អ.ស.ប. នៅតែពុំទាន់បានបញ្ជាក់ពីកាលបរិច្ឆតកិច្ចចរចានៅលើបញ្ហាស៊ីរីនៅខែកុម្ភៈខាងមុខ
ក្រោយពី ទីក្រុងម៉ូស្គូ បានជូនដំណឹងកាលពីព្រឹកថ្ងៃសុកម្សិលមិញ អំពីការលើកពន្យារពេលកិច្ចចរចានៅ Genève ស្តីពីបញ្ហាស៊ីរីដែលបានកំណត់ពីតំបូងនៅថ្ងៃទី៨កុម្ភៈខាងមុខនឹងត្រូវលើកទៅចុងខែកុម្ភៈវិញ។ រីឯអសបវិញ នៅតែពុំទាន់ធ្វើការបញ្ជាក់អ្វីនៅឡើយនៅលើប្រភពព័ត៌មានខាងលើនេះ។
ចុះផ្សាយនៅថ្ងៃ៖
ស្តាប់ - ០២:០២
នៅព្រឹកថ្ងៃសុក្រម្សិលមិញ ប្រមុខការទូតរុស្ស៊ី លោក Sergueï Lavrov បានជូនដំណឹង ថា “កិច្ចចរចានៅទីក្រុង Genève ដែលកំណត់ពីតំបូង នឹងត្រូវធ្វើនៅថ្ងៃទី៨កុម្ភៈខាងមុខនោះ ត្រូវលើកពេលទៅធ្វើនៅចុងខែកុម្ភៈវិញ។ ការជូនដំណឹងរបស់លោកប្រមុខការទូតរុស្ស៊ីបានធ្វើឡើងនៅមុនពេលលោកត្រូវជួបប្រាស្រ័យជាមួយក្រុមអ្នកប្រឆាំងរបបស៊ីរីនៅទីក្រុងមូស្គូ។
ក៏ប៉ុន្តែអសប តាមរយៈសម្លេងរបស់លោកស្រីYara Sharif ដែលជាអ្នកនាំពាក្យម្នាក់របស់លោក Staffan de Mistura បេសកជនពិសេសរបស់អសបទទួលបន្ទុកបញ្ហាស៊ីរី នៅតែពុំទាន់ធ្វើការអះអាងបញ្ជាក់នៅលើព័ត៌មាននេះនៅឡើយទេ។
លោកស្រី Yara Sharif គ្រាន់តែគូសបញ្ជាក់ប្រាប់ថា “នៅក្នុងក្របខណ្ឌនៃការត្រៀមលក្ខណៈសម្បត្តិនៅមុនពេលកិច្ចចរចានាខែកុម្ភៈខាងមុខនេះ បេសកជនពិសេសរបស់អសបនឹងត្រូវអញ្ជើញទៅកាន់ទីក្រុងញ៉ូយកនៅថ្ងៃចន្ទក្រោយនេះដើម្បីធ្វើការពិភាក្សាជាមួយអគ្គលេខាធិការអសបលោក Antonio Guterres ក៏ព្រមទាំងជូនដំណឹងដល់ក្រុមប្រឹក្សាសន្តិសុខរបស់អសបអំពីកំណត់ត្រាថ្មីៗចុងក្រោយទាក់ទងនឹងបញ្ហាជម្លោះនៅស៊ីរី។
ដោយឡែកអសប ក៏បានបញ្ជាក់ប្រាប់ដែរថា ការអញ្ជើញភាគីនានាដើម្បីមកចូលរួមនៅក្នុងកិច្ចចរចានៅហ្សឹណែវ នៅមិនទាន់បានចប់សព្វគ្រប់នៅឡើយទេ។
គូររំលឹកថា តាំងពីឆ្នាំ ២០១៦មក កិច្ចពិភាក្សាមួយចំនួនដោយមិនចំពោះដែលបានរៀបចំឡើងនៅខែកុម្ភៈ មីនានិងមេសាកាលពីឆ្នាំមុននេះដោយលោក Staffan de Mistura ពុំដែលបានចាប់ផ្តើមធ្វើឡើងទៅតាមកាលបរិច្ឆតដូចតាមការគ្រោងទុកនោះឡើយ។ ការយឺតយ៉ាវនៃកិច្ចពិភាក្សានេះ ជាអាទិ៍គឺ ដោយសារមានបញ្ហានៅលើការចាត់ចែងរៀបចំឬក៏បញ្ហារាំងស្ទះដោយសារសមាសភាពរបស់គណៈប្រតិភូជាដើម។ ម្យ៉ាងទៀត កិច្ចប្រជុំទាំងអស់នេះ បានបិទបញ្ចប់ទៅដោយពុំបានចេញជាលទ្ធផលអ្វីដែរ។
គួររំលឹកថានៅក្នុងបញ្ហាជម្លោះនៅស៊ីរីនេះ ប្រទេសចំនួន៣ដែលមានរុស្ស៊ី តួកគី និងអ៊ីរ៉ង់ បានខិតខំជួយជ្រោមជ្រែងដល់ប្រទេសស៊ីរីតាមរយៈផ្លូវនយោបាយ ដោយបានទទួលបទឈប់បាញ់មួយនៅចុងឆ្នាំ២០០៦រវាងកងទ័ពស៊ីរីនិងក្រុមបះបោរប្រឆាំងរបបលោកអាសាត។
ចាប់តាំងពីបទឈប់បាញ់បានចូលជាធរមាននៅថ្ងៃទី៣០ធ្នូ២០១៦មក អំពើហិង្សានៅក្នុងប្រទេសស៊ីរីនេះ បានធ្លាន់ចុះអន់ថយបន្តិចម្តងៗតែពុំបានបិទបញ្ចប់អំពើហិង្សាទាំងស្រុងនោះឡើយ។
អធិករណ៍នៅក្នុងប្រទេសស៊ីរី ដែលមានរយៈពេលជិត៧ឆ្នំាទៅហើយនោះបានសម្លាប់មនុស្សជាង៣សែននាក់និងបណ្តាលឲ្យមានប្រជាជនភៀសខ្លួនជាច្រើនលាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ