បោះឆ្នោតប្រធានាធិបតីបារាំង ៖ ពលរដ្ឋកន្លះលាននាក់មានឈ្មោះស្ទួន
ពលរដ្ឋម្នាក់មានបណ្ណបោះឆ្នោតពីរ ! នេះជាភាពមិនប្រក្រតីមួយ សម្រាប់ការបោះឆ្នោតបែបប្រជាធិបតេយ្យ ! នៅថ្ងៃនេះស្ថាប័នអធិការកិច្ចរដ្ឋបាលបារាំង បានប្រកាសឱ្យដឹងថាមានពលរដ្ឋបារាំងប្រមាណជិតកន្លះលាននាក់ មានឈ្មោះស្ទួនក្នុងបញ្ជីបោះឆ្នោត ពោលគឺបានទទួលបណ្ណបោះឆ្នោតពីរ។ គណបក្សនយោបាយបានព្រមានអំពីហានិភ័យប្រជាធិបតេយ្យ និងលទ្ធផលនៃការបោះឆ្នោត ទៅកាន់រដ្ឋមន្ត្រីក្រសួងមហាផ្ទៃ ប្រសិនបើពលរដ្ឋនោះមិនស្មោះត្រង់ហ៊ានទៅបោះឆ្នោតទាំងពីរមណ្ឌល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
នៅថ្ងៃអាទិត្យសប្តាហ៍ក្រោយ ពលរដ្ឋបារាំងជាង៤៥លាននាក់ ត្រូវទៅបោះឆ្នោតប្រធានាធិបតី។ ប៉ុន្តែមានពលរដ្ឋខ្លះមានបណ្ណបោះឆ្នោតពីរ នៅមណ្ឌលពីរខុសគ្នា តើមានន័យថាគេអាចបោះឆ្នោតបានពីរដងឬ ? មិនទេ ! ពលរដ្ឋម្នាក់មានសិទ្ធិបោះឆ្នោតតែម្តងគត់! ក្នុងច្បាប់បារាំង ពលរដ្ឋណាល្មើសច្បាប់ហ៊ានបោះឆ្នោតពីរដងនឹងត្រូវទទួលទោសជាប់ពន្ធនាគារ ៦ខែ និងពិន័យជាប្រាក់ ១៥០០០អឺរ៉ូ។
ការរំលឹកនេះបានធ្វើឡើង បន្ទាប់ពីសារព័ត៌មាន ឡឺម៉ុង បានបង្ហើបឱ្យដឹងថាមានពលរដ្ឋជាច្រើនពាន់នាក់ បានទទួលបណ្ណបោះឆ្នោតពីរ (ប្រភពព័ត៌មានខ្លះទៀតលើកឡើងថាមានពលរដ្ឋដល់ទៅកន្លះលានមានបណ្ណបោះឆ្នោតពីរ)។ ហេតុអ្វីបានជាដូច្នេះ ? ភាពមិនប្រក្រតីបែបនេះ ច្រើនតែកើតឡើងនៅពេលពលរដ្ឋធ្វើការផ្លាស់ប្តូរលំនៅដ្ឋាន ពីឃុំសង្កាត់មួយទៅឃុំសង្កាត់មួយទៀត ហើយទៅចុះឈ្មោះថ្មីក្នុងបញ្ជីបោះឆ្នោត កន្លែងរស់នៅថ្មី។ ជាធម្មតា ឃុំសង្កាត់នីមួយៗ គ្មានមធ្យោបាយផ្ទៀងផ្ទាត់ទេ ! តែត្រូវបញ្ជូនបញ្ជីឈ្មោះថ្មីទៅឱ្យ វិទ្យាស្ថានស្ថិតិដែលមានសមត្ថកិច្ចផ្ទៀតផ្ទាត់ កែនិងលុបឈ្មោះស្ទួន។ ប៉ុន្តែពេលខ្លះមានបញ្ហាបានកើតឡើងនៅពេលផ្ទេរបញ្ជូនព័ត៌មាននោះ ទើបមានសល់ឈ្មោះស្ទួនយ៉ាងដូច្នេះ។
ទោះដោយការធ្វេសប្រហែស ឬដោយចេតនាក្តី ក៏ភាពប្រក្រតីនេះជាតំណាងហានិភ័យមួយនៃលទ្ធិប្រជាធិបតេយ្យ ដែលគេមិនអាចវាយតម្លៃបានទេ នាពេលនេះ ! ពេលដែលការបោះឆ្នោតកាន់ខិតមកដល់យ៉ាងកៀក។ តំណាងគណបក្សនយោបាយបានទាមទារឱ្យរដ្ឋមន្ត្រីក្រសួងមហាផ្ទៃដោះស្រាយបញ្ហានេះឱ្យបានមុនថ្ងៃបោះឆ្នោតជុំទីមួយ ថ្ងៃទី ២៣មេសា ២០១៧។ បើទោះបីជាពលរដ្ឋបំពេញតួនាទីត្រឹមត្រូវមិនទៅបោះឆ្នោតពីរដងក៏ដោយ ក៏ជាមួយនឹងបញ្ជីស្ទួនដូច្នេះ គេនឹងអាចរាប់ចំនួនអ្នកវត្តមានខុស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ