បារាំងមាននាយករដ្ឋមន្ត្រីថ្មីជាអ្នកស្តាំនិយម ឈ្មោះលោក អេដ័រ ហ្វីលីព
មុននឹងធ្វើដំណើរទស្សនកិច្ច នៅប្រទេសអាល្លឺម៉ង់ ជាលើកដំបូង ក្នុងឋានៈជាប្រមុខរដ្ឋ និងក្នុងន័យផ្តល់សន្ទុះដល់អឺរ៉ុប និងដល់ទំនាក់ទំនងបារាំង-អាល្លឺម៉ង់ លោក អេម៉ានុយអែល ម៉ាក្រុង ប្រធានាធិបតីបារាំងថ្មី បានប្រកាសតែងតាំងនាយករដ្ឋមន្ត្រី នៅថ្ងៃចន្ទនេះ។ តួនាទីដ៏សំខាន់ និងជាយុទ្ធសាស្ត្របំផុតនេះ ត្រូវបានប្រគល់ទៅ លោក អេដ័រ ហ្វីលីព Edouard Philippe។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
មានអាយុ ៤៦ ឆ្នាំ អេដ័រ ហ្វីលីព ទំនងជាឆ្លើយតបបានគ្រប់យ៉ាងនឹងលក្ខខណ្ឌតម្រូវ ទើបអាចក្លាយជានាយករដ្ឋមន្ត្រីរបស់លោកម៉ាក្រុង។ មានបទពិសោធន៍ច្រើនយ៉ាង ទាំងក្នុងវិស័យសាធារណៈ និងឯកជន លោកក៏ជាចៅហ្វាយស្រុក អាវ (កំពង់ផែអាវ) ជាអ្នកស្តាំកណ្តាលនិយមនៃបក្សសាធារណរដ្ឋ ស្និទ្ធខ្លាំងនឹងលោក អាឡាំង ហ្ស៊ូប៉េ (គូប្រជែងរបស់លោកហ្វីយ៉ុងនិងជាបេក្ខជនចាញ់ឆ្នោតក្នុងសម័យបោះឆ្នោតជ្រើសរើសបេក្ខជនប្រធានាធិបតីប្រចាំបក្សសាធារណរដ្ឋ)។
ជម្រើសនេះ ត្រូវបានគេសំឡឹងឃើញជាយុទ្ធសាស្ត្រដ៏ខ្ពស់ របស់លោកប្រធានាធិបតី ម៉ាក្រុង ព្រោះអាចនឹងធ្វើឱ្យអ្នកសាធារណរដ្ឋផ្សេងងាកមកចូលរួមក្នុងបក្សរបស់លោក។ ពោលគឺជាយុទ្ធសាស្ត្រទាក់ទាញបំបែកសំឡេងបក្សធំៗ ស្តាំនិយម ឬឆ្វេងនិយម ដើម្បីមានសំណាងខ្ពស់បានឈ្នះឆ្នោតសភា នាខែមិថុនាខាងមុខ។
សូមបញ្ជាក់ថា លោក ម៉ាក្រុង ជាប្រធានាធិបតីប្រសូតចេញពីចលនា En Marche ដែលពេលនេះបានក្លាយជាបក្សនយោបាយមួយហើយ មានឈ្មោះថាសាធារណរដ្ឋEn Marche។ ជាមួយនឹងចលនានយោបាយថ្មីថ្មោង និងជាអ្នកកណ្តាលនិយម ហានិភ័យដ៏ធំធេងមួយដែលលោកត្រូវជំនះឱ្យបាន គឺប្រមូលសំឡេងភាគច្រើនដាច់ខាតឱ្យបាន នៅក្នុងការបោះឆ្នោតសភាខែមិថុនាខាងមុខ។ បើបរាជ័យមានន័យថាលោកម៉ាក្រុង ត្រូវដឹកនាំប្រទេសដោយមានរដ្ឋាភិបាលចម្រុះ និងដោយមាននាយករដ្ឋមន្ត្រីអាចជាឥស្សរជនមកពីប្រឆាំង។ គឺជាសេណារីយោដែលលោកម៉ាក្រុង ចង់បញ្ចៀសឱ្យបាន ដើម្បីអាចមានអំណាចគ្រប់គ្រាន់ក្នុងការដឹកនាំប្រទេសធ្វើកំណែទម្រង់ផ្សេង តាមដែលលោកចង់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ