អង្គការហាមឃាត់អាវុធគីមី(OIAC) )អះអាងថាភមិ Khan Cheikhounត្រូវរងការវាយប្រហារដោយអាវុធគីមី
នៅស៊ីរីក្រោយពីការវាយប្រហារនៅភូមិ Khan Cheikhoun ជិតតំបន់ Idlib កាលពីថ្ងៃទី៤មេសាដែលលោកខាងលិចចោទថាថាជាទង្វីរបស់កងទ័ពជើងអាកាសនៃរបបលោកអាសាដមក ៣ថ្ងៃក្រោយមកលោកប្រធានាធិបតីអាមេរិក Donald Trump បានចេញបញ្ជាឲ្យកងទ័ពអាមេរិក បាញ់មីស៊ីល៥៩ គ្រាប់ វាយប្រហារប្រឆាំងទៅលើមូលដ្ឋានទ័ពអាកាសរបស់របបស៊ីរី។
ចុះផ្សាយនៅថ្ងៃ៖
ក្រុមអ្នកជំនាញរបស់អង្គការហាមឃាត់អាវុធគីមីហៅកាត់ថា (OIAC) ដែលរួសរាន់ធ្វើដំណើរទៅកាន់ប្រទេសតួកគីដើម្បីបើកការស៊ើបអង្កេតនៅលើការវាយប្រហារដោយអាវុធគីមីកាលពីថ្ងៃទី៤មេសានៅស៊ីរី បានអះអាងថា គឺឧស្ម័ន Sarin ឬក៏ជាសារធាតុម្យ៉ាងស្រដៀងគ្នានឹងឧស្ម័ន Sarin ដែលត្រូវបានគេប្រើប្រាស់នៅក្នុងការវាយប្រហារលើភូមិ Khan Cheikhoun -នេះជាការថ្លែងរបស់អគ្គនាយកអង្គការហាមឃាត់អាវុធគីមី(OIAC) ដែលដកស្រង់សំដីដោយគណប្រតិភូអង់គ្លេសនៅថ្ងៃពុធទី១៩មេសានេះ។
ម្យ៉ាងទៀត ការសន្និដ្ឋានទាំងនេះ ក៏ស្របគ្នាទៅនឹងការវិភាគនានាដែលបានធ្វើឡើងកាលពីលើកមុនដែរដោយមន្ទីរពិសោធន៍នៅតួកគីនិងនៅអង់គ្លេស។
គួររំលឹកថា លោកខាងលិច ជាពិសេសអាមេរិកបានចោទការវាយប្រហារដោយអាវុធគីមីនៅស៊ីរីនោះ គឺ ជាស្នាដៃកងទ័ពអាកាសស៊ីរីនិងបានធ្វើអោយពិភពលោកតក់ស្លុតរន្ធត់ចិត្តឥតឧបមាដោយសារតែគេឃើញរូបភាពរបស់ជនរងគ្រោះស៊ីវីល៨៧នាក់ក្នុងនោះមានកុមារ៣១នាក់ បានស្លាប់ដោយប្រកាច់-នេះជាការគួសបញ្ជាក់របស់អង្គការការពារសិទ្ធិមនុស្សនៅស៊ីរីOSDH។
រុស្ស៊ី ដែលគាំទ្ររបបស៊ីរី បានចេញមុខទិះតៀនអង្គការហាមឃាត់អាវុធគីមី (OIAC) នេះ ថា គ្មានសមត្ថភាពក្នុងការបើកអង្កេតនៅលើទឹកដីស៊ីរីផ្ទាល់ តែបែរជាទៅធ្វើការវិភាគនៅឯក្រៅប្រទេសស៊ីរីទៅវិញ-នេះការគូសបញ្ជាក់របស់លោក Sergueï Lavrov នៅក្នុងសន្និសីទសាព័ត៌មានមួយនៅទីក្រុងមូស្គូរួមជាមួយសមភាគីអ៊ីរ៉ង់និងស៊ីរី។ រដ្ឋមន្ត្រីការទូតរុស្ស៊ី បានអះអាងទៀតថា ដើម្បីឲ្យមានតម្លាភាព អង្គការ(OIAC) ចាំបាច់ត្រូវតែ មានការបើកអង្កេត ពីក្រុមអ្នកជំនាញឯករាជ្យ ក្រុមអ្នកជំនាញដែលតំណាងអោយប្រទេសនានានៅក្នុងតំបន់ អ្នកជំនាញដែលមកពីប្រទេសរុស្ស៊ី សហរដ្ឋអាមេរិកនិងអឺរ៉ុប។
ចំណែកប្រធានាធិបតីស៊ីរី លោកBachar Al-Assad វិញ លោកបានលើកឡើងថា “ការវាយប្រហារដោយអាវុធគីមីកាលពីថ្ងៃទី៤មេសានោះ គឹជាការប្រឌិតឡើង១០០%របស់លោកខាងលិចជាពិសេសអាមេរិកដើម្បីយកលេស វាយប្រហារមកលើស៊ីរី ពីព្រោះ តាំងពី៣ឆ្នាំកន្លងមកហើយដែលស៊ីរីលែងមានអាវុធគីមីនៅក្នុងដៃរបស់ខ្លួន។
ប៉ុន្តែ ចំពោះសហរដ្ឋអាមេរិកវិញ ការវាយប្រហារប្រឆាំងទៅលើភូមិដែលស្ថិតនៅជិតក្រុង Idlib នេះ គឺពិតជាស្នាដៃរបស់កងទ័ពអាកាសស៊ីរីតែម្តង។ កតានេះហើយដែលជម្រុញអោយប្រធានាធិបតីអាមេរិកលោក Donald Trump បានចេញបញ្ជាឲ្យកងទ័ពអាមេរិកបាញ់មីស៊ីល ៥៩ គ្រាប់វាយប្រហារប្រឆាំងទៅលើមូលដ្ឋានទ័ពអាកាសរបស់របបស៊ីរីនៅ Chayrat វិញដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ