ក្រុមហ៊ុនសំណង់បារាំង ផ្តល់ហិរញ្ញវត្ថុដោយប្រយោលដល់ក្រុមប្រដាប់អាវុធស៊ីរី យ៉ាងដូចម្តេច ?
ចុះផ្សាយនៅថ្ងៃ៖
ក្រុមហ៊ុនបារាំង បានជាប់សង្ស័យថាបានផ្តល់ហិរញ្ញវត្ថុ “ដោយប្រយោល” ដល់ក្រុមអង្គការរដ្ឋអ៊ីស្លាម នៅស៊ីរី ដើម្បីសុវត្ថិភាពរោងចក្រសំណង់នៅទីនោះ។ ក្រុមហ៊ុនបានទទួលស្គាល់ កាលពីថ្ងៃព្រហស្បតិ៍ទី ២មិនា ថា ជាទង្វើដែលមិនអាចទទួលយកបានឡើយ។ អគ្គនាយកក្រុមហ៊ុនក៏បានប្រកាសលាលែងចេញពីតំណែងកាលពីថ្ងៃចន្ទទី ២៤មេសា ដើម្បីសម្រួលសំណុំរឿងនៅស៊ីរីនេះ តែក្រុមហ៊ុនអះអាងជានិច្ចថាលោកគ្មានកំហុសក្នុងរឿងនេះឡើយ។
ការសង្ស័យលើសកម្មភាពរបស់រោងចក្រស៊ីម៉ង់ Lafarge នៅប្រទេស លេចរូបរាងកាន់ច្បាស់ហើយ។ ក្រុមហ៊ុនឧស្សាហកម្មបារាំងដ៏ធំមួយនេះ ត្រូវជាប់សង្ស័យថាផ្តល់ហិរញ្ញវត្ថុដល់ពួកអង្គការរដ្ឋអ៊ីស្លាមនៅស៊ីរី “ដោយប្រយោល”។ រឿងរ៉ាវបានកើតឡើង នៅរវាងពីឆ្នាំ២០១៣ និង២០១៤។ សាខាក្រុមហ៊ុនស៊ីម៉ង់បារាំងនៅស៊ីរីនេះ បានស្វែងរកព្រមព្រៀងជាមួយក្រុមប្រដាប់អាវុធនៅស៊ីរី ដែលខ្លះជាក្រុមជាប់ទណ្ឌកម្មអន្តរជាតិផង តាមរយៈមេខ្យល់។
ក្នុងពេលដែលស្ថានភាពនយោបាយស៊ីរីកំពុងច្របូកច្របល់ ម្ខាងកាន់កាប់ដោយរដ្ឋាភិបាលក្រុងដាម៉ា ម្ខាងដោយពួកឧទ្ទាមបះបោរប្រឆាំងរដ្ឋាភិបាល ម្ខាងធ្លាក់ក្នុងកណ្តាប់ដៃពួកអង្គការរដ្ឋអ៊ីស្លាម គ្រប់ច្រកផ្លូវតែងមានកងប្រដាប់អាវុធចាំស្ទាក់ ចាំវាយ ចាំកាក់ឆែរឆេរ ក្រុមហ៊ុនបារាំងបានចាត់មនុស្សឱ្យទៅដោះស្រាយជាមួយពួកអង្គការរដ្ឋអ៊ីស្លាមផ្តល់ជាលុយកាក់ជាថ្នូរនឹងត្រាបើកផ្លូវឱ្យឡានកាមីញ៉ុងអាចបន្តចេញចូលដឹកសម្ភារៈស៊ីម៉ង់ និងសម្ភារៈសម្រាប់ផ្គង់ផ្គង់ដំណើរការរោងចក្រ។ មុននឹងត្រូវបិទទាំងស្រុងនៅខែកញ្ញាឆ្នាំ២០១៤ ពេលពួកអង្គការរដ្ឋអ៊ីស្លាមគ្រប់គ្រង់តំបន់ភាគឦសានក្រុងអាឡិប ពួកជីហាតរដ្ឋអ៊ីស្លាមមានបញ្ជីឈ្មោះអ្នកធ្វើការនៅក្នុងរោងចក្រស៊ីម៉ង់ Jalabiya ចុះហត្ថលេខាដោយអ្នកមេការផង ! អ្នកគ្មានឈ្មោះ នឹងត្រូវពួកគេចាប់ភ្លាម។ នេះបើតាមសំដីអតីតបុគ្គលិកឱ្យក្រុមហ៊ុនLafarge នៅស៊ីរី។
ក្រុមហ៊ុនក៏បានទទួលស្គាល់ថាមានការផ្តល់មូលនិធិដល់ក្រុមប្រដាប់អាវុធទាំងអស់នោះមែន ប៉ុន្តែមិនបានបញ្ជាក់ថាក្នុងទម្រង់យ៉ាងណាទេ។ ការអង្កេតផ្ទៃក្នុង ក៏មិនរកឃើញចំណងថាលុយនោះធ្លាក់ដល់ដៃជនឬក្រុមប្រាកដដែរ គឺដឹងត្រឹមថាបញ្ជូនទៅឱ្យអ្នកទីបី។ ក្នុងស្ថានភាពនយោបាយដ៏ដុនដាប ការគំរាមកំហែងសុវត្ថិភាពបុគ្គលិក សកម្មភាពរោងចក្រ និងការផ្គត់ផ្គង់ខ្លាំងពេក ទើបសាខាក្រុមហ៊ុននៅផ្ទាល់កន្លែងសម្រេចចិត្ត ត្រឹមថ្នាក់មូលដ្ឋាននិងថ្នាក់តំបន់ ប្រើលុយជួលមនុស្សឱ្យចរចាសុំសុខ ដោយស្មានថាជាអំពើល្អផ្តល់ប្រយោជន៍ក្រុមហ៊ុន។ នេះជាចម្លើយបំភ្លឺរបស់ក្រុមហ៊ុនមេ ដោយចាត់ទុកចំណាត់ការរបស់សាខាថាមិនអាចទទួលយកបាន និងជាកំហុសការងាររបស់សាខាក្រុមហ៊ុននៅស៊ីរី។
សម្រាប់អង្គការក្រៅរដ្ឋាភិបាល នាំមុខដោយអង្គការ Shepar ដែលបានផ្តួចផ្តើមធ្វើអង្កេតនិងប្តឹងផ្តល់ប្រឆាំងក្រុមហ៊ុនLafarge ជាមួយក្រសួងសេដ្ឋកិច្ចបារាំង ក្រុមហ៊ុនមេ ទទួលស្គាល់មានទង្វើខុសឆ្គងផ្តល់ថវិកាដោយប្រយោលដល់ក្រុមភេរវនិយម ប៉ុន្តែបែរជាទម្លាក់បន្ទុកលើសាខានៅស៊ីរីតែឯងទៅវិញ។ រាល់ការភ្ជាប់ទំនាក់ទំនងជាមួយពួកភេរវជន ក្រុមហ៊ុននៅស៊ីរីជាសាខា ពិតជាមិនហ៊ានរំលងមិនឆ្លងកាត់យោបល់ក្រុមហ៊ុនមេបានឡើយ។ បើតាមប្រធានអង្គការShepar ក្រុមហ៊ុនមេLafarge គ្រប់គ្រងសាខានៅស៊ីរី ក្នុងកំរិត៩៨,៧% មានន័យថាក្រុមហ៊ុនមេជាអ្នកសម្រេចលើគ្រប់កិច្ចការទាំងអស់។ ការអង្កេតផ្ទៃក្នុងរកឃើញកំរិតទំនួលខុសត្រូវរបស់ក្រុមហ៊ុនក្នុងសំណុំរឿងផ្តល់ថវិកាដល់ពួកប្រដាប់អាវុធ ត្រឹមកំរិតមូលដ្ឋាននិងតំបន់ ពិតជាមិនសមហេតុផលឡើយ។ នេះជាឆន្ទៈបដិសេធរបស់ក្រុមហ៊ុន!
នៅក្នុងក្របខ័ណ្ឌនៃការអង្កេតបឋម ក្រោយពីមានបណ្តឹងរបស់ក្រសួងសេដ្ឋកិច្ចនិងអង្គការក្រៅរដ្ឋាភិបាល កាលពីខែតុលាមក ថ្នាក់ដឹកនាំជាន់ខ្ពស់ក្រុមហ៊ុនជាច្រើននាក់ ត្រូវបានប៉ូលិសកោះហៅទៅសួរចម្លើយ ក្នុងនោះក៏មានរូបលោក អេរិក អូសិនម្នាក់ដែរ។ លោក អគ្គនាយកក្រុមហ៊ុន ដែលអាចចាត់ទុកថាគ្មានទោស គ្មានទំនួលខុសត្រូវក្នុងសំណុំរឿងសាខានៅស៊ីរីនេះ ព្រោះនៅពេលកើតហេតុ លោកមានតួនាទីត្រឹមតែអ្នកប្រធានគ្រប់គ្រងធនធានមនុស្ស មិនមែនកាន់តំណែងប្រធានគ្រប់គ្រងក្រុមហ៊ុនទេ។ ហេតុដូច្នេះហើយបានជាប្រធានអង្គការShepar បានសម្តែងការរីករាយ នៅពេលទទួលដំណឹងលាលែងចេញពីតំណែងរបស់លោក អូសិន ដោយចាត់ទុកថានេះជាកាយវិការគួរកត់សម្គាល់ដំបូងរបស់ក្រុមហ៊ុន មុននឹងឈានដល់ទទួលស្គាល់ទំនួលខុសត្រូវ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ