ម៉ូស្គូ ចង់បានការគាំទ្រពីវ៉ាស៊ីតោនចំពោះគម្រោងរុស្ស៊ីសំដៅបន្ថយអំពើហិង្សានៅស៊ីរី
ថ្ងៃពុធនេះ លោកប្រធានាធិបតី សរអា ដូណាល់ ត្រាំ នឹងទទួលជួបលោកប្រមុខការទូត រុស្ស៊ី ស៊ែរហ្គៃ ឡាវ្រ៉ូវ ដែលបានទៅដល់ក្រុងវ៉ាស៊ីតោន ដើម្បីស្វែងរក ការគាំទ្រពីខាងសេតវិមាន ចំពោះ គម្រោងរុស្ស៊ី រួមជាមួយ តួកគី និង អ៊ីរ៉ង់ បង្កើតជា “ ៤ តំបន់សន្តិសុខ “ នៅស៊ីរី សំដៅទៅបន្ទាបអំពើហិង្សា ក្នុងប្រទេសនោះ ដែលក្នុង៦ឆ្នាំកន្លងទៅ បានផ្តាច់ជីវិតអ្នកស្រុក អស់ដល់ទៅជាង ៣សែន២ម៉ឺននាក់ ហើយគម្រោងនេះឯង ត្រូវបានម៉ូស្គូ ដាក់ជូនក្រុមប្រឹក្សាសន្តិសុខអ.ស.ប.កាលពីថ្ងៃចន្ទ ៨ ឧសភា សម្រាប់ ទទួលការពិភាក្សាក្នុងសប្តាហ៏នេះតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
កិច្ចសន្ទនាលោកឡាវ្រ៉ូវ ជាមួយលោក ត្រាំ ក្នុងការិយាល័យរាងពងក្រពើនៃសេតវិមាន នឹងចាប់ ផ្តើម នៅម៉ោង ១៨-៣០នាទីម៉ោងម៉ូស្គូ ត្រូវនឹងម៉ោង ២២-៣០នាទី ម៉ោងនៅភ្នំពេញ។ នេះជាលើកទី១ ដែលចៅហ្វាយថ្មីនៃសេតវិមានទទួលជួប អ្នកមុខអ្នកការជាន់ខ្ពស់រុស្ស៊ី ខណៈដែលទំនាក់ទំនង រវាង មហាអំណាចទាំងពីរ ធ្លាក់ដល់ស្ថានភាពអាក្រក់មែនទែន។
ប៉ុន្តែមុនដំបូង លោកឡាវ្រ៉ូវ ត្រូវទទួលជួបដោយ សមភាគិអាមេរិកាំង លោក Rex Tillerson គឺមួយថ្ងៃ ក្រោយពី នាយក FBI លោក James Comey ត្រូវបានទំលាក់ពីតំណែង ពាក់ព័ន្ធនឹងរឿងរ៉ាវ ថា ក្រុមជំនិត របស់លោកត្រាំ បានមានទំនាក់ទំនង ជាមួយរុស្ស៊ី ក្នុងសម័យឃោសនាបោះឆ្នោតនៅអាមេរិក ឆ្នាំ២០១៦។
រដ្ឋមន្ត្រីការបរទេសរុស្ស៊ី ដែលធ្លាប់បានជួបលោក Tillerson ពីរដងទៅហើយ ៖ ម្តងនៅប្រទេសអាល្លឺម៉ង់ ម្តងទៀត នៅម៉ូស្គូផ្ទាល់ មិនដែលបានទៅកាន់ក្រុងវ៉ាស៊ីនតោនទេ តាំងពីខែសីហាឆ្នាំ២០១៣មក។ សម័យ នោះ គាត់ឧស្សាហ៏ជួប សមភាគីអាមេរិកាំងរបស់គាត់ គឺលោក ចន ឃេរី ខិតខំរកមធ្យោបាយ បញ្ឈប់ សង្គ្រាមនៅស៊ីរី។
គឺថ្ងៃព្រហស្បត៏ទី៤ ឧសភា ដែលក្នុងក្រុង អាស្តាណា រដ្ឋធានី កាហ្សាក់ស្ថាន ៣ប្រទេសដែលជា អ្នកធានា ដល់ការឈប់បាញ់នៅស៊ីរី ពោលគឺ រុស្ស៊ី តួកគី អ៊ីរ៉ង់ បានចុះហត្ថលេខាលើ គម្រោងសំដៅបន្ថយអំពើហិង្សា នៅស៊ីរី។ ចូលជាធរមានថ្ងៃសៅរ៏ ៦ ឧសភា គម្រោងនោះ ប្រមើលបង្កើតឡើងជា “ ៤តំបន់សន្តិសុខ “
ហែហម ទៅដោយ ប៉ុស្តកុងត្រូល និង មជ្ឈមណ្ឌលត្រួតពិនិត្យ ដែលឈរជើងដោយកងកម្លាំង ៣ប្រទេស នោះ។
សហរដ្ឋអាមេរិក ដែលបានវត្តមាននៅក្រុង អាស្តាណា តែក្នុងឋានៈ ជាអ្នកសង្កេតការណ៍ បានសាទរ គម្រោងនោះ ទាំងប្រយ័ត្នប្រយែង ពីព្រោះលោករដ្ឋមន្ត្រីការពារជាតិអាមេរិកាំង James Mattis បានថ្លែង ម្សិលម៉្ងៃថា ប្រទេសគាត់នឹងតាមដានមើល តើគម្រោងនោះ នឹងដំណើរការយ៉ាងណាដែរ។
ក្នុង៦ឆ្នាំកន្លងទៅ ម៉ូស្គូនិងវ៉ាស៊ីនតោន តែងខ្វែងគំនិតគ្នា ក្នុងការរកដំណោះស្រាយឲ្យជម្លោះនៅស៊ីរី ដែល ឧបសគ្គបឋមទី១ គឺ ពាក់ព័ន្ធនឹងវាសនា លោកប្រធានាធិបតី បាស្ហា អាល់ អាសាដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ