ប៉ូលីសអង់គ្លេសបន្តការឆែកឆេរថ្មីៗទៀតដើម្បីស្វែងរកជនដែលឃុបឃិតជាមួយភេរវករ
នៅអង់គ្លេសមួយថ្ងៃបន្ទាប់ពីភេរវកម្មនៅទីក្រុងឡុងដ្រ៏ ប៉ូលីសកំពុងបន្តប្រតិបត្តិការឆែកឆេរ ថ្មីៗទៀតនៅព្រឹលឹមថ្ងៃចន្ទនេះ និងចាប់ខ្លួនជនសង្ស័យជាច្រើននាក់កាលពីថ្ងៃអាទិត្យម្សិលមិញ។ ការវាយប្រហារនៅទីក្រុងឡុងដ្រ៍ ត្រូវបានក្រុមអង្គការរដ្ឋអ៊ីស្លាម ចេញមុខទទួលស្គាល់ថាជាស្នាដៃរបស់ខ្លួន។ រីឯនាយករដ្ឋមន្ត្រីអង់គ្លេស បានបរិហារពី “មនោគមន៍វិជ្ជាដ៏អាក្រក់ជួរជាតិរបស់ពួកអ៊ីស្លាមជ្រុលនិយម "។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
នៅថ្ងៃចន្ទនេះវេលាម៉ោង៤. ១៥នាទី ក្រុមមន្ត្រីប៉ូលីសអង់គ្លេសនៃទីបញ្ជាការប្រយុទ្ធប្រឆាំងទល់នឹងអំពើភេរវនិយម ដែលបន្តការស៊ើបអង្កេតនៅលើការវាយប្រហារនៅទីក្រុងឡុងដ្រ៏ បានធ្វើការឆែកឆេរនៅអស័យដ្ឋាន ២ កន្លែងថ្មីទៀត មួយនៅ Newham និងមួយទៀតនៅ Barking ដែលជាសង្កាត់ចម្រុះពូជសាសន៍ក្នុងភាគខាងកើតទីក្រុងឡុដ្រ៏។
នៅ Barking កាលពីថ្ងៃអាទិត្យម្សិលមិញ ប៉ូលីសអង់គ្លេស ចាប់ខ្លួនជនសង្ស័យចំនួន ១២នាក់ក្នុងនោះ មានស្រ្តី ៧ នាក់និងបុរស ៥ នាក់ដែលមានអាយុពី១៩ឆ្នាំទៅ៦០ឆ្នាំ។ ចំណែកបុរសម្នាក់អាយុ ៥៥ឆ្នាំ ត្រូវបានប៉ូលិសដោះលែងវិញដោយគ្មានភ័ស្តុតាង។
គួររំលឹកថា អំពើភេរវកម្មនៅទីក្រុងកាលពីថ្ងៃសៅរ៍មុន ដែលបង្កឡើងដោយខ្មាន់កាំបិត ៣នាក់ បានសម្លាប់មនុស្សយ៉ាងតិច៧នាក់ក្នុងនោះក៏មានជនជាតិបារាំងម្នាក់និងបណ្តាលឲ្យរងរបួសដល់ជន៤៨នាក់ផ្សេងទៀត។ ចំណែកជនជាតិបារាំងមា្នក់ទៀត បានបាត់ខ្លួនរកពុំទាន់ឃើញ។ រីឯខ្មាន់កាំភ្លើងទាំង៣នាក់ ត្រូវបានកងប៉ូលីសអង់គ្លេស បានបាញ់សម្លាប់ភ្លាមៗក្នុងពេលចុះធ្វើអន្តរាគម។ គឺជាភេរវកម្មលើកទី៣ហើយនៅក្នុងប្រទេសអង់គ្លេសក្នុងអំឡុងមិនដល់ទាំង៣ខែផង ដែលត្រូវបានអង្គការរដ្ឋអ៊ីស្លាមជីហាត ចេញមុខទទួលស្គាល់ថាជាស្នាដៃរបស់ពួកខ្លួន។ ក្រោយ អំពើភេរវកម្មនៅក្រុងឡុងដ្រ៏ នាយករដ្ឋមន្ត្រីអង់គ្លេស លោកស្រី Theresa May បានបរិហារពីមនោគមវិជ្ជាដ៏ជួរជាតិរបស់ពួកអ៊ីស្លាមជ្រុលនិយម។
ទន្ទឹមនេះ ក្រុមប៉ូលីសអង់គ្លេស កំពុងតែបន្តការស៊ើបអង្កេតយ៉ាងសកម្មបំផុតដើម្បីចង់ដឹងថា តើភេរវជនទាំង ៣នាក់នោះ បានរៀបចំធ្វើដោយខ្លួនឯង ឬមួយក៏មានការឃុបឃិតនិងការជួយគាំទ្រពីសំណាក់ជនផ្សេងៗទៀតដែរឬទេ?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ