្រ្ត ដើម្បីដោះស្រាយជម្លោះនៅក្នុងពិភពលោក។ លោកស្រីនាយករដ្ឋមន្រ្តីអាល្លឺម៉ង់ ក៏បានសំដែងការព្រួយបារម្ភដូចគ្នានេះ ដែរពីជំហរនយោបាយប្រែប្រួលខ្លាំងនៅអាមេរិក ចាប់តាំងពីលោកដូណាល់ ត្រាំបានចូលកាន់តំណែងជាប្រធានាធិបតី។
នៅក្នុងបទសម្ភាសន៍ជាមួយកាសែតអឺរ៉ុប កន្លងមក លោកដូណាល់ ត្រាំបានបង្ហាញចំណាប់អារម្មណ៍តិចតួចទៅលើអឺរ៉ុប។ ក្រៅតែពីចាត់ទុកអង្គការអូតង់ថា ហួសសម័យ គ្មានប្រយោជន៍ លោកដូណាល់ ត្រាំ នៅបានរិះគន់លោកស្រីនាយករដ្ឋមន្រ្តីអាល្លឺម៉ង់ ថា បានធ្វើកំហុសមួយដ៏ធ្ងន់ធ្ងរ ដោយបានបើកទ្វារទទួលជនភៀសខ្លួនស៊ីរីរាប់លាននាក់។
លោកដូណាល់ ត្រាំ ដែលប្រឆាំងជនអន្តោប្រវេសន៍ខុសច្បាប់ ហើយនិងមិនចង់បើកទ្វារទទួលជនភៀសខ្លួន ធ្លាប់បានអបអរប្រទេសអង់គ្លេស ដែលបានបោះឆ្នោតដើរចេញពីសហភាពអឺរ៉ុប។ លោកដូណាល់ត្រាំ នៅបាននិយាយថា នឹងមានប្រទេសអឺរ៉ុបដទៃទៀត នឹងយកគំរូតាមអង់គ្លេស ដើរចេញពីអឺរ៉ុប ដែលសព្វថ្ងៃស្ថិតនៅក្នុងកណ្តាប់របស់លោកស្រីមែរកិល។
នៅទីក្រុងប៊ែរឡាំង នៅថ្ងៃសៅរ៍ម្សិលមិញ ប្រធានាធិបតីបារាំង លោកហ្វ្រង់ស័រ ហូឡង់ និងលោកស្រីនាយករដ្ឋមន្រ្តីអាល្លឺម៉ង់ អង់ហ្គេឡា មែកិលបានជួបពិភាក្សាគ្នា ដើម្បីត្រៀមរៀបចំកិច្ចប្រជុំកំពូលរបស់សហភាពអឺរ៉ុប ដែលត្រូវធ្វើ នៅសប្តាហ៍ក្រោយ នៅប្រទេសម៉ាល់ត៍។ កិច្ចប្រជុំកំពូលអឺរ៉ុបត្រូវរៀបចំឡើង ដើម្បីស្វែងរកច្រកចេញពីវិបត្តិដែលបង្កឡើងដោយការបោះឆ្នោតដើរចេញរបស់អង់គ្លេស និងក្នុងបរិបទដែលអាមេរិកមានប្រធានាធិបតីប្រកបដោយនយោបាយប្រជានិយម។
ក្រៅតែពីជំហរអឺរ៉ុបរួម ប្រមុខដឹកនាំបារាំង និងអាល្លឺម៉ង់ត្រូវធ្វើ ផងដែរ សេចក្តីប្រកាស ស្តីពីសន្តិសុខ និងកំណើនសេដ្ឋកិច្ច ដែលគេនឹងបង្ហាញ នៅទីក្រុងរ៉ូម ក្នុងឱកាសខួប ទី ៦០ឆ្នាំនៃសន្ធិសញ្ញាបង្កើតសហភាពអឺរ៉ុប។ “នៅក្នុងពេលដែលអឺរ៉ុបកំពុងជួបបញ្ហាប្រឈម ទាំងក្នុង និងក្រៅអឺរ៉ុប យើងចង់បានការសន្យា ច្បាស់ៗ និងរួបរួមគ្នាមួយ ដើម្បីអនាគតអឺរ៉ុប” នេះជាប្រសាសន៍របស់លោកស្រីនាយករដ្ឋមន្រ្តីអាល្លឺម៉ង់។
អ្នកនាំពាក្យរបស់សេតវិមានវិញបានសរសេរសារនៅក្នុងTwitter ថា ប្រធានាធិបតីអាមេរិក លោកដូណាល់ ត្រាំនឹងជួបសន្ទនាតាមទូរស័ព្ទជាមួយប្រមុខដឹកនាំបារាំង អាល្លឺម៉ង់ ហើយនិងរុស្ស៊ី នៅថ្ងៃសៅរ៍។ នៅក្រោយជាប់ឆ្នោតប្រធានាធិបតី លោកដូណាល់ ត្រាំ ធ្លាប់បាននិយាយទូរស័ព្ទម្តងហើយជាមួយប្រធានាធិបតីពូទីន។ លោកដូណាល់ ត្រាំ ដែលកោតសរសើរបុគ្គលិកលក្ខណៈរបស់ប្រធានាធិបតីរុស្ស៊ី បានសន្យារួចហើយថា នឹងធ្វើការ កែលំអទំនាក់ទំនងអាមេរិក រុស្ស៊ីឲ្យប្រសើរឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ