បោះឆ្នោតប្រធានាធិបតីបារាំង ៖ លោកស្រី ឡឺប៉ែន ប្រឹងចុះមូលដ្ឋាន លោកម៉ាក្រុងប្រឹងលើកតម្លៃបារាំង
ការបោះឆ្នោតជុំទីពីរ កាន់តែខិតមកដល់ បេក្ខជនជាគូប្រជែងផ្តាច់ព្រ័ត្រ កំពុងសម្រុកចុះធ្វើយុទ្ធនាការឃោសនាកាន់តែខ្លាំង។ លោកស្រីម៉ារីន ឡឺប៉ែន Marine Le Pen នៃបក្សរណសិរ្សស្តាំជ្រុលនិយម ប្រឹងចុះតាមមូលដ្ឋាន ដើម្បីបញ្ចុះបញ្ចូលពលរដ្ឋនៅស្ទាក់ស្ទើរ ឱ្យងាកមកគាំទ្រលោកស្រី យកឈ្នះបេក្ខជនកណ្តាលនិយម លោក អេម៉ានុយអែល ម៉ាក្រុង Emmanuel Macron ដែលចង់តស៊ូមតិឃោសនាដោយផ្តោតលើតម្លៃនៃប្រទេសបារាំង។
ចុះផ្សាយនៅថ្ងៃ៖
ស្តាប់ - ០២:២៣
បន្ទាប់ពីបានចុះទៅឃោសនាផ្ទាល់ដល់រោងចក្រសហគ្រាសមានវិបត្តិប្រុងបិទទ្វារ និងការប្រកាសចងសម្ព័ន្ធមេត្រីជាមួយបក្សអធិបតេយ្យជាតិនិយម លោកស្រីបេក្ខនារីប្រធានាធិបតី បានជ្រើសរើសផ្តោតប្រធានបទនៃការឃោសនាទៅលើវិស័យបរិស្ថាន នៅចុះទៅភាគខាងត្បូង ក្នុងតំបន់សមុទ្ទមេឌីទែរ៉ាណេ ក្នុងទស្សនៈវិស័យការពារបរិស្ថាន គោរពសុខភាព និងការពារការងារ។
មិនតែប៉ុណ្ណោះ លោកស្រី បានធ្វើសេចក្តីប្រកាសដ៏ភ្ញាក់ផ្អើល បែបបញ្ច្រាសស្រកីនឹងជំហរប្រឆាំងអឺរ៉ុបចង់ដើរចេញពីអឺរ៉ុបពីមុន ថានឹងរក្សាទុកប្រាក់អឺរ៉ូជាលុយជាតិដដែល ដើម្បីសេដ្ឋកិច្ច។ លោកស្រី ដែលតាំងខ្លួនជាអ្នកស្នេហាជាតិនិយម (មិនមែនជាអ្នកជ្រុលនិយម) បានពង្រីកយុទ្ធនាការតាមមូលដ្ឋាន ដោយសង្ឃឹមអាចអូសទាញសំឡេងពលរដ្ឋឱ្យងាកមកគាំទ្រលោកស្រី និងសង្ឃឹមថាអាចក្រឡាប់ការស្ទង់មតិដែលទស្សទាយថាលោកស្រីនឹងចាញ់ឆ្នោតនៅថ្ងៃទី ៧ឧសភា។
ចំណែកបេក្ខជនវ័យក្មេង អ្នកកណ្តាល និងអឺរ៉ុបនិយម អេម៉ានុយអែល ម៉ាក្រុង វិញ បន្ទាប់ពីបានអញ្ជើញទៅភូមិរងគ្រោះខ្លាំងសង្គ្រាមលោកលើកទីពីរ ដើម្បីរំលឹកកុំឱ្យភ្លេចទំព័រខ្មៅនៃប្រវត្តិសាស្ត្របារាំងមក លោកមានកម្មវិធីចុះទៅទស្សនាស្តូបវិញ្ញាណក្ខន្តShoah នៅប៉ារីស ព្រោះថ្ងៃអាទិត្យទី ៣០មេសា ជាទិវាជាតិរំលឹកដល់ជនរងគ្រោះសង្គ្រាមទៀត។ លោកម៉ាក្រុង បានទទួលការគាំទ្រ កាន់តែច្រើនឡើងៗ ពីសំណាក់អ្នកនយោបាយ សិល្បករ សមាគមន៍នានា ដែលអំពាវនាវឱ្យម្ចាស់ឆ្នោតកុំនៅស្ងៀម ត្រូវតែទៅបោះឆ្នោតជូនលោកម៉ាក្រុង ដើម្បីរក្សាតម្លៃនៃរបបសាធារណរដ្ឋ។ បើ លោកស្រី ឡឺប៉ែន ជាប់ឆ្នោត នោះជីវិតនយោបាយបារាំងមានតែសញ្ញាអវិជ្ជមាន។
ប៉ុន្តែយ៉ាងណាក៏ដោយ ក៏គំលាតគាំទ្ររវាងបេក្ខជនអ្នកកណ្តាលនិយម អេម៉ាណុយអែល ម៉ាក្រុង និងបេក្ខនារី ម៉ារីន ឡឺប៉ែន មានកាន់តែតិចទៅៗ ពោលគឺ ៥៩%សម្រាប់លោក ម៉ាក្រុង និង៤១% សម្រាប់លោកស្រី ម៉ារីន ឡឺប៉ែន។ នេះបើតាមការស្ទង់មតិចុងក្រោយ។ ជាងនេះទៅទៀត លោកស្រី ទើបទទួលបានការគាំទ្រពីគណបក្សអធិបតេយ្យជាតិនិយម France Debout ដែលមានសំឡេងគាំទ្រប្រមាណ ៤,៧% ក្នុងសម័យបោះឆ្នោតជុំទីមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ