កំរិតការកាប់ព្រៃឈើ នយោបាយថ្មីរបស់អឺរ៉ុបដើម្បីអាកាសធាតុ
ចុះផ្សាយនៅថ្ងៃ៖
ស្តាប់ - ០៤:៣៨
តើត្រូវការពារព្រៃឈើអឺរ៉ុប ស្របតាមនយោបាយការពារបរិស្ថានរបស់ទ្វីប ឬក៏ត្រូវបង្កើនផលិតកម្មព្រៃឈើ ? ក្នុងខណៈដែលពិភពលោកកំពុងគិតគូរអំពីបញ្ហាអាកាសធាតុ និងការឡើងកម្តៅនៃភពផែនដី តើវិស័យព្រៃឈើ មានតួនាទីយ៉ាងណា ? នេះជាសំណួរដែលគណៈកម្មការអឺរ៉ុបកំពុងធ្វើការតស៊ូមតិយ៉ាងពុះកញ្ជ្រោលជាមួយបណ្តាប្រទេសជាសមាជិក កាលពីថ្ងៃទី ២៧ មីនា ២០១៧ នៅក្រុងព្រុចសែលប្រទេសប៊ែលហ្សិក។
ជាប្រធានបទដ៏រសើប ! ព្រៃឈើមានចំណែកសំខាន់ណាស់ ក្នុងការប្រយុទ្ធប្រឆាំងនឹងការឡើងកំដៅនៃភពផែនដី ព្រោះព្រៃឈើដែលគ្របដណ្តប់លើផ្ទៃដីអឺរ៉ុបប្រមាណ៤០% អាចស្រូបឧស្ម័នកាបូនិកបំពុលបរិស្ថាន បាន១០% នាពេលសព្វថ្ងៃនេះ។ ព្រៃឈើជាអណ្តូងធម្មជាតិបូមយកឧស្ម័នពុល ! ហេតុដូច្នេះហើយបានជាសហភាពអឺរ៉ុប ចង់បង្កើតវិធានមួយឱ្យសមាជិកសហគមគ្រប់គ្នាគោរពតាម។ ប៉ុន្តែបញ្ហានៅត្រង់ថា បណ្តាប្រទេសមានព្រៃឈើច្រើន ដូចយ៉ាងបារាំង ហ្វាំងឡង់ ចង់ទាញផលចំណេញ និងធ្វើផលិតកម្មឱ្យបានច្រើនបំផុត ពីធនធានធម្មជាតិមួយនេះ ដោយមិនបំផ្លាញបរិស្ថាន។ ហេតុដូច្នេះហើយបានជាការតស៊ូមតិ ត្រូវតានតឹងខ្លាំង។
បង្កើនការធ្វើផលិតកម្មព្រៃឈើ ឬការកាប់ព្រៃឈើ ក៏ជាប្រភពនៃការបញ្ចេញឧស្ម័នពុលកាបូនិកដែរ។ទំហំនៃការស្រូប និងទំហំនៃការបញ្ចេញឧស្ម័នកាបូនិក របស់ព្រៃឈើ ត្រូវបានគិតគូរ រហូតមកទល់នឹងពេលនេះ ដោយផ្អែកលើពិធីសារក្យូតូ ស្តីពីការបន្ថយឧស្ម័នផ្ទះកញ្ចក់។ តែពិធីសារនេះនឹងត្រូវអស់សុពលភាពនៅឆ្នាំ២០២០ និងបន្ទាប់មកត្រូវជំនួសដោយកិច្ចព្រមព្រៀងអាកាសធាតុក្រុងប៉ារីសCOP21។
ប៉ុន្តែក្នុងកិច្ចសន្យារបស់អឺរ៉ុប ស្តីពីអាកាសធាតុនិងថាមពល គេមិនបានរាប់កត់អត្រានៃការស្រូបនិងការបញ្ចេញឧស្ម័នពុលរបស់វិស័យព្រៃឈើចូលទេ បើទោះបីជាអឺរ៉ុបមានផែនការកាត់បន្ថយ ឧស្ម័នផ្ទះកញ្ចក់ឱ្យបានយ៉ាងតិច ៤០% នៅឆ្នាំ២០៣០ បើប្របៀបទៅកំរិតពុលឆ្នាំ១៩៩០ក៏ដោយ។
មានន័យថាសកម្មភាពដើម្បីអាកាសធាតុរបស់សហភាពអឺរ៉ុប មិនទាន់ពេញលេញទេ។ បច្ចុប្បន្ននេះ អឺរ៉ុបរំពឹងតែលើដំណោះស្រាយពីរប៉ុណ្ណោះ។ ទីមួយ ៖ បង្កើតទីផ្សារឧស្ម័នកាបូនិក ដោយជំរុញឱ្យក្រុមហ៊ុនសហគ្រាសឧស្សាហកម្ម (មជ្ឈមណ្ឌលថាមពល ឧស្សាហកម្មចម្រាញ់ប្រេង ស៊ីម៉ង់ ក្រដាស ...) ចំនួន ជាង១១០០០ កាត់បន្ថយការបញ្ចេញផ្សែងពុលចំនួន៤៣%នៅឆ្នាំ២០៣០។ ទីពីរ គឺបង្កើតប្រព័ន្ធបែងចែកទំនួលខុសត្រូវ ៖ វិស័យដឹកជញ្ជូន សំណង់ និងកសិកម្ម ត្រូវកាត់បន្ថយការបញ្ចេញឧស្ម័នកាបូនិក ចំនួន៣០%។
ដើម្បីឱ្យសព្វជ្រុងជ្រោយ គណៈកម្មការអឺរ៉ុប បានសម្រេចចិត្តបញ្ចូលវិស័យព្រៃឈើជាដំណោះស្រាយទីបី។ អឺរ៉ុបបានបង្ហាញ គម្រោងច្បាប់ កាលពីខែកក្កដា២០១៦ និងដែលត្រូវចាប់អនុវត្ត ពីឆ្នាំ២០២០ដល់ឆ្នាំ២០៣០ កំណត់ឱ្យវិស័យព្រៃឈើនេះ ជាប្រភពគ្មានបញ្ចេញឧស្ម័នពុលសោះ។ តុល្យការនៃការស្រូបនិងបញ្ចេញឧស្ម័នផ្ទះកញ្ចក់ត្រូវតែ ស្មើ ឬវិជ្ជមាន ស្រូបច្រើនជាងបញ្ចេញ មានន័យថាគេអាចកាប់ព្រៃឈើបានតែក្នុងកំរិតធ្លាប់ធ្វើកាលពីឆ្នាំ១៩៩០-២០០៩។
គឺត្រង់ចំណុចនេះហើយដែលបារាំងជំទាស់ខ្លាំង។ ព្រោះបារាំងចង់ឱ្យអឺរ៉ុបគិតដល់កម្មវិធីជាតិនីមួយៗផង។ បារាំងទើបបានកំណត់កម្មវិធីជាតិកាប់ព្រៃឈើ គ្រោងដំឡើងពាណិជ្ជកម្មឈើ ១២លានម៉ែត្រគូបបន្ថែមពីលើពាណិជ្ជកម្មមានស្រាប់ ក្នុងមួយឆ្នាំៗ រហូតដល់ឆ្នាំ២០២៦ ដោយត្រូវកាប់ព្រៃឈើប្រមាណ៦៥%នៃការដាំដុះបន្ថែមបន្ត។ ពោលគឺបើការលូតលាស់ព្រៃធម្មជាតិមាន១០០ដើម គេកាប់ដើមចាស់៦៥ ទល់នឹង៥០នាពេលនេះ។ ប្រទេស អូទ្រីស និងពិសេសហ្វាំងឡង់ ប្រទេសលំដាប់ទីពីរខាងមានព្រៃឈើច្រើន នៅអឺរ៉ុបក៏ចង់ បង្កើនការកាប់ព្រៃឈើដែរ។
សម្រាប់ក្រុមប្រទេសទាំងអស់នេះ ហេតុផលនៃការបង្កើនការកាប់ព្រៃឈើ មិនមែនត្រឹមតែជាការផ្តល់តម្លៃដល់ធនធានធម្មជាតិព្រៃឈើដែលពួកគេមានឡើយ តែក៏ជាចម្លើយស្របទៅទិសដៅនៃកម្មវត្ថុធ្វើអន្តរកាលថាមពល ឆ្ពោះទៅរកថាមពលមិនចេះរីងស្ងួត។ ចំពោះប្រទេសបារាំង ជាឧទារណ៍ ២០%នៃឈើកាប់ ត្រូវយកទៅប្រើប្រាស់ជាថាមពលសម្រាប់ដុត ជាង៥០%ក្លាយជាឈើមានតម្លៃ ហើយសល់ពីនោះនឹងក្លាយទៅជាឈើបំផ្លែង ឬកិនធ្វើជាក្រដាស ជាក្តារតុទូ។
បើជាការកែច្នៃឈើប្រើនោះមិនថ្វីទេ តែការយកឈើមកធ្វើគ្រឿងចំហេះ សម្រាប់ដុត នោះវាបង្កឱ្យមានផ្សែងពុលបញ្ចេញដោយផ្ទាល់ពេញបរិយាកាស។ ហេតុនេះហើយបានជា អឺរ៉ុបត្រូវព្រួយបារម្ភនឹងការកាប់ព្រៃឈើ ព្រោះការប្រើឈើជាថាមពលពិតជាមិនស៊ីចង្វាក់សោះនឹងយុទ្ធនាការការពារអាកាសធាតុ។ ក្រុមសមាគមអង្គការក្រៅរដ្ឋាភិបាលផ្សេងៗ មិនញញើតនឹងធ្វើការរិះគន់យ៉ាងចំហនយោបាយកាប់ព្រៃឈើរបស់បារាំងដែលមាននាមជាអ្នកនាំមុខបង្កើតកិច្ចព្រមព្រៀងអាកាសធាតុទេ ព្រោះនយោបាយកាប់ព្រៃ និងអន្តរកាលថាមពល ដោយពិតទៅជាការបង្រួមសកម្មភាពដើម្បីអាកាសធាតុទៅវិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ