លោក Mike Pence៖អាមេរិកសន្យានឹងបន្តកិច្ចសហប្រតិបត្តិការជាមួយសហភាពអឺរ៉ុប
លោកអនុប្រធានាធិបតីអាមេរិក Mike Pence បានអញ្ជើញទៅបំពេញទស្សនកិច្ចនៅទីស្នាក់ការកណ្តាលអឺរ៉ុបក្នុងទីក្រុងព្រុចសែល ប្រទេសបែលហ្ស៊ិកនាថ្ងៃចន្ទ ទី២០ កុម្ភៈ។ នាឱកាសទស្សនកិច្ចលើកទី១ នៅទីស្នាក់ការអឺរ៉ុប លោក Mike Pence បានបញ្ជាក់ជាផ្លូវការថា អាមេរិកបានប្តេជ្ញាចិត្តនឹងបន្តកិច្ចសហប្រតិបត្តិការជាមួយអឺរ៉ុប។ ការថ្លែងបញ្ជាក់យ៉ាងដូចនេះរបស់លោក Pence បានធ្វើឡើង បន្ទាប់ពីលោកប្រធានាធិបតីអាមេរិកដូណាល់ ត្រាំបានធ្វើការរិះគន់ខ្លាំងៗលើអឺរ៉ុប និងអង្គការអូតង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
គឺនៅក្នុងសន្និសីទកាសែតរួមគ្នាជាមួយលោកប្រធានក្រុមប្រឹក្សាអឺរ៉ុប Donald Tusk ដែលលោកអនុប្រធានាធិបតីអាមេរិក Mike Pence បានសម្តែងពីកិច្ចសន្យារបស់អាមេរិកក្នុងការបន្តកិច្ចសហប្រតិបត្តិការជាមួយដៃគូអឺរ៉ុប។ ចំណែកលោក Donald Tusk បានប្រាប់ឲ្យដឹងថា មានប្រធានរឿងគន្លឹះចំនួន ៣ ដែលលោកបានលើកទៅជជែកជាមួយលោក Mike Pense ទី១ សណ្តាប់ធ្នាប់អន្តរជាតិ ទី២ សន្តិសុខ និងទី៣ ជំហរពិតប្រាកដរបស់រដ្ឋបាលថ្មីអាមេរិកចំពោះសហភាពអឺរ៉ុប។
លោកប្រធានក្រុមប្រឹក្សាអឺរ៉ុបបានប្រាប់ឲ្យដឹងថា លោកបានទទួលការធានាពេញមាត់ពីអនុប្រធានាធិបតីអាមេរិកក្នុងការគោរពឆន្ទៈរបស់អឺរ៉ុប ពិសេសក្តីសង្ឃឹមរបស់អឺរ៉ុបដែលចង់ឲ្យមានការគាំទ្រពេញទំហឹងដោយគ្មានលក្ខខណ្ឌពីសហរដ្ឋអាមេរិក។ ចំណែកលោកប្រធានគណៈកម្មការអឺរ៉ុប Jean-Claude Juncker បាននិយាយថា អាមេរិកត្រូវការអឺរ៉ុបមួយខ្លាំង និងរួបរួមនៅលើគ្រប់វិស័យទាំងអស់។ សូមជម្រាបជូនថា ការដែលលោក Donald Tusk បានសុំឲ្យមានការធានាច្បាស់លាស់ពីលោក Mike Pense ពេលនេះបានធ្វើឡើង បន្ទាប់ពីមានពាក្យទិតៀន រិះគន់របស់លោកដូណាល់ ត្រាំចំពោះសហភាពអឺរ៉ុប និងអង្គការអូតង់នាពេលកន្លងមក។
ដោយឡែក វត្តមានលើកទី១ របស់លោកអនុប្រធានាធិបតីអាមេរិក Mike Pence នៅទីស្នាក់ការអឺរ៉ុបក្នុងទីក្រុងព្រុចសែល ប្រទេសបែលហ្សិកក៏ទទួលស្វាគមន៍ដោយក្រុមបាតុករប្រមាណជា ១០០នាក់ដែរ។ ពួកបាតុករបាននាំគ្នាប្រឆាំងនឹងនយោបាយរបស់លោកប្រធានាធិបតីអាមេរិកដូណាល់ ត្រាំទាក់ទងនឹងអន្តោប្រវេសន៍ សិទ្ធិស្រ្តី និងសុខភាព៕
បន្ទាប់ពីទស្សនកិច្ចទីស្នាក់ការអឺរ៉ុប លោកអនុប្រធានាធិបតីអាមេរិក Mike Pence បានបន្តទស្សនកិច្ចនៅទីស្នាក់ការអង្គការអូតង់ដោយបានចូលជួបសម្តែងការគួរសមលោកអគ្គលេខាធិការអូតង់ Jens Stoltenberg៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ