លោក ហ្វ្រង់ស័រ ហ្វីយ៉ុង មានហេតុផលត្រឹមត្រូវទេដែលរក្សាបេក្ខភាពប្រធានាធិបតី ?
ចុះផ្សាយនៅថ្ងៃ៖
ស្តាប់ - ០៤:២១
ជាង៦សប្តាហ៍មកហើយដែលសំណុំរឿងលួចកេងលុយរដ្ឋ បានមកបំពុលយុទ្ធនាការឃោសនាបោះឆ្នោតរបស់បេក្ខជនប្រធានាធិបតីបក្សសាធារណរដ្ឋ។ បេក្ខជនដែលធ្លាប់ត្រូបបានគេប្រមើលឃើញ នៅពេលចាប់ផ្តើមឃោសនាភ្លាម ថាអាចជាអ្នកមានសំណាងច្រើនក្លាយជាប្រធានាធិបតី កំពុងតែធ្លាក់ប្រជាប្រិយភាពកាន់តែខ្លាំង និងថែមទាំងអាចត្រូវជាប់ចោទ ក្នុងរឿងអាស្រូវ កេងលុយរដ្ឋ ឱ្យប្រពន្ធនិងកូនទៀត។ ប៉ុន្តែទោះជាយ៉ាងដូច្នេះក្តី ក៏បេក្ខជនហ្វ្រង់ស័រ ហ្វីយ៉ុង នៅតែតាំងជំហរជាប់ ហើយប្រកាសនៅថ្ងៃពុធទី ១ មីនា រក្សាបេក្ខភាពប្រធានាធិបតីរហូតដល់ថ្ងៃបោះឆ្នោត។ តើជាសេចក្តីសម្រេចចិត្តត្រឹមត្រូវឬទេ ?
រឿងអាស្រូវលួចកេងលុយរដ្ឋ បានឈានដល់ដំណាក់កាលថ្មីមួយទៀត គឺតុលាការកោះហៅលោកហ្វ្រង់ស័រ ហ្វីយ៉ុង បេក្ខជនប្រធានាធិបតីបក្សស្តាំនិយម ចូលបំភ្លឺនៅថ្ងៃទី ១៥មីនា មុននឹងឈានដល់ការចោទប្រកាន់ជាផ្លូវការ។ ប៉ុន្តែលោក ហ្វ្រង់ស័រ ហ្វីយ៉ុង មិនដកថយឡើយ ! ទោះបីជាតុលាការអាចនឹងធ្វើការចោទប្រកាន់ក៏ដោយ ក៏លោកនៅតែរក្សាឈ្មោះជាបេក្ខជនប្រធានាធិបតីដដែល ដោយទុកឱ្យពលរដ្ឋជាអ្នកសម្រេចនៅសម័យបោះឆ្នោតប្រធានាធិបតីខែឧសភា។ នេះជាសេចក្តីសម្រេចដែលបញ្ជាក់អំពីជំហរដ៏ច្បាស់លាស់ និងប្រកបដោយភាពជឿជាក់។
លោកសន្យានឹងចូលជួបចៅក្រមស៊ើបអង្កេតតាមការកោះហៅ ដើម្បីឆ្លើយបំភ្លឺការពិត ! ការពិតទាក់ទងនឹងការយកប្រពន្ធកូន មកធ្វើជាជំនួយការ កាលលោកនៅជាសមាជិកសភា ដែលជាប្រភពដើមនៃរឿងអាស្រូវ។ តំណាងសភានិងព្រឹទ្ធសភាម្នាក់ៗ មានកញ្ចប់ថវិការៀងខ្លួនៗ ចំនួន ៩៥៦១អឺរ៉ូ ក្នុងមួយខែៗ សម្រាប់ចាត់ចែងចំណាយរកជំនួយការ នៅក្នុងសភា នៅមណ្ឌលដែលតំណាងសភាគ្រប់គ្រង ចំនួនពី ម្នាក់ទៅ៨នាក់។ ការយកប្រពន្ធកូន ឬញាតិផៅក្នុងគ្រួសារមក ធ្វើជាជំនួយការ មិនត្រូវបានហាមឃាត់ដោយច្បាប់ឡើយ តែប្រាក់ខែដែលត្រូវចំណាយឱ្យជំនួយការជាកូនឬប្រពន្ធនោះ មិនត្រូវលើសពីពាក់កណ្តាលនៃកញ្ចប់ថវិកាអនុញ្ញាតឡើយ។
ម្យ៉ាងទៀត បើតាមការអង្កេតមួយ បង្ហាញថាមានសមាជិកសភានិងព្រឹទ្ធសភាបារាំង ជាងម្នាក់ ក្នុងចំណោម៦នាក់ បានអនុវត្តទម្លាប់យកប្រពន្ធកូន បងប្អូន ក្នុងគ្រួសារមកធ្វើជាជំនួយការ ពោលគឺក្នុងចំណោមសមាជិកសភា៥៧២នាក់ មានយ៉ាងហោចណាស់ ១០៣នាក់ធ្វើបែបនេះ។
ជាទូទៅ គេសង្កេតឃើញថា តំណាងរាស្ត្រ ភាគច្រើនបានជ្រើសរើសប្រើជំនួយការ បី ឬបួននាក់។ មានតែតំណាងសភាបីនាក់ប៉ុណ្ណោះ ដែលប្រើជំនួយការតែម្នាក់ ក្នុងនោះគឺមានរូបលោក ហ្វីយ៉ុងម្នាក់ដែរ។
ក្រោយពីមានផ្ទុះរឿងអាស្រូវកេងលុយរដ្ឋរបស់ត្រកូលហ្វីយ៉ុងនេះមក សភាបារាំងបានគិតគូរដើរតួឱ្យមានតម្លាភាព ដោយបានសើរើកាលពីថ្ងៃទី ២១កុម្ភៈ មើល និងធ្វើបច្ចុប្បន្នភាពបញ្ជីឈ្មោះបុគ្គលិកជាជំនួយការ ចំនួន២០៣៩នាក់ របស់សមាជិកសភាសកម្មទាំង៥៧២រូប។ បញ្ជីឈ្មោះនោះ ដែលគ្រាន់បានឃើញភ្លាម គេអាចបានយល់បានងាយថាជំនួយការ និងមេការ ស្ថិតក្នុងចង្កោមគ្រួសារតែមួយ ទោះបីជាក្នុងឯកសារសភាមិនបញ្ជាក់ ក៏គេអាចសន្និដ្ឋានបានយ៉ាងងាយ ព្រោះត្រកូលរបស់ពួកគេ ដូចនឹងត្រកូលសមាជិកសភា។ ជំនួយការម្នាក់ៗអាចទទួលប្រាក់បៀវត្សរ៍ជាមធ្យមប្រមាណពី ២៣០០ ទៅ ៣២០០អឺរ៉ូ។ ប៉ុន្តែបើតាមបញ្ជីរបស់សភា គេគ្មានឃើញបានបញ្ជាក់អំពីចំនួនពេលម៉ោងធ្វើការ និងប្រាក់ខែ ព្រមទាំងការងារពិតប្រាកដរបស់ពួកគេឡើយ។
មានន័យការងារដែលតំណាងរាស្ត្រផ្តល់ឱ្យក្រុមគ្រួសារ មិនត្រូវបានកំណត់ដោយច្បាស់លាស់ទេ។ ទង្វើបែបនេះ ពុំធ្លាប់មានប្រទេសជិតខាងក្នុងអឺរ៉ុប ជាពិសេសស៊ុយអែត ដែលជាប់ឈ្មោះជាប្រទេសស្អាតស្អំ ជាងគេនៅលើពិភពលោក មិនដែលនឹងស្មានដល់ និងធ្វើសោះ។ គ្រាន់តែបើនៅស្រុកបារាំង វាជាទម្លាប់ទៅហើយ។ ដោយបើគិតមកត្រឹមចំណុចនេះ លោក ហ្វ្រង់ស័រហ្វីយ៉ុង យកប្រពន្ធនិងកូនទាំងពីរ មកធ្វើជាជំនួយការខ្លួន មិនមែនជាទង្វើអ្វីខុសប្លែក និងខុសច្បាប់ឡើយ។
ការដាក់បន្ទុកផ្នែកតុលាការលើរូបហ្វីយ៉ុង អាចជាចាត់ទុកមិនយុត្តិធម៌ បើតាមសំដីរបស់លោកហ្វីយ៉ុង ប៉ុន្តែនៅក្នុងករណីភរិយាលោក គេសង្កេតឃើញថាប្រាក់ខែ របស់លោកស្រីហ្វីយ៉ុង ខ្ពស់ហួសប្រមាណ ឯកូនទាំងពីរ មានម្នាក់មកធ្វើការតាំងពីមិនទាន់គ្រប់អាយុ និងធ្វើការពេញម៉ោង ដែលកូនរូបនោះ នៅជានិស្សិតនៅឡើយ។ ហើយរឿងរាវកាន់តែរីកធំទៀត មកពីលោកស្រីហ្វីយ៉ុងផ្ទាល់ ធ្លាប់បានផ្តល់បទសម្ភាសន៍ឱ្យទូរទស្សន៍អង់គ្លេស ថាពុំធ្លាប់ដែលបានធ្វើការអ្វីឱ្យស្វាមីឡើយ។
ម្យ៉ាងវិញ សេចក្តីសម្រេចចិត្តថ្ងៃនេះ អាចចាត់ទុកថាមិនសមហេតុផល ព្រោះលោក ហ្វ្រង់ស័រ ហ្វីយ៉ុង ខ្លួនឯងធ្លាប់បានប្រកាសថា ប្រសិនបើលោកត្រូវជាប់ចោទក្នុងរឿងអាស្រូវនេះ លោកនឹងដើរចេញពីការប្រកួត ប៉ុន្តែនៅពេលតុលាការកោះហៅចូលជួបដើម្បីប្រាប់អំពីលទ្ធភាពនៃការចោទប្រកាន់ លោកហ្វីយ៉ុង បែរជាវាយប្រហារតុលាការថាមិនយុត្តិធម៌ និងប្រកាសក្រាញក្នុងសង្វៀនរហូតដល់ទីបញ្ចប់ទៅវិញ។ ការសម្រេចចិត្តនេះបង្ហាញថាលោកមិនគោរពសម្តីរបស់ខ្លួន។ លេបសំដីខ្លួនដូច្នេះតើឱ្យប្រជាពលរដ្ឋម្ចាស់ឆ្នោតជឿជាក់ម្តេចបាន ? ដោយសារតែហេតុផលនេះ ទីប្រឹក្សានយោបាយអន្តរជាតិក្នុងក្រុមយុទ្ធនាការឃោសនាបានសម្រេចចិត្តលាលែងចេញពីតំណែង ចាកចេញលែងធ្វើការជាមួយហ្វីយ៉ុង។ បក្សកណ្តាលនិយមUDI ដែលចាប់ដៃជាមួយបក្សស្តាំនិយមសាធារណរដ្ឋ បានកោះប្រជុំគ្នាជាបន្ទាន់ ថាគួរបន្តគាំទ្របេក្ខភាពលោកហ្វីយ៉ុង ឬយ៉ាងណា ? តើនឹងមានការរង្គោះរង្គើក្នុងជួរបក្សបន្ថែមទៀតឬយ៉ាងណា? ប្រសិនបើមានតើបក្សអាចដាក់សម្ពាធលើលោកហ្វីយ៉ុង ដើម្បីរកបេក្ខជនថ្មីជំនួស។ យើងអាចមានចម្លើយនៅក្រោយថ្ងៃ១៥មីនា ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ