ទិវាសិទ្ធិនារី ៖ ប្រាក់ខែស្ត្រីនៅតែទាប និងមើលកូនច្រើន ជាងបុរស
វិសមភាពស្ត្រីនិងបុរសត្រូវបានកាត់បន្ថយ ជាទូទៅ ! ប៉ុន្តែទោះបានរៀនចេះជ្រៅជ្រះ មានសញ្ញាប័ត្រខ្ពស់ ក៏ស្ត្រីនៅតែទទួលបា្រក់ខែទាប និងចំណាយពេលមើលថែកូនច្រើនជាងបុរស ហើយក្រចូលនិវត្តន៍ ! នេះបើតាមលទ្ធផលសិក្សារបស់វិទ្យាស្ថានស្ថិតិបារាំង ចេញផ្សាយនាឱកាសទិវាសិទ្ធិនារីអន្តរជាតិ ៨ មីនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ដំណើរជីវិតស្រ្តីនិងបុរសមិនដូចគ្នាទេ ! ថ្វីបើស្ត្រីអាចជ្រៀតចូលក្នុងទីផ្សារការងារបានប្រសើរជាងមុន នាពេលបច្ចុប្បន្ននេះក្តី ក៏ភាពខុសគ្នារវាងស្ត្រីនិងបុរសនៅមានច្រើន សម្រាប់គ្រប់វ័យ។ នៅបឋមសិក្សាក្មេងស្រីរៀនពូកែជាងក្មេងប្រុស ! មានសញ្ញាប័ត្រខ្ពស់ជាងបុរស ស្ត្រីភាគច្រើន (៥៥%)រៀនដល់ថ្នាក់ឧត្តមសិក្សា និងបន្តការសិក្សាបានវែងឆ្ងាយជាង។ ប៉ុន្តែស្ត្រីមានវត្តមានតិចក្នុងវិស័យវិទ្យាសាស្ត្រ និងពិបាករកការងារធ្វើជាងបុរស នៅពេលរៀនចប់ភ្លាម។ នេះបើការសិក្សារបស់វិទ្យាស្ថានជាតិផ្នែកស្ថិតិបារាំង។
គម្លាតរវាងបុរសនិងស្ត្រី មាននិន្នាការថយចុះជាលំដាប់ ! គំនិតធ្លាប់មើលស្រាលសមត្ថភាពស្ត្រីក៏បានជ្រុះបាត់ជាបន្តបន្ទាប់។ មានមនុស្សប្រមាណតែ២២%ប៉ុណ្ណោះ នៅឆ្នាំ២០១២ដែលគិតថាស្ត្រីវិលចង្ក្រានមិនជុំ គួរតែនៅធ្វើការផ្ទះ។ នៅឆ្នាំ២០១៥ ស្ត្រី អាយុ១៥ទៅ៦៤ឆ្នាំចំនួន៦៨% សកម្មក្នុងទីផ្សារការងារ ទល់នឹងបុរស៧៦%។ ជាគម្លាតដ៏តិច ត្រឹម៨ពិន្ទុ បើប្រៀបទៅនឹង៣១ពិន្ទុកាលពី៤០ឆ្នាំមុន។
តាំងពីពាក់កណ្តាលទសវត្សរ៍ឆ្នាំ១៩៧០មក អត្រាស្ត្រីអត់ការងារធ្វើខ្ពស់ជាងបុរស តែចាប់ពីឆ្នាំ២០១៣មក គឺមាននិន្នាការផ្ទុយវិញ បុរស (១០,៥%)អត់ការងារធ្វើច្រើនជាងស្រ្តី (៩,៥%) នៅឆ្នាំ២០១៥។
ចម្លែកអ្វីតែគម្លាតផ្នែកប្រាក់បៀវត្សរ៍ ដែលរួមតូចយ៉ាងយឺតបំផុត។ រាប់ទាំងក្នុងវិស័យឯកជននិងរដ្ឋ ប្រាក់ខែស្ត្រីទាបជាងបុរស២៤% នៅក្នុងឆ្នាំ២០១៤ ទល់នឹង២៧%កាលពីឆ្នាំ១៩៩៥។ ស្ត្រីរងផលប៉ះពាល់ខ្លាំងជាងគេពីការកាត់បន្ថយសកម្មភាពការងារ។ ស្រ្តីមានសកម្មភាពមើលថែកូន ដល់៨៥%បើមានកូនម្នាក់ឬពីរនាក់ ៧៣%បើមានកូនច្រើនលើសពីបី។ ចំណែកកិច្ចការផ្ទះដែលជានិស្ស័យរបស់នារី នៅតែជាបន្ទុកដ៏ធំរបស់ស្ត្រីជានិច្ច។
រហូតដល់វ័យចូលនិវត្ត ក៏គេនៅតែសង្កេតឃើញមានភាពខុសគ្នាខ្លាំងរវាងស្ត្រីនិងបុរសដដែល ៖ ជាមធ្យមស្ត្រីបានសម្រាកនិវត្តនៅអាយុ៦១,១ឆ្នាំ ពោលគឺយឺតជាមនុស្សប្រុសមួយឆ្នាំ (៦០,២ឆ្នាំ) ជាមួយនឹងគម្លាតប្រាក់ឧបត្ថម្ភទាបជាងបុរសដល់ទៅ៤២% (ស្រី៨៩១អឺរ៉ូក្នុងមួយខែ ទល់នឹង ១៥៤៣អឺរ៉ូសម្រាប់បុរស)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ