តើបារាំង អ៊ីតាលី អាល្លឺម៉ង់ និងអេស្ប៉ាញ ចង់បានគំរូអឺរ៉ុបបែបណាសម្រាប់អនាគត ?
ចុះផ្សាយនៅថ្ងៃ៖
ស្តាប់ - ០៤:១៨
តើត្រូវរៀបចំសហភាពអឺរ៉ុបទាំង២៧យ៉ាងណា នៅពេលគ្មានអង់គ្លេស ? នេះជាសំណួរដែលមេដឹកនាំអឺរ៉ុបកំពុងស្វែងរកចម្លើយ នៅក្នុងជំនួបកាលពីថ្ងៃទី ៦ មីនា នៅជាយទីក្រុងប៉ារីស ក្រោមគំនិតផ្តួចផ្តើមរបស់ប្រធានាធិបតីបារាំងលោក ហ្វ្រង់ស័រ ហូឡង់ François Hollande។ ជាជំនួបកំពូលចតុភាគី រវាងប្រធានាធិបតីបារាំង ប្រមុខរដ្ឋាភិបាលអាល្លឺម៉ង់ អង់ហ្គឺឡា មែរកិល Angela Merkel ប្រមុខរដ្ឋាភិបាលអ៊ីតាលី លោក បៅឡូ ចិនទីឡូនី Paolo Gentiloni និងអេស្ប៉ាញ លោក ម៉ារីយាណូ រ៉ាហយ Mariano Rajoy។ មេដឹកនាំប្រទេសដែល ធំនិងមានប្រជាជនច្រើនជាងគេនៅអឺរ៉ុបទាំងបួន ចង់គូសវាសអនាគតអឺរ៉ុប ក្នុងសម្មតិកម្ម « សហភាពតែមួយ តែមានច្រើនក្រុម »។
នៅសប្តាហ៍នេះ ជាជំនួបកំពូលចតុភាគី។ តែប្រមុខដឹកនាំទាំងបួននៃក្រុមប្រទេសធំៗជាងគេបំផុតរបស់អឺរ៉ុប នឹងជួបជាមួយសមភាគីជាសមាជិកទាំងអស់ នៅថ្ងៃទី ២៥មីនាខាងមុខ ចាប់ពីថ្ងៃព្រហស្បតិ៍នេះទៅ ដែលជាដំណាក់កាលថ្មីមួយទៀតនៃនៃការផ្តល់សន្ទុះថ្មីដល់អឺរ៉ុប មុននឹងឈានដល់ជំនួបកំពូលសហភាពអឺរ៉ុប នៅថ្ងៃទី ២៥មីនា។ ថ្ងៃប្រារព្វខួបទី៦០ឆ្នាំនៃការបង្កើតសន្ធិសញ្ញាក្រុងរ៉ូម (អឺរ៉ុប)។
ជំនួបចតុភាគី ក្រៅផ្លូវការនេះ ត្រូវបានគេរៀបចំឡើង ដើម្បីបង្ហាញជាមុន នូវគំរូអឺរ៉ុបមួយដែល៦០ឆ្នាំក្រោយ នឹងអាចមានដំណើរទៅមុខ និងអាចសម្រេចទ្រទ្រង់សហភាពបាន ដោយមិនចាំបាច់ត្រូវការព្រមព្រៀង និងចូលរួមសហការរួមគ្នាពីសមាជិកទាំង២៧ឡើយ។
ប្រធានាធិបតីបារាំង ប្រមុខដឹកនាំរដ្ឋាភិបាលអាល្លឺម៉ង់ អ៊ីតាលី និងអេស្ប៉ាញ ប្រទេសដែលមានសេដ្ឋកិច្ចខ្លាំងជាងគេនៅអឺរ៉ុប បានឈរទន្ទឹមគ្នាបួននាក់ បួងសួងតាមរយៈសុន្ទរកថាម្តងម្នាក់ៗ បញ្ជាក់ថាសហភាពអឺរ៉ុប មានច្រើនទស្សនៈ និងអាចសហការជាក្រុមតូចៗ ដើម្បីដំណើរទៅមុខ។
“មិនចាំបាច់ដូចគ្នាបានរួមគ្នាបានឡើយ” នេះជាប្រសាសន៍របស់លោកប្រធានាធិបតីបារាំងដែលបានថ្លែងមុនគេ ដោយសង្គត់ធ្ងន់ទៀតថា កិច្ចសហប្រតិបត្តិការអាចមិនដូចគ្នា ធ្វើតែជាមួយប្រទេសនេះ ហើយអត់ប្រទេសនោះ តែការធ្វើបែបនេះគឺដើម្បីឱ្យប្រទេសមួយចំនួនអាចធ្វើការជាមួយគ្នាបាន បានលឿន បានឆ្ងាយនិងស៊ីជម្រៅ ជាពិសេសលើវិស័យការពារជាតិ ដោយគ្មានគំនិតច្រានសមាជិកដទៃចេញ ហើយគ្មានប្រទេសផ្សេងទៀតអាចជំទាស់បាន។ តែក្នុងបរិបទដែលអាមេរិករបស់លោកត្រាំ បង្ហាញភាពសង្ស័យលើអឺរ៉ុប និងអូតង់ និងការគំរាមកំហែងពីរុស្ស៊ី សហភាពអឺរ៉ុបចាំបាច់និងមានភាពបន្ទាន់ត្រូវតែដោះស្រាយវិស័យការពារជាតិ ជាក្រុមតូចៗ។
គ្រប់ឃ្លាឃ្លោងសុទ្ធតែមានការសំយោគគ្នា ប៉ុន្តែ គ្មានទេ សេចក្តីថ្លែងការណ៍រួម ! ព្រោះមេដឹកនាំអឺរ៉ុបទាំងបួន ចង់បញ្ចៀសឱ្យបានគំនិតម៉ៃថា ពួកគាត់ចង់ធ្វើជាមេចាត់ចែងអឺរ៉ុប សម្រេចអ្វីមួយហើយចាំឱ្យសមាជិក២៤ទៀត ធ្វើតាម។ ក្រៅអំពីភាពខុសគ្នានៃស្ទីល និងរបៀបបញ្ចេញយោបល់ ខ្លឹមសារណែនាំក៏ផ្តោតទៅលើប្រធានបទខុសគ្នាៗដែរ។
“នឹងមានអឺរ៉ុបជាក្រុមផ្សេងៗគ្នា ! មិនប្រាកដថាមានសមាជិកទាំងអស់អាចចូលរួម គ្រប់លើក និងគ្រប់ដំណាក់កាលទេ !” នេះបើតាមសំដីលោកស្រីប្រមុខរដ្ឋាភិបាល អាល្លឹម៉ង់ ដោយលម្អិតថា “ទ្វារនៅតែចំហចាំទទួលសមាជិកណាដែលចង់ចូលតាមក្រោយ។ អឺរ៉ុបត្រូវតែរក្សាភាពចម្រុះរបស់ខ្លួន !”។
ចំណែកលោកនាយករដ្ឋមន្ត្រីអ៊ីតាលីបានលើកឡើងអំពីភាពចាំបាច់នៃការរក្សាអឺរ៉ុបបែបសង្គមនិយម ដែលគិតគូរខ្លាំងដល់កំណើនសេដ្ឋកិច្ច តាមរយៈការវិនិយោគធំៗ។ អឺរ៉ុបត្រូវការបន្ស៊ីគ្នាឱ្យកាន់តែប្រសើរឡើងនិងស៊ីជម្រៅ ក្នុងនយោបាយរូបិយបណ្ណ និងពន្ធដារ។ នេះជាទស្សនៈរបស់នាយករដ្ឋមន្ត្រីអេស្ប៉ាញ។
ប្រទេសធំទាំងបួននេះ មានគំនិតស្របគ្នាលើសេណារីយោអឺរ៉ុបមានច្រើនបក្សពួក។ នេះជាសម្មតិកម្មមួយក្នុងចំណោមសម្មតិកម្មទាំង៥ ដែលនឹងត្រូវលើកទៅបង្ហាញប្រធានគណៈកម្មការអឺរ៉ុប ដែលហាក់ដូចជាព្រមព្រៀងតាមដែរទៅហើយ។ ពេលនេះប្រមុខដឹកនាំ ទាំងបួន ចង់ប្រែក្លាយជំនួបកំពូលចតុភាគី ជានិម្មិត្តរូបនៃការសន្យាផ្តល់សន្ទុះថ្មីដល់អឺរ៉ុប។ ប៉ុន្តែ មានប្រទេសសមាជិកជាច្រើនទៀត មិនស្របតាមគំនិតរបស់ក្បាលម៉ាស៊ីនអឺរ៉ុបបួននេះទេ។ ដូច្នេះវាអាចនឹងមានភាពប្រេះឆាគ្នារវាងអឺរ៉ុបប៉ែកខាងលិច និងខាងកើត។ ហើយម្យ៉ាងទៀត ក្នុងកាលៈទេសៈបច្ចុប្បន្នហាក់ដូចជាពុំសូវមានអំណោយទានទេ ! តាមការពិតទៅ បុរសរដ្ឋទាំងបួននេះ សុទ្ធតែកំពុងស្ថិតក្នុងស្ថានភាពនយោបាយផុយស្រួយទាំងអស់គ្នា ៖
លោកហ្វ្រង់ស័រ ហូឡង់ ជាប្រធានាធិបតីផុតអាណត្តិ នឹងត្រូវដើរចេញពីតំណែងនៅរវាងពីរខែទៀត។ លោកស្រី មែរកិល របស់អាល្លឺម៉ង់ ក៏មិនប្រាកដថានឹងជាប់ឆ្នោតជាថ្មី នៅខែកញ្ញាខាងមុខ។ ប្រមុខរដ្ឋាភិបាលអ៊ីតាលី ក៏មិនគ្រាន់បើ ! លោកកំពុងប្រឈមនឹងហានិភ័យតោងអំណាចមិនជាប់ដល់ផុតអាណត្តិនៅខែកុម្ភៈ២០១៨។ ចំណែកលោកនាយករដ្ឋមន្ត្រីអេស្ប៉ាញ អ្នកស្តាំនិយមរូបនេះអាចដឹកនាំប្រទេសបានដោយមានសំឡេងភាគច្រើននៅក្នុងសភា ក៏ព្រោះតែមានជំនួយខាងក្រៅ គឺពីបក្សសង្គមនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ