អាវុធគីមី៖រុស្ស៊ីប្រើវ៉េតូប្រឆាំងនឹងសេចក្តីសម្រេចរបស់ អ.ស.ប.ដែលថ្កោលទោសស៊ីរី
នៅថ្ងៃពុធ ទី១២ មេសា ប្រទេសរុស្ស៊ីបានប្រើសិទ្ធិវ៉េតូប្រឆាំងនឹងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។ គឺជាសេចក្តីសម្រេចដែលថ្កោលទោសប្រទេសស៊ីរីលើករណីប្រើអាវុធគីមីសម្លាប់ជនស៊ីវិលកាលពីថ្ងៃទី៤ មេសា និងបានអំពាវនាវឲ្យមានការស៊ើបអង្កេតស៊ីជម្រៅមួយ។ គិតតាំងពីស៊ីរីបានធ្លាក់ក្នុងវិបត្តិហែកហួរគ្នាក្នុងឆ្នាំ ២០១១ មក នេះជាលើកទី៨ ដែលរុស្ស៊ីបានប្រើសិទ្ធិវ៉េតូគាំទ្ររបបទីក្រុងដាម៉ាស់របស់លោកប្រធានាធិបតីអាសាដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ជាថ្មីម្តងទៀត និងគ្មានអ្វីគួរឲ្យភ្ញាក់ផ្អើល រុស្ស៊ីបានប្រើសិទ្ធិវ៉េតូប្រឆាំងនឹងសេចក្តីសម្រេចរបស់ក្រុមប្រឹក្សាសន្តិសុខដែលស្នើឡើងដោយសហរដ្ឋអាមេរិក អង់គ្លេស និងប្រទេសបារាំង។ ក្រៅពីថ្កោលទោសរបបស៊ីរីពីបទបានប្រើអាវុធគីមីសម្លាប់ជនស៊ីវិលកាលពីថ្ងៃទី៤ មេសា សេចក្តីសម្រេចក៏បានស្នើឲ្យមានការស៊ើបអង្កេតអន្តរជាតិ និងទាមទារឲ្យស៊ីរីរួមសហការណ៍ដើម្បីស្វែងរកការពិត។ នេះជាលើកទី៨ តាំងពីស៊ីរីធ្លាក់ក្នុងសង្រ្គាមស៊ីវិលនាឆ្នាំ ២០១១ ដែលរុស្ស៊ីបានប្រើសិទ្ធិវ៉េតូការពាររបបទីក្រុងដាម៉ាស់របស់លោកប្រធានាធិបតីស៊ីរីអាសាដ។
ដោយឡែក ចិនដែលធ្លាប់បានចេញមុខគាំទ្ររបបស៊ីរីចំនួន ៦ដងនាពេលកន្លងមកបែរជាបានបោះឆ្នោតអនុបវាទនៅលើកនេះ រួមទាំងប្រទេសអេត្យូពី និងកាហ្សាក់ស្ថាន។ ការបោះឆ្នោតអនុបវាទរបស់ចិនពេលនេះត្រូវបានអ្នកទទួលខុសត្រូវអាមរិកាំងម្នាក់នៃរដ្ឋបាលរបស់លោកដូណាល់ ត្រាំពន្យល់ថា ជាលទ្ធផលបានមកពីទំនាក់ទំនងល្អរបស់លោកដូណាល់ ត្រាំ និងសមភាគីចិនលោកស៊ី ជីនពីងនាជំនួបទ្វេភាគីថ្មីៗក្នុងរដ្ឋ Florida។ តែអ្នកទទួលខុសត្រូវអាមរិកាំងដែលមិនព្រមបញ្ចេញឈ្មោះរូបនេះបដិសេធមិននិយាយទេថា តើលោកដូណាល់ ត្រាំបានស្នើលោកស៊ី ជីនពីងកុំឲ្យប្រើសិទ្ធិវ៉េតូ ឬអត់។
អ្នកតំណាងរុស្ស៊ីនៅអង្គការសហប្រជាជាតិបានលើកយកហេតុផលទៅបញ្ជាក់ថា ការដែលរុស្ស៊ីប្រើសិទ្ធិវ៉េតូប្រឆាំងសេចក្តីសម្រេច ព្រោះគ្មានភស្តុតាងណាដែលបង្ហាញពីការទទួលខុសត្រូវរបស់របបស៊ីរីលើករណីប្រើអាវុធគីមីសម្លាប់ជនស៊ីវិល។ អ្នកតំណាងរុស្ស៊ីរូបនេះដដែលបានបញ្ជាក់ថា មូស្គូគាំទ្រឲ្យមានការស៊ើបអង្កេតមួយ តែទន្ទឹមគ្នានេះ គេក៏មិនគួរចោទប្រកាន់លើបុគ្គលអាសាដដែរ។
យ៉ាងណាក៏ដោយ សហគមន៍អន្តរជាតិបានបរិហារលើវ៉េតូរបស់រុស្ស៊ី។ បារាំងបានបញ្ជាក់ជាថ្មីពីការរួមកម្លាំងអន្តរជាតិដើម្បីគាំទ្រដំណោះស្រាយផ្លូវនយោបាយសម្រាប់វិបត្តិស៊ីរី។ ចំណែកអាមេរិកបានអំពាវនាវរុស្ស៊ីឲ្យឈប់គាំទ្របុគ្គលអាសាដ និងថា អាមេរិកចង់ធ្វើការជាមួយរុស្ស៊ីដើម្បីបញ្ចប់វិបត្តិស៊ីរីតាមផ្លូវនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ