នៅរុស្ស៊ី ស្លាប់១១នាក់ដោយមកពីការផ្ទុះក្នុងមេត្រូក្រុងSaint-Petersbourg
នៅវេលាម៉ោង២និង៤០នាទី រសៀលម្សិលមិញ ក្នុងមេត្រូក្រុងធំទី២នៅរុស្ស៊ី គឺក្រុងទេសចរណ៍ Saint-Petersbourg ស្រាប់តែមានលាន់សូរផ្ទុះគ្ឌាំង ក្នុងទូមួយនៃរថភ្លើងបើកក្រោមដី បណ្តាលឲ្យស្លាប់អ្នកដំណើរអស់១១នាក់ និងរបួស៤៥នាក់។ លោកប្រធានាធិបតីពូទីនបានថ្លែងថា ការផ្ទុះនេះ អាចជាទង្វើសងសឹកគ្នារវាងក្រុមឧក្រិដ្ឋជនរហូតដល់ភេរវកម្ម។ ចំណែកស្ថាប័នជាតិខាងអង្កេតបានកសាងទៅហើយសំណុំរឿងតាមប្រការភេរវកម្ម។ អាជ្ញាធរទើបប្រកាសស្វែងរកចាប់ខ្លួនជនជាប់សង្ស័យពីរនាក់។ រីឯបស្ចិមលោក ទោះបីបានដាក់ទណ្ឌកម្ម រុស្ស៊ីក្តី ក៏នាំគ្នាសំដែងការរួមមរណទុក្ខមកកាន់ក្រុងម៉ូស្គូដែរ។
ចុះផ្សាយនៅថ្ងៃ៖ កែប្រែថ្ងៃទី៖
តាមការឲ្យដឹងនៃគណៈកម្មាធិការជាតិប្រឆាំងភេរវកម្ម NAK ពីក្នុងចំណោមអ្នកស្លាប់១១នាក់នោះ ៧នាក់ស្លាប់នៅនឹងកន្លែងផ្ទុះ ម្នាក់ស្លាប់ក្នុងរថយន្តគិលានសង្គ្រោះ ៣នាក់ទៀតស្លាប់នៅមន្ទីរពេទ្យ។ ដោយមកពីសោកនាដកម្មនេះ សាលាក្រុង Saint-Petersbourg ប្រកាសកាន់ទុក្ខ៣ថ្ងៃចាប់ពីថ្ងៃនេះទៅ និងរំលែកប្រាក់ជំនួយដល់គ្រួសារអ្នកស្លាប់ម្នាក់ៗ១លានរូប្ល ឬ១ម៉ឺន៧ពាន់៥រយដុល្លារ អ្នករបួសធ្ងន់ ៥សែនរូប្ល ឬជិត៨.៨០០ដុល្លារ អ្នករបួសស្រាល ២សែន៥ម៉ឺនរូប្ល ឬជិត៤.៤០០ដុល្លារ។
គឺនៅម៉ោង២និង៤០នាទីរសៀលថ្ងៃ៣មេសាម្សិលមិញ ពេលដែលក្បួនរថភ្លើងមេត្រូ ផ្សំឡើងពីទូជិះដោយអ្នកដំណើរចំនួន៨ទូកំពុងបើកតាមខ្សែផ្លូវមួយនៃបណ្តាញផ្លូវមេត្រូក្រោមដី ស្រាប់តែមានលាន់សូរផ្ទុះគ្ឌាំង ក្នុងទូទី៣ រាប់ពីក្បាលទៅ បណ្តាលឲ្យទ្វាទូនោះរយះដាច់ដោចមើលលែងស្គាល់។។ គឺតែក្នុងទូនេះឯងដែលមានអ្នកធ្លាក់ខ្លួនស្លាប់និងរបួស។ ក្នុងទូទី២និងទី៤នៅជិតខាង ឥតមានអ្នករងគ្រោះទេ។ ជាការសម្គាល់ ទោះបីដឹងថា មានការផ្ទុះនេះក្តី ក៏អ្នកបើកក្បួនរថភ្លើងនោះសម្រេចចិត្តមិនបញ្ឈប់ដំណើររត់ទៅមុខរបស់វា នៅក្នុងរូងឧម្មង្គឡើយ ហើយក៏ខំបើកវាលុះរហូតដល់ស្ថានីយដែលត្រូវឈប់ ដើម្បីសម្រួលដល់ប្រតិបត្តិការសង្គ្រោះ។ ពិតជាឥរិយាបថនេះ ដែលបានទទួលនូវការស្ងើចសរសើរពីខាងក្រុមអង្កេត។ អន្តរាគមន៍នៃក្រុមសង្គ្រោះបានជម្លៀសជាបន្ទាន់ អ្នកដំណើរ១.២០០នាក់ ក្នុងក្បួនរថភ្លើងនោះ តាមជណ្តើរយន្តបានមកដល់លើដី។
ស្របនឹងតឹកតាងបង្ហាញដោយសាក្សីដែលនៅរស់ មានអ្នកដំណើរម្នាក់បានធ្វើជាភ្លេចយកតាមខ្លួន ការតាបមួយដែលគាត់បានដាក់នៅក្បែរជើងគាត់ ហើយពេលរថភ្លើងឈប់នៅនឹងស្ថានីយមួយមុននោះ គាត់ក៏បានដើរចេញ ហើយឆ្លងទៅជិះក្នុងទូមួយផ្សេងនៅជាប់នឹងទូនោះ។ គឺកាតាបនោះឯងដែលបានផ្ទុះ។
សំអាងលើរូបភាពថតបានដោយកាមេរ៉ាក្នុងមេត្រូ អាជ្ញាធរបានប្រកាសរកចាប់ខ្លួនជនជាម្ចាស់ការតាប។
ម្សិលមិញដដែល ក៏មានរកឃើញគ្រឿងផ្ទុះច្នៃខ្លួនឯងដែរ ក្នុងស្ថានីយមួយទៀតនៃក្រុងនោះ ព្រមទាំងមានថតបានដែរ រូបម្ចាស់វាដែលក៏ត្រូវអាជ្ញាធរប្រកាសស្វែងរកចាប់ខ្លួន។
មេត្រូក្រុង Saint-Petersbourg ជាប់លេខ៤ ដោយដឹកអ្នកដំណើរក្នុង១ថ្ងៃៗបានជាង២លាននាក់ ស្ថិតនៅពីក្រោយក្រុងម៉ូស្គូ ប៉ារីស និងឡុងដ្រ៏។
ក្រោយពីការផ្ទុះនៅក្រុង ជាអតីតរាជធានីរុស្ស៊ី អាជ្ញាធររឹតបន្តឹងវិធានការធានាសន្តិសុខនៅតាមគ្រប់អាកាសយានដ្ឋាននិងស្ថានីយរថភ្លើង។
ចំណែកស្ថានទូតស.រ.អា.ប្រចាំក្រុងម៉ូស្គូនឹងប្រមុខការទូតសហភាពអឺរ៉ុប លោកស្រី Federica Mogherini តាងនាមឲ្យ២៧ប្រទេសសហភាពនេះ ទោះបីនៅបន្តដាក់ទណ្ឌកម្មប្រឆាំងរុស្ស៊ីក្តី ក៏នាំគ្នាសំដែងការរួមមរណទុក្ខ និងសាមគ្គីភាពជាមួយរុស្ស៊ីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ