បារាំង៖ដំណោះស្រាយវិបត្តិស៊ីរីមិនត្រូវផ្តោតលើអំណាចលោកអាសាដទេ
ប្រមុខការទូតបារាំង លោកហ្សង់ ម៉ាក អៃរ៉ូល បានលើកឡើងនៅថ្ងៃសុក្រនេះថា ក្នុងការព្យាយាមរកកិច្ចព្រមព្រៀងសន្តិភាពអោយស៊ីរី គេមិនត្រូវផ្តោតលើអំណាចរបស់ប្រធានាធិបតីអាសាដទេ។ រដ្ឋាភិបាលអាមេរិកទើបតែបានប្រកាសនៅថ្ងៃព្រហស្បតិ៍ ពីជំហរមិនផ្តោតលើអំណាចរបស់លោកអាសាដ ជាអាទិភាព ក្នុងការស្វែងរកដំណោះស្រាយវិបត្តិសង្គ្រាមស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ថ្ងៃសុក្រនេះ រដ្ឋមន្ត្រីការបរទេសបារាំង លោកហ្សង់ ម៉ាក អៃរ៉ូល បានលើកឡើងថា គេមិនត្រូវផ្តោតលើលោកអាសាដទេ ក្នុងការព្យាយាមរកកិច្ចព្រមព្រៀងសន្តិភាពស៊ីរី។ វិបត្តិសង្គ្រាមស៊ីរី រ៉ាំរ៉ៃមកជាង៦ឆ្នាំហើយ ហើយកន្លងមក បារាំងតែងទាមទារអោយលោកអាសាដចេញពីអំណាច មុនមាននយោបាយអន្តរកាលស៊ីរី។
ប្រមុខការទូតបារាំងលើកឡើងថា៖ ការរក្សាទុកអំណាចអោយលោកអាសាដ មិនមែនជាសំណួរដែលត្រូវចោទឡើងទេ។ តែគេត្រូវចោទសួរទៅវិញថា តើសហគមន៍អន្តរជាតិគោរពតាមកិច្ចសន្យារបស់ខ្លួនដែរទេ?
ថ្ងៃសុក្រនេះ បានលោក ហ្សង់ ម៉ាក អៃរ៉ូល ទៅដល់ក្រុងព្រុចសែល ចូលរួមជំនួបប្រជុំរដ្ឋមន្ត្រីការបរទេសរបស់អង្គការអូតង់។ ប្រមុខការទូតបារាំងគូសបញ្ជាក់ថា ក្នុងឱកាសជំនួបនេះ លោកនឹងឆ្លៀតសួររដ្ឋមន្ត្រីការបរទេសអាមេរិក រិច ធីលឡឺសាន់ អោយបំភ្លឺពីជំហរអាមេរិក ចំពោះកិច្ចការមួយចំនួន ដូចជាថ្លៃចាយវាយយោធា ការប្រយុទ្ធប្រឆាំងភេរវកម្ម រឺក៏អន្តរកាលនយោបាយស៊ីរីជាដើម។ សម្រាប់បារាំង គេមិនត្រូវគិតតែពិផ្នែកយោធាទេ។ គេត្រូវគិតពីការចរចានយោបាយ សម្រាប់អន្តរកាលស៊ីរី អោយសមស្របតាមសេចក្តីសម្រេចរបស់អង្គការសហប្រជាជាតិ ខែធ្នូ ឆ្នាំ២០១៥ដែរ។ សេចក្តីសម្រេចអង្គការសហប្រជាជាតិឆ្នាំ២០១៥ ចែងពីការចរចារវាងក្រុមប្រឆាំងនិងរដ្ឋាភិបាលស៊ីរី ពីបទឈប់បាញ់ ពីរដ្ឋាភិបាលអន្តរកាល និងការបោះឆ្នោត។
ជំហររបស់បារាំងលែងផ្តោតលើអំណាចលោកអាសាដ នៅស៊ីរី ពេលនេះ គឺដើរស្របទៅនឺងជំហររបស់អាមេរិកដែរ។ អាមេរិកទើបបានប្រកាសកាលពីថ្ងៃព្រហស្បតិ៍ ថាលែងផ្តោតអាទិភាពលើអំណាចរបស់លោកអាសាដតទៅទៀត ក្នុងការស្វែងរកដំណោះស្រាយវិបត្តិស៊ីរី។ តំណាងអាមេរិកប្រចាំនៅអង្គការសហប្រជាជាតិ លោកស្រី នីគី ហាឡី ថែមទាំងបានលើកឡើងទៀតថា អាមេរិកចង់ធ្វើការជាមួយតួកគី និងរុស្ស៊ី ដើម្បីរកដំណោះស្រាយនយោបាយយូរអង្វែងសម្រាប់ស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ