អង្គការសហប្រជាជាតិចោទតួកគីពីបទរំលោភសិទ្ធិមនុស្សធ្ងន់ធ្ងន់នៅក្នុងតំបន់គួដឌីស្ថាន
នៅថ្ងៃសុក្រ ទី១០ មីនា ឧត្តមស្នងការដ្ឋានសិទ្ធិមនុស្សអង្គការសហប្រជាជាតិបានចេញផ្សាយរបាយការណ៍មួយស្តីពីសកម្មភាពរបស់រដ្ឋាភិបាលតួកគីនៅក្នុងតំបន់កាន់កាប់ដោយគណបក្សពលករគួដឌីស្ថាន PKK។ របាយការណ៍បានបរិហារចាស់ដៃលើទង្វើឃាតកម្ម ទារុណកម្ម ការបាត់ខ្លួនដោយបង្ខំ និងទង្វើបំផ្លិចបំផ្លាញក្រោមទ្រង់ទ្រាយធំរៀបចំដោយកម្លាំងទ័ពតួកគីទៅលើក្រុមសមាជិក និងក្រុមសកម្មជនរបស់ PKK ចន្លោះខែកក្កដា ឆ្នាំ ២០១៥ និងខែធ្នូ ឆ្នាំ ២០១៦ នៅប៉ែកអាគ្នេយ៍។ នៅក្នុងន័យនេះ ឧត្តមស្នងការសិទ្ធិមនុស្សអង្គការសហប្រជាជាតិបានទាមទារឲ្យបើកការស៊ើបអង្កេតឯករាជ្យមួយជាបន្ទាន់។
ចុះផ្សាយនៅថ្ងៃ៖
ស្តាប់ - ០២:២០
របាយការណ៍របស់ឧត្តមស្នងការដ្ឋានសិទ្ធិមនុស្សអង្គការសហប្រជាជាតិមួយនេះបានធ្វើឡើង ដោយផ្អែកលើរូបភាពទទួលបានពីផ្កាយរណប បទសម្ភាសន៍ជាមួយជនរងគ្រោះ ឬក្រុមគ្រួសាររបស់គេ និងសាក្សីមួយចំនួនទៀត រួមទាំងព័ត៌មានជាច្រើនផ្តល់ដោយក្រុមអង្គការក្រៅរដ្ឋាភិបាល។ ការធ្វើរបាយការណ៍ដោយសំអាងលើទិន្នន័យទាំងអស់នេះក៏ដោយសារតែរដ្ឋអំណាចតួកគីមិនអនុញ្ញាតឲ្យស្ថាប័នសិទ្ធិមនុស្សអន្តរជាតិមួយនេះចូលទៅធ្វើការងារផ្ទាល់នៅនឹងកន្លែងទេ។
លោក Zeid Ra’ad Al Hussein ឧត្តមស្នងការសិទ្ធិមនុស្សបានថ្លែងឲ្យដឹងថា រដ្ឋាភិបាលតួកគីហាមមិនឲ្យអង្គការសិទ្ធិមនុស្សអន្តរជាតិចូលក្នុងទឹកដីតួកគី ព្រមទាំងបដិសេធលើការចោទប្រកាន់នៅក្នុងរបាយការណ៍ទៀតផង។ តាមលោក Al Hussein ការស៊ើបអង្កេតឯករាជ្យមួយជារឿងចាំបាច់មិនអាចខ្វះបាន និងមានសារៈសំខាន់ខ្លាំងណាស់។ នៅក្នុងរបាយការណ៍នោះ ឧត្តមស្នងការដ្ឋានសិទ្ធិមនុស្សបានសម្តែងក្តីបារម្ភ និងទាញសញ្ញាអាសន្នពីការដែលកម្លាំងទ័ពតួកគីបានប្រើគ្រឿងសព្វាវុធធុនធ្ងន់ដើម្បីកម្ទេចលំនៅដ្ឋានរបស់ក្រុមសកម្មជននៃគណបក្សពលករគួដឌីស្ថាននៅប៉ែកអាគ្នេយ៍ប្រទេស។
ចន្លោះខែកក្កដា ឆ្នាំ ២០១៥ និងដំណាច់ឆ្នាំ ២០១៦ កម្លាំងទ័ពតួកគីបានបើកប្រតិបត្តិការវាយប្រហារក្រោមទ្រង់ទ្រាយធំលើតំបន់ PKK ដោយបំផ្លាញផ្ទះសម្បែងរាប់សិបខ្នង និងកម្ទេចបំបាត់ភូមិ ស្រុកទាំងមូលដោយជំរុញឲ្យមានជនភៀសខ្លួនពី ៣០០ ០០០ ទៅ ៥០០ ០០០នាក់។ តាមរបាយការណ៍ដដែល មានមនុស្ស ២ ០០០នាក់ ក្នុងនោះមាន ៨០០នាក់ជាកម្លាំងសន្តិសុខ និងជនស៊ីវិលចំនួន ១ ២០០នាក់ត្រូវបានសម្លាប់ ហើយក្នុងចំណោមជនស៊ីវិលស្លាប់ មានភាគច្រើនបានរួមចំណែកនៅក្នុងសកម្មភាពអហិង្សាប្រឆាំងនឹងរដ្ឋាភិបាលតួកគី។
យ៉ាងណាក៏ដោយ រដ្ឋាភិបាលតួកគីបានបដិសេធចោលទាំងស្រុងលើរបាយការណ៍នោះដោយអះអាងថា កម្លាំងទ័ព និងប៉ូលិសរបស់ខ្លួនមិនជាប់ពាក់ព័ន្ធនឹងរឿងរំលោភសិទ្ធិមនុស្សទេ។ នៅក្នុងសេចក្តីប្រកាសព័ត៌មានមួយ ក្រសួងការបរទេសតួកគីបានចាត់ទុករបាយការណ៍របស់ឧត្តមស្នងការដ្ឋានសិទ្ធិមនុស្សអង្គការសហប្រជាជាតិថា ជារបាយការណ៍ដែលបានធ្វើឡើងដោយផ្អែកលើព័ត៌មានមិនពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ