បារាំងស្នើឱ្យមាន “ការតាមដានអន្តរជាតិ” តំបន់សុវត្ថិភាពស៊ីរី
បារាំងបានទទួលកត់ត្រាព័ត៌មានដែលរុស្ស៊ី អ៊ីរ៉ង់ តួកគី និងស៊ីរី ចុះកិច្ចព្រមព្រៀងបង្កើតតំបន់សុវត្ថិភាព នៅលើទឹកដីស៊ីរី។ ប៉ុន្តែសម្រាប់បារាំង ដើម្បីឱ្យផែនការដែលមានទិសដៅស្តារបទឈប់បាញ់ មានប្រសិទ្ធភាពយូរអង្វែងបាន គេត្រូវតែមានការតាមដានអន្តរជាតិ។ ព្រោះថានេះមិនដឹងជាប៉ុន្មានលើកប៉ុន្មានសាហើយទេ ដែលគេផ្តួចផ្តើមឱ្យមានបទឈប់បាញ់ជានិរន្តមួយសម្រាប់បិទបញ្ចប់សង្គ្រាមស៊ីរីតាំងពីឆ្នាំ២០១១មក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
រុស្ស៊ី និងអ៊ីរ៉ង់ សម្ព័ន្ធមិត្តរបស់ប្រធានាធិបតីស៊ីរី លោក អាសាដ និងតួកគី ដែលគាំទ្រពួកឧទ្ទាមនៅស៊ីរី បានអនុម័ត នៅថ្ងៃព្រហស្បតិ៍ ទទួលយកផែនការរបស់រុស្ស៊ីដែលស្នើបង្កើតតំបន់សុវត្ថិភាព ជាច្រើនកន្លែងនៅក្នុងទឹកដីស៊ីរី សម្រាប់រយៈពេលដំបូង៦ខែហើយអាចពន្យារបន្តបាន។
តាមគំនិត រុស្ស៊ីចង់ឱ្យមានបទឈប់បាញ់តាមតំបន់ ដែលយន្តហោះរុស្ស៊ីនិងស៊ីរីលែងអាចហោះហើរឆ្លងកាត់បាន។ តំបន់សុវត្ថិភាពនោះត្រូវ ស្ថិតក្រោមការត្រួតពិនិត្យរបស់ពួកឧទ្ទាមប្រឆាំងមិនសូវតឹងតែង។ ឯចំណែកតំបន់មានការប្រយុទ្ធគ្នា ពួកឧទ្ទាមប្រឆាំងត្រូវសហការជួយកងកម្លាំងរដ្ឋាភិបាលនិងសម្ព័ន្ធមិត្ត វាយប្រឆាំងនឹងពួកជីហាតរដ្ឋអ៊ីស្លាម។ ភាគីនីមួយៗត្រូវគ្រប់គ្រងតំបន់ ដោយដាច់និងឯករាជ្យ។
តំបន់សុវត្ថិភាពនឹងត្រូវកំណត់នៅ៥ថ្ងៃទៀត ហើយការគូសវាសផែនទីបញ្ជាក់ទីតាំងភូមិសាស្ត្រ នឹងត្រូវសម្រេចនៅរវាងថ្ងៃទី ២២ឧសភា។ ប៉ុន្តែជាគោលការណ៍តំបន់សុវត្ថិភាពទាំង៤នោះរាយនៅភាគពាយ័ព្យប្រទេស ខាងជើងខេត្តហ៊ូម មូលដ្ឋានរបស់ពួកឧទ្ទាមនៅខាងកើតក្រុងដាម៉ាស និងនៅភាគខាងត្បូងប្រទេស ក្នុងខេត្ត Deraa។
ផែនការរុស្ស៊ី ដែលបានទទួលការព្រមព្រៀងពីអ៊ីរ៉ង់ និងតួកគី ក៏ជាចម្លើយតបទៅនឹងសេចក្តីទាមទារបង្កើតតំបន់ហោះហើរឃាត់ របស់តួកគីផង និងរបស់លោកដូណាល់ ត្រាំផង។ ហេតុដូច្នេះហើយបានជាវ៉ាស៊ីនតោន ក៏លួចអបអរកិច្ចព្រមព្រៀងនេះ។
បន្ទាប់ពីមានប្រតិកម្មលើកទឹកចិត្តរបស់អង្គការសហប្រជាជាតិ ប្រទេសបារាំងបានបង្ហាញក្តីសង្ឃឹមថាពាក្យសន្យាលើក្រដាសនឹងក្លាយជាសកម្មភាព ដើម្បីឱ្យក្រុមមនុស្សធម៌អាចចេញចូលដោយសេរីជួយជនស៊ីវិល។ ប៉ុន្តែសម្រាប់បារាំង បទឈប់បាញ់នេះត្រូវតែមានការតាមដានពីអន្តរជាតិ ហើយរបបក្រុងដាម៉ាស និងក្រុមប្រឆាំងស៊ីរីទាំងអស់ត្រូវតែវិលចូលតុចរចា ក្រោមម្លប់អង្គការសហប្រជាជាតិ ទើបអាចបញ្ចៀសអំពើហិង្សាមិនឱ្យផ្ទុះឡើងវិញបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ