ថ្នាក់ដឹកនាំពិភពលោកបានប្រតិកម្មគាំទ្រចំពោះជ័យជំនះរបស់លោក Macron
ថ្នាក់ដឹកនាំអឺរ៉ុបបានប្រតិកម្មគាំទ្រនិងសាទរមុនគេបង្អស់ចំពោះជ័យជំនះរបស់លោកម៉ាក្រុង ស្ថាបនិកចលនានយោបាយកណ្តាលនិយមបារាំងឈ្មោះ En Marche ដែលទើបជាប់ឆ្នោតជាប្រធានាធិបតីបារាំងថ្មី ដោយបានវាយតម្លៃថា ជាជ័យជំនះមួយសម្រាប់អ៊ឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ប្រធានគណកម្មការអឺរ៉ុបលោក Jean-Claude Junker បានថ្លែងអបអរសាទរចំពោះជ័យជំនះរបស់លោក ម៉ាក្រុងនៅក្នុងការបោះឆ្នោតប្រធានាធិបតីបារាំងកាលពីថ្ងៃអាទិត្យម្សិលមិញ ដោយបានគូសបញ្ជាក់ថា ប្រជាជនបារាំង បានធ្វើជម្រើសមួយយ៉ាងសំខាន់ដោយគិត”បញ្ហាអានាគតអឺរ៉ុបជាធំ”។
ចំណែកប្រធានក្រុមប្រឹក្សាអឺរ៉ុបលោក Donald Tusk វិញ បានស្វាគមន៍ចំពោះការសម្រេចចិត្តរបស់ពលរដ្ឋបារាំងនៅក្នុងការគាំទ្រ ”សេរីភាព សមភាព និងភាតរភាព”។
រីឯ ប្រធានសភាអឺរ៉ុបលោក Antonio Tajani វិញ បានប្រតិកម្មតាមប្រព័ន្ធ Tweeter បានថ្លែងថា”យើងពឹងផ្អែកលើប្រទេសបារាំងមួយដែលស្ថិតនៅក្នុងបេះដូងនៃទ្វីបអឺរ៉ុប ដើម្បីការផ្លាស់ប្តូរសហភាពរួមគ្នានិងស្ថិតនៅជិតជាមួយពលរដ្ឋ។
ចំណែកនាយករដ្ឋមន្ត្រីអង់គ្លេសវិញ ក៏បានអបអរសាទរយ៉ាងកក់ក្តៅដែរចំពោះជ័យជំនះរបស់លោក ម៉ាក្រុងដោយរំលឹកប្រាប់ថា អង់គ្លេស មានបំណងធ្វើជាដៃគូដ៏ខ្លាំងក្លាជាមួយសហភាពអឺរ៉ុបមួយដែលមានសុវត្ថិភាពនិងវិបុលភាព។
នាយករដ្ឋមន្ត្រីអាល្លឺម៉ង់វិញ អះអាងថា ជ័យជំនះរបស់លោកម៉ាក្រុង គឺជាជ័យជំនះរបស់អឺរ៉ុបមួយដ៏ខ្លាំងក្លានិងមានការរួបរួមគ្នា។
នៅអាមេរិក លោកប្រធានាធិបតី Donal Trump តាមសារ Tweeter របស់លោក បានសំដែងការអបអរសាទរជ័យជំនះរបស់លោក Macron ដោយគូសបញ្ជាក់ផងដែរថាលោកមានក្តីអន្ទះអន្ទែងចង់ធ្វើការឆាប់ៗជាមួយប្រធានាធិបតីថ្មីនៃប្រទេសបារាំង។
រីឯលោកស្រីHillary Clintonដែលជាគូបដិបក្សរបស់លោក Trumpក្នុងការបោះឆ្នោតប្រធានាធិបតីអាមេរិកឆ្នាំ២០១៦ បានប្រតិកម្មតាម Tweeter ថាគឺ"ជាជ័យជំនះមួយរបស់លោក Macron និងរបស់បារាំង ក៏ព្រមទាំងសហភាពអឺរ៉ុបនិងពិភពលោកទាំងមូល” ។
ចំពោះសកម្មជនអាមេរិកខាងសិទ្ធមូលដ្ឋានដ៏ល្បី គឺបុព្វជិត Jesse Jackson លោកបានថ្លែងសរសើរចំពោះពលរដ្ឋបារាំងដែលបានបោះឆ្នោតដើម្បីការរួបរួមគ្នាប្រឆាំងទល់នឹងការបែងចែក និងសេចក្តីសង្ឃឹមជាជាងការភ័យខ្លាច។
ចំណែកប្រធានាធិតបីរុស្ស៊ីនៅថ្ងៃចន្ទនេះ បានជម្រុញអោយប្រធានាធិបតីបារាំងជាប់ឆ្នោតថ្មី យកឈ្នះនៅលើការមិនទុកចិត្តគ្នារវាងទីក្រុងប៉ារីសនិងម៉ូស្គូ ដើម្បីប្រយុទ្ធរួមគ្នាដើម្បីប្រឆាំងការគំរាមភេរវនិយមនិងពួកអ៊ីស្លាមជ្រុលនិយមដែលកាន់តែកើនឡើងនិងដ៏សាហាវ។
ក្រៅពីអ្នកដឹកនាំនៅអឺរ៉ុបនិងនៅអាមេរិក ក៏មានថ្នាក់ដឹកនាំប្រទេសនានាផ្សេងៗទៀតនៅក្នុងពិភពលោក បានផ្ញើសារអបអរសាទរចំពោះប្រធានាធតិបតីជាប់ឆ្នោតថ្មីរបស់បារាំងដែរដែលក្នុងនោះមាន ប្រេស៊ីល បែលហ្ស៊ីក អេស្បាញ ក្រិក អ៊ុយក្រែន កាណាដា ហូឡង់ អ៊ីស្រាអែល ម៉ារ៉ុក ទុយនីស៊ី ជប៉ុន ចិន លនិងល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ