ហេតុអ្វីបានជាទំនាក់ទំនងរវាងអាល្លឺម៉ង់ និងតួកគីបានឡើងតានតឹងខ្លាំងម៉្លេះ?
ចុះផ្សាយនៅថ្ងៃ៖
ស្តាប់ - ០៤:៣៣
សង្រ្គាមវាយប្រហារគ្នាដោយពាក្យសម្តីរវាងប្រទេសអាល្លឺម៉ង់ និងប្រទេសតួកគីកំពុងបន្តមានយ៉ាងគគ្រឹកគគ្រេង។ បន្ទាប់ពីបានចោទអាល្លឺម៉ង់ជាប្រទេសដែលបានផ្តល់ជម្រកឲ្យពួកភេរវជនមក លោកប្រធានាធិបតីតួកគីអ៊ែរដូហ្កានបានដំឡើងសម្លេងមួយកម្រិតទៀតដោយចោទអាល្លឺម៉ង់ពីបទបានបន្តអនុវត្តវិធានការតាមបែបពួកណាហ្ស៊ី។ ជាប្រតិកម្មបកវិញ អាល្លឺម៉ង់បានចាត់ទុកសម្តីនេះថាមិនអាចទទួលយកបានទេ ហើយលោកស្រីនាយករដ្ឋមន្រ្តីអាល្លឺម៉ង់មែរកិលបានអំពាវនាវតួកគីឲ្យទប់កំហឹង និងរក្សាភាពស្ងប់ស្ងាត់។ ហេតុអ្វីបានជាទំនាក់ទំនងរវាងប្រទេសសមាជិកអង្គការអូតង់ និងជាប្រទេសដៃគូទាំងពីរបានឡើងតានតឹងដល់ម្លឹង?
ផ្អែមល្ហែមក៏មាន ជូរចត់ក៏មានដែរនៅក្នុងទំនាក់ទំនងរវាងអាល្លឺម៉ង់ និងតួកគី។ តែគេសង្កេតឃើញថាក្នុងរយៈពេលប៉ុន្មានថ្ងៃចុងក្រោយនេះ សង្រ្គាមពាក្យសម្តីចោទគ្នា និងដៀមដាមដាក់គ្នាទៅវិញ ទៅមកបានកើតមានជាចំហយ៉ាងផុសផុល ពិសេសពីខាងតួកគី។ បន្ទាប់ពីបានចោទអាល្លឺម៉ង់ពីបទបានផ្តល់ជម្រកឲ្យពួកភេរវជនមក បុរសខ្លាំងតួកគីលោកប្រធានាធិបតីអ៊ែរដូហ្កានបានចង្អុលចំមុខអាល្លឺម៉ង់ពីបទបន្តអនុវត្តន៍របបណាហ្ស៊ី។
« ខ្ញុំគិតថា អស់របបណាហ្ស៊ីហើយនៅអាល្លឺម៉ង់ តែគួរឲ្យសោកស្តាយ ការអនុវត្តរបបមួយនេះនៅបន្តមាន » នេះជាការថ្លែងដោយកំហឹងរបស់លោកអ៊ែរដូហ្កាននៅថ្ងៃអាទិត្យ ទី៥ មីនា។
ជាប្រតិកម្មតបវិញភ្លាមៗដោយកំហឹងនៅថ្ងៃចន្ទ ទី៦ មីនា លោកស្រីនាយករដ្ឋមន្រ្តីអាល្លឺម៉ង់អង់ហ្កឺឡា មែរកិលបានចាត់ទុកសម្តីរបស់លោកអ៊ែរដូហ្កានថា ជារឿងមិនអាចទទួលយកបានទេ ព្រមទាំងអំពាវនាវតួកគីឲ្យទប់កំហឹង និងរក្សាភាពស្ងប់ស្ងាត់។ សូមជម្រាបជូនថា កំហឹងរបស់លោកអ៊ែរដូហ្កានប្រឆាំងអាល្លឺម៉ង់បានកើតមានឡើង បន្ទាប់ពីរដ្ឋអំណាចអាល្លឺម៉ង់បានសម្រេចលប់ចោលគម្រោងរៀបចំអង្គមេទ្ទិញក្នុងទឹកដីអាល្លឺម៉ង់ពីសំណាក់រដ្ឋមន្រ្តីតួកគីចំនួនពីររូបជាមួយពលរដ្ឋតួកគីរស់នៅក្នុងប្រទេសអាល្លឺម៉ង់។ គោលដៅនៃអង្គមេទ្ទិញ គឺនិយាយបញ្ចុះបញ្ចូលពលរដ្ឋតួកគីនៅទីនោះឲ្យបោះឆ្នោតគាំទ្រច្បាប់រដ្ឋធម្មនុញ្ញថ្មីនៅតួកគីដែលសំដៅពង្រឹង និងពង្រីកអំណាចលោកអ៊ែរដូហ្កាន។
គួររម្លឹកជូនថា តួកគីនឹងរៀបចំបោះឆ្នោតប្រជាមតិស្តីពីច្បាប់រដ្ឋធម្មនុញ្ញថ្មីនៅជាង ១ខែខាងមុខ និងដែលលទ្ធផលស្ទង់មតិចុងក្រោយឲ្យដឹងថា សម្លេងប្រឆាំងកំពុងលើសសម្លេងគាំទ្រតិចតួច។ ដូច្នេះវាជារឿងធម្មតាទេដែលលោកអ៊ែរដូហ្កានបារម្ភខ្លាំង និងបានប្រើគ្រប់មធ្យោបាយទាំងអស់ដើម្បីឲ្យច្បាប់រដ្ឋធមនុញ្ញថ្មីទទួលបានការគាំទ្រច្រើនពីពលរដ្ឋតួកគី។ ចំណែកជម្រើសរបស់លោកអ៊ែរដូហ្កានក្នុងការបញ្ជូនរដ្ឋមន្រ្តីរបស់ខ្លួនឲ្យទៅឃោសនាក្នុងទឹកដីអាល្លឺម៉ងក៏មិនមែនជាជម្រើសចៃដន្យដែរ ព្រោះមានពលរដ្ឋតួកគីប្រមាណជា ១លាន ៥សែននាក់កំពុងរស់នៅទីនោះ និងដែលភាគច្រើនជាសកម្មជនគាំទ្រលោកអ៊ែរដូហ្កាន។
យ៉ាងណាក៏ដោយ រឿងរ៉ាវថ្មីមួយនេះគ្រាន់តែជាការយកប្រេងចាក់លើពំនូកភ្លើងដែលកំពុងឆេះស្រាប់ប៉ុណ្ណោះ ព្រោះទំនាក់ទំនងរវាងទីក្រុងប៊ែរឡាំង និងអង់ការ៉ាធ្លាប់បានបំពុលដោយរឿងពីរទៀតរួចទៅហើយនាពេលថ្មីៗកន្លងមក ទី១ ការដែលរដ្ឋអំណាចតួកគីបានចាប់អ្នកកាសែតជនជាតិអាល្លឺម៉ង់ដើមកំណើតតួកគីម្នាក់ញាត់គុក និងទី២ ការដែលសភាអាល្លឺម៉ង់បានបោះឆ្នោតអនុម័តលើសេចក្តីសម្រេចចិត្តមួយទទួលស្គាល់អំពើប្រល័យពូជសាសន៍លើជនជាតិអាមេនី។ សំណួរដែលចោទពេលនេះគឺថា តើអ្នកណាឈ្នះ និងអ្នកណាចាញ់នៅក្នុងសង្រ្គាមពាក្យសម្តីរវាងតួកគី និងអាល្លឺម៉ង់ពេលនេះ?
បើពិនិត្យមើលមួយភ្លែតទៅឃើញថា ភាពតានតឹងរវាងអាល្លឺម៉ង់ និងតួកគីជារឿងផ្ទៃក្នុងរវាងប្រទេសទាំងពីរសុទ្ធសាធ។ តែបើពិនិត្យមើលឲ្យបានស៊ីជម្រៅបន្តិចទៅឃើញថា តួកគីបានក្តៅក្រហាយនឹងសហភាពអឺរ៉ុបដែលបានលូកលាន់ក្នុងកិច្ចការផ្ទៃក្នុងរបស់តួកគី ពិសេសតាំងពីក្រោយរដ្ឋប្រហារយោធាទម្លាក់លោកអ៊ែរដូហ្កានមិនបានសម្រេចកាលពីថ្ងៃទី១៥ កក្កដា ឆ្នាំ ២០១៦។ អឺរ៉ុបមិនញញើតនឹងផ្តន្ទាទោសលោកអ៊ែរដូហ្កានពីបទបានប្រើកណ្តាប់ដៃដែកជម្រះបញ្ជីលើជនណាដែលជាប់សង្ស័យក្នុងរឿងរដ្ឋប្រហារមិនបានសម្រេច។ ទីក្រុងអង់ការ៉ាបានចោទទីក្រុងប៊ែរឡាំងពីបទបានផ្តល់ជម្រកឲ្យក្រុមមន្រ្តីស៊ីវិល និងយោធាតួកគីដែលជាប់ចោទក្នុងរឿងរៀបចំរដ្ឋប្រហារទម្លាក់លោកអ៊ែរដូហ្កានមិនបានជោគជ័យ។
ទោះជាយ៉ាងនេះក្តីគេសង្កេតឃើញជារួមថា ប្រតិកម្មរបស់អាល្លឺម៉ង់ឆ្លើយតបនឹងកំហឹងឆេវឆាវរបស់លោកអ៊ែរដូហ្កានពេលនេះនៅមានកម្រិត មានការថ្លឹងថ្លែង និងមានលក្ខណៈផ្លូវទូត។ នេះក៏ដោយសារថា អាល្លឺម៉ង់មិនចង់ផ្តាច់ទំនាក់ទំនងដាច់ផឹងជាមួយតួកគី ហើយក៏មិនចង់បញ្ឆេះឲ្យមានកំហឹងពីសហគមន៍តួកកីក្នុងទឹកដីអាល្លឺម៉ង់ដែរ។ ម្យ៉ាងទៀតក្រោមភ្នែក ច្រមុះរបស់អាល្លឺម៉ង់ក៏ដូចជាអឺរ៉ុប តួកគីដែលជាសមាជិករបស់អង្គការអូតង់ និងជាដៃគូបានដើរតួនាទីសំខាន់ណាស់ក្នុងការចូលរួមកាត់បន្ថយចំនួនអ្នកសុំសិទ្ធិជ្រកកោណលើទឹកដីអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ