តួកគីលង់ខ្លួនកាន់តែជ្រៅក្នុងជម្លោះជាមួយប្រទេសនៅអឺរ៉ុប
សង្រ្គាមពាក្យសំដី និងជម្លោះការទូតរវាងតួកគី ជាមួយនឹងប្រទេសនៅអឺរ៉ុប កាន់តែធ្លាក់ធ្ងន់ធ្ងរពីមួយថ្ងៃ ទៅមួយថ្ងៃ។ បន្ទាប់ពីចោទរដ្ឋាភិបាលហូឡង់ថា ជាសំណល់របស់ណាហ្ស៊ី ប្រធានាធិបតីតួកគី លោករេស៊ីប អ៊ែរដូហ្កាន នៅ បាន ចោទប្រកាន់ប្រទេសហូឡង់ថា ជាអ្នកទទួលខុសត្រូវលើការសម្លាប់រង្គាលលើប្រជាជនអ៊ីស្លាម នៅក្នុងសង្រ្គាមប្រទេសអតីតយូហ្គោស្លាវី។ សង្រ្គាមពាក្យសំដីរវាងតួកគី និងបណ្តាប្រទេសអឺរ៉ុប នៅថ្ងៃពុធ ទី១៥មីនា បានឈានរាលដាល ទៅដល់ការផ្តាច់ទំនាក់ទំនងសហប្រតិបត្តិការរវាងតួកគី ជាមួយសមាជិកអង្គការអូតង់។
ចុះផ្សាយនៅថ្ងៃ៖
ពីរសប្តាហ៍មកនេះ តួកគីជេរប្រទេច ផ្តាសា មិនលោះពេល បណ្តាប្រទេសអឺរ៉ុប ជាពិសេស អាល្លឺម៉ង់ ហើយនិងហូឡង់ ដែលបានហាមឃាត់មិនឲ្យរដ្ឋមន្រ្តីតួកគី ចូលធ្វើឃោសនា ពីបោះឆ្នោតប្រជាមតិតួកគី នៅក្នុងចំណោមប្រជាជនតួកគី ដែលរស់នៅ បរទេស។ “អាល្លឺម៉ង់ អនុវត្តវិធីសាស្រ្តរបស់ពួកណាហ្ស៊ី។ អាល្លឺម៉ង់កំពុងគាំទ្រពួកភេរវនិយម និងកំពុងជំរុញ ឲ្យមានសំឡេង ទេ នៅក្នុងការបោះឆ្នោតប្រជាមតិនៅតួកគី” នេះជាការលើកឡើងរបស់ប្រធានាធិបតីតួកគី លោក រេស៊ីប អ៊ែរដូហ្កាន ដែលបានចោទប្រកាន់ផងដែរ ប្រទេសហូឡង់ថា ជាប្រទេសសំណល់ពីពួកណាហ្ស៊ី និងហ្វាស៊ីស។
នៅល្ងាចថ្ងៃអង្គារ ប្រមុខដឹកនាំតួកគី នៅបានលើកនិយាយពីតួនាទីរបស់ប្រទេសហូឡង់ នៅក្នុងការសម្លាប់រង្គាលប្រជាជនកាន់សាសនាអ៊ីស្លាម ៨ពាន់នាក់ នៅប្រទេសបូស្នី អ៊ែហ្សេហ្គោវីន។ នៅឆ្នាំ ១៩៩៥ កងទ័ពហូឡង់ ក្នុងនាមជាកងទ័ពមួយខៀវរបស់អង្គការសហប្រជាជាតិ ត្រូវបានគេបន្ទោសថា មិនបានជួយអន្តរាគមន៍ ដើម្បីកុំឲ្យទាហានស៊ែបសម្លាប់ប្រជាជនបូស្នី។
សម្រាប់ប្រធានគណៈកម្មការអឺរ៉ុប លោកហ្សង់ក្លូត ហ្សុងគ័រ សំដីចោទប្រកាន់ថា អាល្លឺមម៉ង់ និងហូឡង់ថា ជាពួកណាហ្ស៊ី ជារឿងដែលគេមិនអាចទទួលយកបាន។ តាមលោកហ្សុងគ័រ សំដីរបស់លោកប្រធានាធិបតីតួកគី មិនស៊ីសង្វាក់គ្នាទៅនឹងសំណើរបស់តួកគី ដែលចង់ក្លាយជាសមាជិកអឺរ៉ុបនោះទេ។ ប្រធានរដ្ឋបាលសហព័ន្ធអាល្លឺម៉ង់ លោកPerter Almaier ដែលស្និទ្ធនឹងលោកស្រីនាយករដ្ឋមន្រ្តីអាល្លឺម៉ង់វិញ បានប្រតិកម្មតបវិញ នឹងតួកគី ដោយបានគំរាម ថា នឹងហាមមិនឲ្យមន្រ្តីជាន់ខ្ពស់តួកគី ដាក់ជើងជាន់ទឹកដីអាល្លឺម៉ង់។ ទោះភាពតានតឹងកើនឡើងកាន់តែខ្លាំង រដ្ឋមន្រ្តីការពារអាល្លឺម៉ង់បានវាយតម្លៃថា តួកគីត្រូវតែនៅបន្តជាសមាជិករបស់អូតង់។
អូតង់នៅថ្ងៃពុធម្សិលមិញ បានជំរុញ ឲ្យតួកគី ដែលជាសមាជិកសំខាន់មួយរបស់អូតង់ប្រញាប់ដោះស្រាយបញ្ហាជាមួយប្រទេសអូទ្រីស បន្ទាប់ពីតួកគី បានចេញមុខ ប្រឆាំង មិនឲ្យមានកម្មវិធីសហប្រតិបត្តិការរវាងអូតង់ ជាមួយអូទ្រីស។ អស់ជាច្រើនខែមកហើយ តួកគីដែលមានវត្តមានទ័ពច្រើនជាងគេនៅក្នុងអង្គការអូតង់ បន្ទាប់ពីអាមេរិក បានប្រឆាំងមិនឲ្យអូតង់ ធ្វើសហប្រតិបត្តិការយោធាជាមួយ អូទ្រីស ក្នុងហេតុផលថា អូទ្រីស បានចេញមុខប្រឆាំង ទាមទារមិនឲ្យអឺរ៉ុបទទួលយកតួកគីជាសមាជិក។ អូទ្រីសមិនមែនជាសមាជិករបស់អូតង់ ប៉ុន្តែ បានសហការជាមួយអង្គការសម្ព័ន្ធអូតង់ ក្នុងនាមជាប្រទេសដៃគូ ដើម្បីពង្រាយទ័ពជាមួយអូតង់ ក្នុងគោលដៅ ពង្រឹងសមត្ថភាពយោធារបស់ខ្លួន ជាពិសេស នៅក្នុងកាលៈទេសៈ ដែលប្រទេសអឺរ៉ុបខាងកើត កំពុងបារម្ភពីការឈ្លានពានរបស់រុស្ស៊ី នៅក្រោយការកាត់លេបយកទឹកដីគ្រីមេរបស់អ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ