តើបេក្ខជនប្រធានាធិបតីបារាំង មានកម្មវិធីនយោបាយការបរទេស ខុសគ្នាដូចម្តេចខ្លះ ?
ចុះផ្សាយនៅថ្ងៃ៖
ស្តាប់ - ០៤:៥១
តើបារាំងដែលជាមហាអំណាចពិភពលោកលំដាប់ទី៥ -ជាសមាជិកអចិន្ត្រៃយ៍នៃក្រុមប្រឹក្សាសន្តិសុខ អង្គការសហប្រជាជាតិ នឹងមាននយោបាយការបរទេសយ៉ាងណា ក្រោយការបោះឆ្នោតប្រធានាធិបតីឆ្នាំ២០១៧រួច ? លោកស្រី ម៉ារីន ឡឺប៉ែន និងលោកអេម៉ានុយអែល ម៉ាក្រុង ដែលត្រូវប្រកួតប្រជែងគ្នាផ្តាច់ព្រ័ត្រ នៅថ្ងៃទី ៧ ឧសភា យកតំណែងប្រធានាធិបតីបារាំង មានកម្មវិធីនយោបាយការបរទេស និងទស្សនៈវិស័យការទូត ផ្សេងគ្នាស្រលះ។
ក្នុងបរិបទដែលពិភពលោកមានស្ថានភាពតានតឹងខ្លាំង ដោយហេតុតែអស្ថិរភាពនៃភូមិសាស្ត្រនយោបាយ (នៅអាហ្វហ្កានីស្ថាន កូរ៉េខាងជើង អ៊ីរ៉ាក់ លីប៊ី ស៊ីរី តួកគី ...) និងដោយចរន្តពិភពលោកភាវូបនីកម្ម ដោយការគំរាមកំហែងភេរវកម្ម ... ប្រធានបទរសើបៗមានច្រើន ឯពលរដ្ឋបារាំងត្រូវធ្វើការជ្រើសរើសប្រធានាធិបតី ក្នុងចំណោមបេក្ខជនពីររូបដែលមានទំនោរនយោបាយការទូតស្ទើរផ្ទុយគ្នាស្រលះ។
សម្រាប់បេក្ខជន អេម៉ានុយអែល ម៉ាក្រុង នៃចលនាEn Marche ! ដែលប្រកាន់ប្រពៃណីជាអ្នកសាធារណរដ្ឋបែប De Gaulle មាន នយោបាយការបរទេសឈរលើទិសដៅបី “បន្ថែមនិងដាច់ពីគ្នា” គឺ ឯករាជ្យ មនុស្សធម៌និយម និង អឺរ៉ុប។
ចំណែកបេក្ខនារី ម៉ារីន ឡឺប៉ែន នៃបក្សរណសិរ្យស្តាំនិយមជ្រុលវិញ នឹងសាងនយោបាយការទូត ដោយឈរលើគោលការណ៍ “ប្រាកដនិយម” ដើម្បីឱ្យបារាំងបានបំពេញតួនាទីជា "មហាអំណាច រក្សាស្ថិរភាព និងលំនឹង” ឱ្យពិភពលោកពហុប៉ូល។
នេះជាគម្រោងគោល ! ប៉ុន្តែនៅមានសំណុំឯកសារនយោបាយការទូតធំៗផ្សេងទៀត ដែលបញ្ជាក់ពីភាពខុសគ្នារវាងបេក្ខជនទាំងពីរ។
សហភាពអឺរ៉ុប និងភាពជាដៃគូដឹកនាំបារាំង-អាល្លឺម៉ង់
ប្រធានបទអឺរ៉ុប បានហែកជាទស្សនៈវិស័យបារាំងជាពីរដាច់គ្នាតែម្តង សឹងចាត់ទុកបានការបោះឆ្នោតប្រធានាធិបតីបារាំងថ្ងៃទី ៧ឧសភា ជាថ្ងៃបោះឆ្នោតប្រជាមតិស្តីពីបេក្ខភាពបារាំងក្នុងសហភាពអឺរ៉ុបផង។
លោកស្រីម៉ារីន ឡឺប៉ែន ប្រឆាំងដាច់ខាតអឺរ៉ុប ! អឺរ៉ុបជា ពន្ធនាគារ ជាស្ថាប័នសប្បនិម្មិត្ត កម្មវិធីនយោបាយលោកស្រីផ្តោតខ្លាំងលើសមាជិកភាពបារាំងក្នុងសហភាព ដោយលោកស្រីចង់ចរចាឡើងវិញ ដើម្បីទាមទារសុំអធិបតេយ្យភាពជាតិមកវិញ។ លោកស្រីបានសន្យានាំបារាំងដើរចេញពីសហភាពអឺរ៉ុប ដូចអង់គ្លេសតាមរយៈប្រជាមតិ។
ស្រលាញ់និងគាំទ្រអឺរ៉ុប តែក៏រិះគន់ព្រោះដឹងថាបារាំងបានបាត់អំណាចច្រើននៅក្នុងសហភាព លោក អេម៉ានុយអែល ម៉ាក្រុង មានគម្រោងចង់ជ្រោងអឺរ៉ុបឱ្យកាន់តែខ្លាំង ចង់ធ្វើប្រជាធិបតេយ្យ និងស្ថាបនាមូលដ្ឋានគ្រឹះអឺរ៉ុបឡើងវិញ។ បារាំងរបស់លោក ម៉ាក្រុង គ្រោងបង្កើតរដ្ឋាភិបាលសេដ្ឋកិច្ចអឺរ៉ុប សភា និងកញ្ចប់ថវិកាសម្រាប់តំបន់អឺរ៉ូ ព្រមទាំងបង្កើតមូលនិធិអឺរ៉ុបសម្រាប់វិស័យការពារជាតិ ដោយត្រូវមានហិរញ្ញវត្ថុនិងសព្វាវុធរួម ផ្ទុយពីលោកស្រីឡឺប៉ែន ដែលចង់លើកស្ទួយនិងពង្រឹងអំណាចយោធាបារាំង។
នៅក្នុងអំឡុងពេលឃោសនាតាំងពីដើមមក លោក ម៉ាក្រុង បានតាំងខ្លួនជាអ្នកការពារអឺរ៉ុបជាងគេ និងចង់រឹងចំណងដៃគូបារាំង-អាល្លឺម៉ង់ ដែលជាក្បាលម៉ាស៊ីនដឹកនាំអឺរ៉ុប ដោយសន្យាទៅជួបលោកស្រីមែរកិលមុនគេ នៅពេលជាប់ឆ្នោតភ្លាម។ ចំណែកលោកស្រី ឡឺប៉ែន បានបដិសេធយ៉ាងដាច់អហង្ការថាមិនធ្វើជាអនុប្រធានរបស់លោកស្រីមែរកិលទេ ! និងបានបន្ទោសប្រមុខដឹកនាំបារាំងមុនៗ សុទ្ធតែបានទៅសួរចិត្តពីប៊ែរឡាំងសិនមុននឹងសម្រេចការអ្វីមួយ។
អូតង់
ចង់ចេញពីអឺរ៉ុបហើយ បារាំងរបស់លោកស្រីឡឺប៉ែន ក៏នឹងចង់ចាកចេញពីអង្គការអូតង់ដែរ ព្រោះអង្គការនេះបាននាំបារាំងឱ្យលុងតែក្នុងសង្គ្រាម។ ខុសពីបារាំងរបស់លោក ម៉ាក្រុង ដែលរក្សាសមាជិកភាពបារាំងក្នុងអូតង់ ដោយគ្រាន់តែប្រុងប្រយ័ត្នមិនចេញធ្វើអន្តរាគមន៍ ក្រៅតំបន់គ្មាននាំប្រយោជន៍ដល់ប្រទេស។
ស៊ីរី
ចំពោះសំណុំរឿងដ៏ក្តៅគគុកស៊ីរីវិញ បេក្ខជនទាំងពីរមានជំហរខ្វែងគ្នាខ្លាំងដែរ។ ដំបូងឡើយ បេក្ខជនម៉ាក្រុង ប្រឆាំងនឹងការយកការចាកចេញពីតំណែងលោកអាសាដ ជាលក្ខខណ្ឌ ដោះស្រាយវិបត្តិ តែក្រោយមកក្រោយមានការវាយប្រហារអាវុធគីមី លោក ម៉ាក្រុងថា លោកអាសាដត្រូវប្រឈមនឹងតុលាការអន្តរជាតិពីបទឧក្រិដ្ឋកម្ម តែបានផ្តល់អាទិភាពពីរលើសំណុំរឿងស៊ីរី គឺកម្ចាត់ពួកអង្គការរដ្ឋអ៊ីស្លាម និងចលនាភេរវនិយមអ៊ីស្លាមផ្សេងៗសិន បន្ទាប់មកទើបគូសវាសផែនទីចង្អុលផ្លូវការទូតនិងនយោបាយតាមក្រោយ។
ឯលោកស្រីម៉ារីន ឡឺប៉ែន ចាត់ទុក លោក អាសាដ ជាតំណាងដំណោះស្រាយគួរដ៏ស្ថិតស្ថេរ ប្រឆាំងនឹងពួកអ៊ីស្លាមជ្រុលនិយម។ សម្រាប់លោកស្រី គេត្រូវបន្តចរចាជាមួយប្រធានាធិបតីស៊ីរី ដរាបណាគ្មានមនុស្សផ្សេងគួរឱ្យទុកចិត្ត។
ទំនាក់ទំនងជាមួយរុស្ស៊ីនិងសហរដ្ឋអាមេរិក
អនាគតប្រធានាធិបតីបារាំង ក៏គិតគូរអំពីទំនាក់ទំនងជាមួយរុស្ស៊ីរបស់លោក ពូទីន និងសហរដ្ឋអាមេរិករបស់លោកត្រាំ។ លោកស្រី ឡឺប៉ែន ជាអ្នកនយោបាយបារាំងតែម្នាក់គត់ ដែលអបអរជ័យជំនះរបស់លោកត្រាំ ជាប្រធានាធិបតីអាមេរិក ព្រោះយល់ថាលោកត្រាំបានអនុវត្តកម្មវិធីដឹកនាំប្រទេសតាមអ្វីដែលលោកស្រីបានស្នើតាំងពីយូរឆ្នាំមកហើយ។ ជាមួយរុស្ស៊ីវិញ លោកស្រីឡឺប៉ែន ទាមទារជាយូរមកហើយដែរឱ្យអឺរ៉ុបខិតចូលរុស្ស៊ី ដែលជាយុទ្ធសាស្ត្រមួយសម្រាប់ប្រយុទ្ធប្រឆាំងពួកអ៊ីស្លាមជ្រុលនិយម។ ទង្វើរុស្ស៊ីក្រសោបយកទឹកដីគ្រីមេរបស់អ៊ុយក្រែន មិនមែនខុសច្បាប់ទេសម្រាប់ក្រសែភ្នែកលោកស្រីឡឺប៉ែន ហេតុដូច្នេះហើយលោកស្រីចង់ដកទណ្ឌកម្មអឺរ៉ុបចេញពីរុស្ស៊ី។ លោកស្រីជាបេក្ខជនប្រធានាធិបតីបារាំងដំបូងដែលបានទទួលជួបដោយលោកពូទីន កាលពីខែមុន។
ចំណែកលោក ម៉ាក្រុង អ្នកការពារអឺរ៉ុបបំផុតវិញ ក៏យល់ថា អឺរ៉ុបគួរតែត្រូវរ៉ូវជាមួយរុស្ស៊ី និងផ្សារភ្ជាប់ទំនងទំនងជាធម្មតាឡើងវិញ ប៉ុន្តែមិនអាចលើកទណ្ឌកម្មចេញបានឡើយ បើកាលណារុស្ស៊ីមិនគោរពកិច្ចព្រមព្រៀងស្តីពីវិបត្តិអ៊ុយក្រែនទេ។ លោកបានរិះគន់នយោបាយការបរទេសរបស់ពូទីន ថាជាគ្រោះថ្នាក់ និងរាល់ការពិភាក្សាជាមួយម៉ូស្គូត្រូវផ្អែកលើលក្ខខណ្ឌគោរពសិទ្ធិមនុស្ស។ ជាមួយអាមេរិក ក៏ដូចគ្នា លោក ម៉ាក្រុងបានរិះគន់លោកត្រាំថាមាននយោបាយការទូតឯកោ បង្កបង្កើតភាពសង្ស័យ តែបើកចំហផងដោយអំពាវនាវថាបារាំងត្រូវការសម្ព័ន្ធមិត្តនិងសហប្រតិបត្តិការល្អជាមួយវ៉ាស៊ីនតោន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ