សភាអង់គ្លេសអនុញ្ញាតឲ្យនាយករដ្ឋមន្រ្តីបើកការចរចាដកអង់គ្លេសពីសហភាពអឺរ៉ុប
រដ្ឋាភិបាលអង់គ្លេសនឹងបោះពុម្ពផ្សាយសៀវភៅស នៅថ្ងៃព្រហស្បតិ៍ នេះ គឺនៅមួយថ្ងៃក្រោយសភាបានបោះឆ្នោតអនុម័ត ច្បាប់ដែលអនុញ្ញាតឲ្យនាយករដ្ឋមន្រ្តីអង់គ្លេស ចាប់ផ្តើមនីតិវិធីចរចា ដកអង់គ្លេសចេញពីសហភាពអឺរ៉ុប។ សៀវភៅសរបស់រដ្ឋាភិបាលអង់គ្លេសនឹងនិយាយលម្អិតពីផែនការយុទ្ធសាស្រ្ត ដែលរដ្ឋាភិបាលនឹងប្រើដើម្បីចរចាជាមួយប្រទេសសមាជិកសហភាពអឺរ៉ុប។
ចុះផ្សាយនៅថ្ងៃ៖
បន្ទាប់ពីពិភាក្សាសួរដេញដោលអស់ ជាង ១៧ម៉ោង សភាអង់គ្លេសបានបោះឆ្នោតអនុម័តសេចក្តីព្រាងច្បាប់ ដែលនឹងបើកផ្លូវ អនុញ្ញាតឲ្យលោកស្រីនាយករដ្ឋមន្រ្តីតេរ៉េហ្សា មេTheresa May ចាប់ផ្តើមនីតិវិធីចរចាដកអង់គ្លេស ចេញពីសហភាពអឺរ៉ុប ស្របតាមមាត្រាទី ៥០នៃសន្ធិសញ្ញាក្រុងLisbonne។
សមាជិកសភាអង់គ្លេស ចំនួន ពីរ ភាគបីធ្លាប់មានជំហរប្រឆាំង មិនចង់ឲ្យអង់គ្លេសដើរចេញពី សហភាពអឺរ៉ុប។ ប៉ុន្តែ នៅក្រោយការបោះឆ្នោត ថ្ងៃម្សិលមិញ សមាជិកសភាជាច្រើនទទួលស្គាល់ថា គេមិនអាចដើរបកក្រោយ និងប្រឆាំងការសម្រេចចិត្តរបស់ប្រជាជនដែលបានបោះឆ្នោត ទាមទារឲ្យអង់គ្លេស ចេញពីសហភាពអឺរ៉ុប នៅក្នុងអំឡុងបោះឆ្នោតប្រជាមតិនោះទេ។
រដ្ឋាភិបាលអង់គ្លេស អស់មានរនាំងបាំង នៅក្រោយភ្លើងខៀវរបស់រដ្ឋសភា ដែលធ្លាប់បានដាក់ពាក្យទៅតុលាការកំពូល ទាមទារឲ្យលោកស្រីនាយករដ្ឋមន្រ្តីអង់គ្លេស ត្រូវតែពិភាក្សា សុំការអនុញ្ញាតិពីសភា មុននឹងបើកការចរចា លែងលះជាមួយសហភាពអឺរ៉ុប។
លោកស្រីនាយករដ្ឋមន្រ្តីតេរ៉េហ្សា មេ ដែលធ្លាប់រឹងរូសមិនចង់ឆ្លងកាត់សភា សុខចិត្តធ្វើតាមការសម្រេចរបស់តុលាការកំពូល និងបានសន្យាផងដែរ បោះពុម្ពសៀវភៅ ស នៅថ្ងៃព្រហស្បតិ៍នេះ។ តាមអ្នកនាំពាក្យរបស់នាយករដ្ឋមន្រ្តីអង់គ្លេស សៀវភៅស ដែលគេកំពុងទន្ទឹងរង់ចាំយ៉ាងអន្ទះសា នឹងរៀបរាប់ពីផែនការយុទ្ធសាស្រ្តសំខាន់ៗ ដែលរដ្ឋាភិបាលនឹងប្រើសម្រាប់ចរចាជាមួយសហភាពអឺរ៉ុប។ សៀវភៅសរបស់រដ្ឋាភិបាលនឹងមាននិយាយផងដែរពីការចាកចេញរបស់អង់គ្លេសពីទីផ្សារតែមួយរបស់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ