កីឡាអូឡាំពិក ៖ តើប៉ារីស និង Los Angeles មានចំណុចខ្លាំងនិងខ្សោយខុសគ្នាយ៉ាងណាខ្លះ ?
ចុះផ្សាយនៅថ្ងៃ៖
ស្តាប់ - ០៤:២៣
គណៈប្រតិភូនៃគណៈកម្មាធិការអូឡាំពិកអន្តរជាតិកំពុងបំពេញទស្សនកិច្ច នៅក្នុងទីក្រុងប៉ារីស ដើម្បីត្រួតពិនិត្យមើលហេដ្ឋារចនាសម្ព័ន្ធកីឡា និងធ្វើការវាយតម្លៃលើបេក្ខភាពរបស់ក្រុងប៉ារីស ដែលចង់ធ្វើជាម្ចាស់ផ្ទះ រៀបចំការប្រកួតកីឡាអូឡាំពិក នៅឆ្នាំ២០២៤។ គណៈប្រតិភូអូឡាំពិកក៏ត្រូវបានទទួលស្វាគមន៍ ដោយលោកប្រធានាធិបតីម៉ាក្រុង នៅវិមានអេលីសេ នៅថ្ងៃអង្គារនេះ។ គួរបញ្ជាក់ថា នៅក្នុងការរៀបចំការប្រកួតកីឡាអូឡាំពិចឆ្នាំ២០២៤នេះ ប៉ារីសត្រូវប្រកួតប្រជែងជាមួយនឹងទីក្រុង Los Angeles របស់អាមេរិក។
បន្ទាប់ពីបានបំពេញទស្សនកិច្ចប្រកបដោយជោគជ័យនៅទីក្រុងLos Angeles មក ប្រតិភូគណៈកម្មាធិការអូឡាំពិក បានអញ្ជើញមកក្រុងប៉ារីសម្តង។ ទស្សនកិច្ចប្រព្រឹត្តទៅដោយរលូន ហើយប៉ារីសក៏បានទទួលការសរសើរជាច្រើនពីគណៈកម្មាធិការ ប៉ុន្តែដរាបណាមិនទាន់មានការបោះឆ្នោតសម្រេចទេ ទាំងប៉ារីស ក៏ដូចLos Angeles មិនអាចស្រែកជ័យឃោសបានឡើយ។ ព្រោះថាក្រុងទាំងពីរ សុទ្ធតែមានចំណុចខ្លាំង និងចំណុចខ្សោយប្រហាក់ប្រហែលគ្នា។
នៅប៉ារីស ៩៥%នៃហេដ្ឋារចនាសម្ព័ន្ធកីឡាមានស្រាប់រួចទៅហើយ ដោយត្រូវសាងសង់តែភូមិអូឡាំពិកសម្រាប់កីឡាករសម្រាក ដែលក្រោយមកនឹងក្លាយទៅជាលំនៅដ្ឋានសម្រាប់ពលរដ្ឋយ៉ាងហោច៣៥០០គ្រួសារ។ ចំពោះទីតាំងប្រកួតមានសុទ្ធតែមានឈ្មោះល្បីៗ ដូចជាកីឡាប្រណាំងសេះនៅរាជរាំងVersailles ប្រកួតវិញ្ញាសា ក្រោមជើងTour Eiffel នៅក្នុងអាងធម្មជាតិទន្លេសែន ... តើកីឡាករ កីឡាការិនីណាមិនស្រមៃរូបភាពដ៏ល្អប្រណិតនេះ ម្យ៉ាងទៀតទីតាំងនីមួយៗសុទ្ធតែនៅជិតគ្នា ដោយចំណាយពេលធ្វើដំណើរតិចជាង៤៥នាទី។ ចំណែកLos Angeles ក៏មានរចនាសម្ព័ន្ធកីឡាស្រេចហើយដែរ និងមានផ្លាកហូលីវូត មួយដ៏ទាក់ទាញទៀត។ Los Angeles មិនត្រូវការសាងសង់អ្វីទាំងអស់ ក្រុងនឹងប្រែក្លាយសកលវិទ្យាល័យមួយទៅជាភូមិអូឡាំពិកតែម្តង។
ដូច្នេះបទពិសោធន៍មិនល្អ ភូមិដ្ឋានកីឡា ដែលចំណាយសាងសង់អស់រាប់លានត្រូវបោះបង់ចោលក្រោយព្រឹត្តិការណ៍កីឡា... មិនអាចកើតឡើងបានទេ Los Angeles និងប៉ារីស។
ចំពោះការចំណាយ ខាងLos Angeles មានប្រៀបជាងប៉ារីសបន្តិច ព្រោះមានគម្រោងចំណាយត្រឹមតែ ៥,៣ពាន់លានដុល្លារ ទល់នឹងប៉ារីស ៦,២ពាន់លានអឺរ៉ូ ក្នុងនោះ បីពាន់លានសម្រាប់សាងសង់ហេដ្ឋារចនាសម្ព័ន្ធ និងជាងបីពាន់លានទៀតសម្រាប់រៀបចំកម្មវិធី តែអស់តិចជាងចំណាយអូឡាំពិកនៅប៉េកាំងដល់ទៅ ៥ដងឯណោះ។
បើនិយាយអំពីមធ្យោបាយធ្វើដំណើរវិញ ប៉ារីសមានគុណសម្បត្តិនាំមុខខ្លាំងណាស់ ! ដោយសារតែទីតាំងប្រកួតកីឡា នៅផ្តុំជិតៗគ្នានិងប្រព័ន្ធដឹកជញ្ជូនប្រទាក់ក្រឡា និងជឿនលឿនស្រាប់ ប៉ារីសនឹងក្លាយជារដ្ឋធានីកីឡាគោរពបរិស្ថានជាងគេបំផុតក្នុងប្រវត្តិអូឡាំពិក។ ប៉ារីសនឹងក្លាយជាក្រុងគ្មានរថយន្ត មធ្យោបាយធ្វើដំណើររួមឥតគិតថ្លៃ និងមិនបញ្ចេញផ្សែងពុល ខុសពីLos Angeles ដែលក្រុងធំ ក្រុងទ្រវែងតាមមាត់សមុទ្ទមានអាកាសធាតុល្អ តែមានបណ្តោយវែង ផ្លូវឆ្ងាយ ត្រូវប្រើរថយន្តធម្មតា ប្រឈមនឹងការស្ទះចរាចរណ៍រាល់ថ្ងៃ។ ប៉ុន្តែគូប្រជែងអាមេរិកសន្យាថានឹងជួសជុលសាងសង់ ពង្រីកបណ្តាញដឹកជញ្ជូនសាធារណៈរថភ្លើងក្រោមដី ឱ្យដល់គ្រប់ទីតាំងប្រកួតកីឡា ក្នុងរយៈពេល២០នាទី។
ប៉ារីសក្រុងទេសចរណ៍មានសមត្ថភាពធំធេងណាស់ នឹងទទួលភ្ញៀវទាំងបរិមាណនិងគុណភាព ប៉ុន្តែ ប៉ារីសទំនងជាមានចំណុចខ្សោយខ្លាំងមួយ គឺបញ្ហាសន្តិសុខ។ ប៉ារីសដែលរងការវាយប្រហារភេរវកម្មជាច្រើនលើកនារយៈពេលប៉ុន្មានឆ្នាំចុងក្រោយនេះ ត្រូវយកឈ្នះចិត្តគណៈកម្មាធិការអូឡាំពិកឱ្យបាន ថាប៉ារីសមានសមត្ថភាពគ្រប់គ្រាន់នឹងការពារសុវត្ថិភាពទេសចរដែលមកតាមដានការប្រកួតកីឡាពេលនោះ។ អតីតប្រធានាធិបតីបារាំង លោក ហ្វ្រង់ស័រ ហូឡង់ ធ្លាប់បានព្រមានរួចហើយ ថាគ្មានប្រទេសណា រដ្ឋធានីណា មានការការពារបានដូចចាក់ថ្នាំបង្ការទេ។ បារាំងធ្លាប់រៀបចំកម្មវិធីកីឡាថ្នាក់អន្តរជាតិជាច្រើនរួចមកហើយប្រកបដោយជោគជ័យនាប៉ុន្មានឆ្នាំ ចុងក្រោយនេះ។
ទាំងប៉ារីស ទាំង Los Angeles សុទ្ធតែបានទទួលការគាំទ្រខ្លាំងពីពលរដ្ឋ ពីពិភពលោកកីឡា និងពីថ្នាក់ដឹកនាំនយោបាយ។ ខាងបារាំង លោក ម៉ាក្រុង ដែលទើបចូលកាន់តំណែងជាប្រធានាធិបតីថ្មីថ្មោង បានចំណាយពេលវេលាទទួលស្វាគមន៍ប្រតិភូនៃគណៈកម្មាធិការអូឡាំពិកនៅវិមានអេលីហ្សេព្រឹកថ្ងៃអង្គារទី ១៦ឧសភា ដែលជាសារបញ្ជាក់ថាបារាំងពិតជាមានឆន្ទៈពិតប្រាកដចង់ធ្វើជាម្ចាស់ផ្ទះទទួលរៀបចំកីឡាអូឡាំពិកពិតៗ។ Los Angeles ក៏មិនអន់ ! ចំនួនពលរដ្ឋគាំទ្រអូឡាំពិក មានកំរិតខ្ពស់ដល់ទៅ ៨៨%។ តែលើផ្នែកនយោបាយ បេក្ខភាពLos Angeles អាចស្រអាប់ជាងប៉ារីស ដោយហេតុតែមានលោក ដូណាល់ ត្រាំ ជាប្រធានាធិបតី ជាអ្នកប្រឆាំងនឹងអន្តោប្រវេសន៍ ដែលផ្ទុយស្រលះនឹងតម្លៃនៃអូឡាំពិក។
ក្រៅអំពីឆ្លើយតបបានទៅនឹងលក្ខខណ្ឌតម្រូវរបស់គណៈកម្មាធិការអូឡាំពិក ប៉ារីស និងLos Angeles មានគុណសម្បត្តិបន្ថែមមួយទៀត គឺអូឡាំពិក ២០២៤ ត្រូវជាខួប១០០ឆ្នាំគត់ ដែលប៉ារីសបានធ្វើជាម្ចាស់ផ្ទះរៀបចំកីឡានេះ។ ប៉ុន្តែបញ្ហានៅត្រង់ថា Los Angeles ក៏មានប្រវត្តិល្អ អាចរំពឹងលើវត្តមានក្រុមហ៊ុនអ៊ីនធ័រនែតទំនើបៗ យកបច្ចេកវិទ្យាចុងក្រោយមកបំរើកីឡា ទាក់ទាញទស្សនិកជន និងគណៈកម្មាធិការអូឡាំពិក។ ហេតុដូច្នេះហើយបានជាគណៈកម្មាធិការ ចង់ពិចារណា រកដំណោះស្រាយមួយ គឺឈ្នះឈ្នះ។ ឈ្នះ មួយ អូឡាំពិក ២០២៤ និង ឈ្នះពីរ គឺអូឡាំពិក២០២៨។ តើប៉ារីស ក៏Los Angeles ជាអ្នកទទួលរៀបចំអូឡាំពិក ២០២៤ ? ចម្លើយនឹងបានដឹងនៅថ្ងៃទី ១៣កញ្ញា ២០១៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ