ហ្គូយ៉ានបារាំង គាំងសកម្មភាពដោយកូដកម្មទូទៅ
បន្ទាប់ពីព្យុះកញ្ជ្រោលដោយចរន្តបាតុកម្មអស់មួយសប្តាហ៍ នៅថ្ងៃចន្ទនេះ ក្រោមការអំពាវនាវរបស់សហជីពទាំង៣៧ របស់ហ្គូយ៉ាន ដែនដីបារាំងនៅទ្វីបអាមេរិកខាងត្បូង ត្រូវជាប់គាំងស្តូកស្តឹង ដោយកូដកម្មទូទៅ។ ប្រតិភូអន្តរក្រសួង ជំនួសមុខឱ្យនាយករដ្ឋមន្ត្រី នឹងចុះទៅចរចាដោះស្រាយវិបត្តិដល់ហ្គូយ៉ាន យ៉ាងយូរនៅចុងសប្តាហ៍នេះ។ រដ្ឋាភិបាលក្រុងប៉ារីស បានសម្រេចបញ្ចេញសកម្មភាពភ្លាម ដោយខ្លាចមានអ្នកឆ្លៀតយកស្ថានការណ៍ហ្គូយ៉ានទៅ បំរើជាប្រយោជន៍នៃក្នុងការបោះឆ្នោតប្រធានាធិបតី ដែលនឹងប្រព្រឹត្តទៅនៅមិនដល់មួយខែទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
លោកនាយករដ្ឋមន្ត្រីបារាំង Bernard Cazeneuve បានសន្យាចុះហត្ថលេខាលើកិច្ចព្រមព្រៀងអនាគត ជាមួយតំណាងហ្គូយ៉ាន ក្នុងពេលដ៏ឆាប់ៗបំផុត។ ប្រធានាធិបតីលោក ហ្វ្រង់ស័រ ហូឡង់ ដែលកំពុងបំពេញទស្សនកិច្ចមួយជុំនៅអាស៊ី បានប្រកាសអំពាវនាវពីប្រទេសសិង្ហបុរី ថាអាទិភាពដំបូងគឺប្រយុទ្ធប្រឆាំងអស្ថិរភាព ដោយពង្រឹងកម្លាំងនិងមធ្យោបាយទប់ស្កាត់អំពើហិង្សាដែលកំពុងរាលដាល នៅហ្គូយ៉ាន។
ហ្គូយ៉ាន ដែនដីបារាំងនៅឯនាយសមុទ្ទ ក្នុងទ្វីបអាមេរិកខាងត្បូង ដែលមានប្រជាជនរស់នៅសរុប ប្រមាណ២៦០០០០នាក់ ត្រូវគាំងសកម្មភាពសេដ្ឋកិច្ច សង្គមស្ទើរតែទាំងស្រុង សាលារៀនត្រូវបិទ ផ្លូវថ្នល់ត្រូវរារាំង ចរាចរណ៍ផ្លូវអាកាសត្រូវលុបជើងហោះហើររបស់ខ្លួន ការបង្ហោះយានអវកាសដែលជាសកម្មភាពដ៏សំខាន់ ក៏ត្រូវផ្អាក … ដោយចលនាបាតុកម្ម។
បាតុកម្មបានចំធ្វើឡើងដើម្បីទាមទារឱ្យមានការគិតគូរដល់បញ្ហាសុខាភិបាល អប់រំ អន្តោប្រវេសន៍ សេដ្ឋកិច្ច អត្រាអ្នកអត់ការងារធ្វើខ្ពស់ (យុវជនអាយុក្រោម២៥ឆ្នាំ៤០%អត់ការងារធ្វើ) និងពិសេសបញ្ហាសន្តិសុខ។ ក្នុងរយៈពេលពីរឆ្នាំចុងក្រោយនេះ ចំនួនឃាតកម្មបានកើនឡើងយ៉ាងខ្លាំង ដល់ទៅ ៤៨ករណី នៅឆ្នាំ២០១៦។ ភាពតានតឹងកាន់តែប៉ោងខ្លាំងទៀត នៅពេលមានការបង្កើតក្រុមពាក់មុខប្រឆាំងនឹងជនល្មើស ដោយខ្លួនឯង ដោយមិនរង់ចាំអាជ្ញាធរ កាលពីពីរខែមុន។ ការចរចាជាមួយតំណាងរដ្ឋាភិបាលថ្នាក់តំបន់កន្លងមកមិនបានលទ្ធផលអ្វីទាំងអស់។ ជាមួយនឹងការអំពាវនាវឱ្យរក្សាភាពស្ងប់ស្ងាត់ និងជ្រើសរើសផ្លូវចរចា ប្រតិភូអន្តរក្រសួងនឹងទៅចុះផ្ទាល់ ដល់ហ្គូយ៉ាន នៅចុងសប្តាហ៍នេះ។
ក្នុងពេលរង់ចាំនេះ រដ្ឋាភិបាលបានផ្តើមធ្វើសេចក្តីប្រកាសផ្សេងៗ ស្របតាមសេចក្តីទាមទាររបស់ពលរដ្ឋ ដើម្បីបន្ធូរបន្ថយសម្ពាធ និងបានបង្កើនចំនួននគរបាល ប៉ូលិស ព្រមទាំងទម្លាយកញ្ចប់ថវិកាជួយមន្ទីរពេទ្យក្រុង។
ការពួតកម្លាំងគ្នាជាធ្លុងមួយរវាងប្រជាពលរដ្ឋ សហជីព ព្រមទាំងតំណាងរាស្ត្រមួយចំនួន ធ្វើកូដកម្មទូទៅ មួយខែមុនការបោះឆ្នោតប្រធានាធិបតី បានជំរុញឱ្យរដ្ឋាភិបាលប៉ារីសត្រូវតែបញ្ចេញសកម្មភាព ដើម្បីកុំឱ្យមានការយកចំណេញនយោបាយបោះឆ្នោត ពីវិបត្តិនៅហ្គូយ៉ាន។ ព្រោះគេបានឮរួចមកហើយ ការរិះគន់មកពីខាងបេក្ខជនស្តាំនិយម ថា ស្ថានភាពនៅហ្គូយ៉ានជាបរាជ័យនៃនយោបាយរបស់លោកហ្វ្រង់ស័រ ហូឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ