ព្រឹទ្ធសភាបារាំង ស្នើឱ្យប៉ារីសបំពាក់អាវុធឱ្យយន្តហោះគ្មានមនុស្សបើក ដ្រូន
ចុះផ្សាយនៅថ្ងៃ៖
ស្តាប់ - ០៤:១៩
ក្នុងប្រតិបត្តិការក្រៅប្រទេស ក្រសួងការពារជាតិបារាំង ប្រើប្រាស់យន្តហោះគ្មានមនុស្សបើក ដ្រូន ដើម្បីចុះត្រួតពិនិត្យ និងយកការណ៍តែប៉ុណ្ណោះ។ ប៉ុន្តែ កាលពីថ្ងៃចន្ទ ព្រឹទ្ធសភាបារាំង បានចេញរបាយការណ៍មួយចង់បំពាក់មីស៊ីលឱ្យដ្រូន។ ការប្រើប្រាស់យន្តហោះយោធាគ្មានមនុស្សបើកដែលជាជម្រើសចំបងរបស់យោធាអាមេរិកក្នុងការប្រយុទ្ធប្រឆាំង ធ្លាប់ត្រូវបានបារាំងប្រឆាំងខ្លាំងណាស់ ព្រោះថាសម្រាប់បារាំង សង្គ្រាមពីចម្ងាយមានបញ្ហាច្រើន និងព្រោះសង្គ្រាមបែបនេះ ច្រើនតែជ្រុលជ្រួស បើគិតតាមក្របខ័ណ្ឌនៃច្បាប់មនុស្សធម៌អន្តរជាតិ។
ដល់ពេលដែលបារាំងត្រូវហ៊ានជំនះហើយ ! មានប្រទេសជាង១០ហើយ ដែលបំពាក់អាវុធឱ្យយន្តហោះគ្មានមនុស្សបើកដ្រូន។ សហរដ្ឋអាមេរិក អង់គ្លេស និងអ៊ីស្រាអែល ជាក្រុមប្រទេសដំបូងគេដែលនឹងឃើញប្រើមធ្យោបាយនេះនិងផលិតវាឡើង។ ក្នុងរយៈពេល ២ឆ្នាំចុងក្រោយនេះ ប្រទេសជាច្រើនទៀត ដែលមានការប្រយុទ្ធគ្នា ក៏ប្រើដ្រូនយោធាកាន់តែច្រើនឡើងដែរ ដូចជា អាប៊ីសាអូឌីត អេមៀរ៉ាអារ៉ាបរួម អ៊ីរ៉ាក់ អ៊ីរ៉ង់ នីហ្សេរីយ៉ា ប៉ាគីស្ថាន តួកគី។ ប្រទេសផ្សេងទៀតក៏កំពុងរៀបចំប្រើវា មានអាទិ៍អ៊ីតាលី។ អ៊ីតាលីទើបបានទទួលការអនុញ្ញាតពីរដ្ឋាបាលអាមេរិកកាលពីឆ្នាំ២០១៥ ក្នុងបំពាក់មីស៊ីលឱ្យដ្រូនReaper។
ចុះបារាំង ? បារាំង បានអភិវឌ្ឍន៍បច្ចេកវិទ្យាដ្រូន តាំងពីជាង២០ឆ្នាំ ក្នុងបេសកកម្មតាមដាន និងឆ្លបការណ៍ តែគួរឱ្យសោកស្តាយ បារាំងបែរជាប់ឈ្មោះថាមានការយឺតយ៉ាវខ្លាំងណាស់ក្នុងវិស័យនេះទៅវិញ។ ជាមួយនឹងការបដិសេធមិនបំពាក់អាវុធឱ្យដ្រូន បារាំងបានបាត់បង់ចំណែកមួយដ៏ធំ ! បារាំងស្ថិតក្នុងស្ថានភាព មិនទាន់បញ្ចប់សន្ទុះមហិទ្ធិរិទ្ធិរបស់ខ្លួន ! ដូច្នេះដល់វេលាដែលត្រូវពិចារណាគ្នា ! នេះបើតាមរបាយការណ៍របស់ព្រឹទ្ធិសភា ដែលមានចំណងជើងថា ដ្រូនសង្កេតនិងដ្រូនយោធា ៖ បដិវត្តយោធា។
បារាំងមានដ្រូន Reaper Male (ហោះក្នុងរយៈកម្ពស់មធ្យម តែបានយូរ) តែប៉ុន្មានគ្រឿងប៉ុណ្ណោះ ផលិតដោយអាមេរិក និងដែលបារាំងទទួលបាន យ៉ាងបន្ទាន់កាលពីឆ្នាំ២០១៣ ពេលចេញធ្វើប្រតិបត្តិការនៅម៉ាលី។ ៥គ្រឿងកំពុងបំពេញបេសកកម្មនៅនីហ្សេ។ បារាំងប្រើដ្រូនទាំងនោះក្នុងកិច្ចតាមដាននិងស៊ើបការណ៍តែប៉ុណ្ណោះ។ វត្តមានរបស់ដ្រូននេះ ផ្តល់ប្រយោជន៍ខ្លាំងណាស់ និងចាំបាច់បំផុតក្នុងការសម្រេចចិត្តចូលធ្វើប្រតិបត្តិការអ្វីមួយ ជាពិសេសប្រតិបត្តិការពិសេស និងកាន់មិនអាចខ្វះទៀត ក្នុងការប្រយុទ្ធប្រឆាំងនឹងភេរវនិយម។ នេះបើបានរបាយការណ៍ដដែល ដែលបានព្រមានខ្លះដែរអំពីការបាត់បង់ស្វ័យភាពយុទ្ធសាស្ត្រ។ ហេតុអ្វី ?
ព្រោះម្ចាស់របាយការណ៍មិនចង់ឱ្យបារាំងរំពឹងបច្ចេកវិទ្យាអាមេរិកខ្លាំងពេកទេ នាំគេអាចយកអធិបតេយ្យភាពទៅលលេងបាន។ ជាឧទាហរណ៍ជាក់ស្តែង កាលដែលបារាំងត្រូវការទិញដ្រូនជាបន្ទាន់ កាលពីឆ្នាំ២០១៣ បានបន្សល់ទុកនូវផលវិបាកជាច្រើនដូចជា គ្មានការជួលជុល គ្មានរចនាបទប្រព័ន្ធ គ្មានការបំពាក់បំប៉ន និងគ្មានផ្តល់ការងារក្នុងវិស័យដ្រូនទេ ហើយបើសុំការអនុញ្ញាតពីអាមេរិកទៀត នៅពេលត្រូវប្តូរ ឬលាតសន្ធឹងផ្ទៃហោះហើរដ្រូន។ ក្នុងស្ថានភាពបច្ចុប្បន្ន និងអនាគតមធ្យម យើងអាចប្រមើលភាពរំពឹងលើអាមេរិក ប៉ុន្តែសួរតើការត្រូវរ៉ូវនេះអាចអូសពេលយូរជានិរន្តឬ ? ចម្លើយគឺទេ !
ដូច្នេះដំណោះស្រាយល្អ គឺមានតែ ការកាត់បន្ថយភាពរំពឹងលើអាមេរិកទេ ! នេះបើតាមក្រុមអ្នកសរសេររបាយការណ៍។ បារាំងនិងអឺរ៉ុបត្រូវសម្រេចអភិវឌ្ឍន៍ប្រព័ន្ធដ្រូនMALE ឱ្យបានដោយខ្លួនឯង។ បារាំង អាល្លឺម៉ង់ អ៊ីតាលី និងអេស្ប៉ាញ មានគម្រោងពីរ មួយអភិវឌ្ឍដ្រូន ម៉ាល មួយទៀតធ្វើដ្រូនប្រយុទ្ធជំនាន់ថ្មី។ គម្រោងនេះមិនអាចចេញរួចមុនឆ្នាំ២០២៥ទេ។ ហេតុដូច្នេះហើយបានជាពេលនេះ ក្រុមការងារនៅព្រឹទ្ធសភាស្នើឱ្យបំពាក់អាវុធលើដ្រូនReaper សិន ក្នុងពេលរង់ចាំដ្រូនអឺរ៉ុប។ ហើយបារាំងគួរតែលើកប្រធានបទនេះ មកជជែកគ្នាឱ្យដាច់ស្រេចនៅសភា...
ត្រូវជជែកនៅសភា ព្រោះបារាំង ក៏ដូចជាបណ្តាប្រទេសមួយចំនួននៅអឺរ៉ុប មិនចង់ការប្រើប្រាស់ដ្រូនយោធា លើសមរភូមិជម្លោះទេ។ អឺរ៉ុបមានច្បាប់ប្រើប្រាស់ដ្រូនតឹងតែងណាស់ ក្នុងក្របខ័ណ្ឌច្បាប់មនុស្សធម៌។ បារាំងជាប្រទេសមួយគោរពច្បាប់អន្តរជាតិខ្លាំងណាស់ក្នុងវិស័យនេះ។ ដូច្នេះការមានដ្រូនប្រមាណតែ១២គ្រឿង បំពាក់អាវុធមីស៊ីល ពិតជាមិនមែនទង្វើបំប៉ោងយោធាឡើយ រហូតលែងប្រើកម្លាំងមនុស្សឡើយ។ ដ្រូនយោធាបារាំងបញ្ជាដោយមនុស្ស ហើយជម្រើសទិសដៅបាញ់ ត្រូវធ្វើឡើងប្រតិបត្តិការមនុស្ស ដែលមានការសម្រេចពីមនុស្សច្រើននាក់។ ថ្វីបើដ្រូនមានឈ្មោះមិនល្អទេ ធ្លាប់ត្រូវបានអង្គការការពារសិទ្ធិមនុស្ស ចាត់ទុកជាឧបករណ៍សម្លាប់មនុស្ស ដូចដែលគេធ្លាប់ឃើញអាមេរិកប្រើនៅយេមែន ឬប៉ាគីស្ថាន តែសម្រាប់បារាំង បើតាមសំណើរបស់ម្ចាស់របាយការណ៍ បើបារាំងបំពាក់អាវុធឱ្យដ្រូន បារាំងត្រូវតែចេញវិធានការប្រកបដោយតម្លាភាព។ ម្យ៉ាងវិញទៀត ដ្រូន MALE ដែលបារាំងប្រើសព្វថ្ងៃនេះ មានបំពាក់ប្រព័ន្ធចង្អុលទិស បាញ់មីស៊ីលពីឧទ្ធម្ភាចក្ររួចស្រេចទៅហើយ។ បូកផ្សំនឹងសមត្ថភាពហោះហើរបានយូរ គេអាចមានពេលការជ្រើសរើសចាញ់ស៊ីបបានត្រឹមត្រូវ ដើម្បីកាត់បន្ថយការខូចខាត។ ដូច្នេះបើគេធ្វើបានតាមរបាយការណ៍ ដ្រូនយោធាបារាំង អាចនឹងគោរពបានពាក្យសន្យា និងច្បាប់មនុស្សធម៌អន្តរជាតិយ៉ាងពេញលេញ។
អង្គការក្រៅរដ្ឋាភិបាល ព្រួយបារម្ភនៅពេលបានឮដំណឹងបារាំងចង់បំពាក់អាវុធឱ្យដ្រូន ប៉ុន្តែពួកបានទទួលស្គាល់ថាសំណើរបស់បារាំងឆ្លងកាត់ការជជែកពិភាក្សាគ្នាផង និងមានដាក់កំហិតឱ្យមានតម្លាភាពលើកងពលបញ្ជាដ្រូន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ